Bakıda Qafqazın tarixi, müasir dövrü və inkişaf perspektivləri ilə bağlı müzakirələr aparılıb VİDEO
Bakı, 4 dekabr, M.Dadaşov, AZƏRTAC
Dekabrın 4-də Azərbaycan Milli Elmlər Akademiyasında (AMEA) Qafqazşünaslıq İnstitutunun təşkilatçılığı ilə “Qafqaz böyük sarsıntılar şəraitində: tarixi təcrübə, müasir dövr və perspektivlər” mövzusunda respublika elmi-nəzəri konfrans keçirilib.
AZƏRTAC xəbər verir ki, Mərkəzi Elmi Kitabxanada təşkil olunan tədbirdə AMEA-nın, bir sıra ali təhsil ocaqlarımızın, digər elm və təhsil müəssisələrinin 100-dən çox alim və tədqiqatçısı iştirak edib.
Konfransda AMEA-nın vitse-prezidenti, akademik İsa Həbibbəyli tədbirin ictimai və siyasi əhəmiyyət daşıdığını bildirib. O, Qafqazşünaslıq İnstitutunun fəaliyyətə başladığı qısa müddətdə xeyli uğurlu işlər həyata keçirməsinin, irəli sürdüyü problemlərə gənc tədqiqatçıların xüsusi maraq göstərmələrinin təqdirəlayiq olduğunu vurğulayıb.
AMEA-nın İctimai Elmlər Bölməsinin akademik-katibi, akademik Nərgiz Axundova XVIII əsrdən başlayaraq kəskin geopolitik rəqabət meydanına çevrilən Qafqaz regionunun bu günədək dünyada cərəyan edən siyasi və iqtisadi proseslərin təsiri altında olduğunu diqqətə çatdırıb. Qeyd edilib ki, minillərboyu Avropanı Asiya ilə birləşdirən Qafqaz regionu həm də xristian və İslam sivilizasiyalarının qovuşduğu məkandır. Bu region vacib strateji platforma olaraq müasir dövrün ziddiyyətlərinin və sarsıntıların mərkəzinə çevrilib. Bu sırada regionda müxtəlif dövlətlərin geosiyasi, iqtisadi maraqlarını və müxtəlif etno-konfessional toqquşmaları misal göstərmək olar.
Sonra Qafqazşünaslıq İnstitutunun direktoru, Milli Məclisin deputatı, AMEA-nın müxbir üzvü Musa Qasımlının “Cənubi Qafqaz 100 il əvvəl və indi: müqayisəli təhlil” mövzusunda məruzəsi dinlənilib. Alim məruzəsində 1917-ci ildə Rusiya imperatorluğu dağıldıqdan sonra Qafqazda yaranmış ictimai-siyasi, iqtisadi və hərbi şəraiti 1991-ci ildə SSRİ-nin dağılmasından sonra regionda yaranmış müvafiq şəraitlə müqayisəli təhlil edib. M.Qasımlı Azərbaycan torpaqlarında süni surətdə qurulmuş daşnak Ermənistanının və Ermənistan Respublikasının hər iki mürəkkəb şəraitdə ölkəmizə qarşı əsassız ərazi iddialarının, qanlı işğal siyasətinin mahiyyətini diqqətə çatdırıb. O, eyni zamanda, daşnak Ermənistanının Gürcüstan ilə müharibəsinin, gürcü torpaqlarına iddiaları, münaqişələrin törədilməsində xarici amilin rolunu xüsusi vurğulayıb.
Məruzədə hər iki dövrdə Şimali Qafqazda yaranmış şəraitin də ümumi təhlili verilib. Həmçinin beynəlxalq təşkilatların və böyük dövlətlərin region siyasəti, həyata keçirilən layihələr, ümummilli lider Heydər Əliyevin və Prezident İlham Əliyevin Qafqazdakı şəraitlə bağlı fikirləri yer alıb.
Konfrans işini görkəmli alimlərin sədrliyi ilə “Qafqaz ölkələri birinci və ikinci müstəqillik dövrlərində: müqayisəli-politoloji təhlil”, “Qafqazda münaqişələr, ərazi işğalları və terror”, “Qafqaz ölkələrində daxili ictimai-siyasi şərait”, “Qafqaz dövlətlərinin xarici siyasəti və qarşılıqlı münasibətləri” bölmələrində iclaslarla davam etdirib. İclaslarda birinci və ikinci müstəqillik illərində Qafqaz ölkələrinin daxili ictimai-siyasi şəraiti, regiondakı münaqişələr, ərazi iddiaları və işğalları, Ermənistanın Azərbaycana qarşı hərbi təcavüzü nəticəsində baş verən Dağlıq Qarabağ münaqişəsi, erməni terroru, Qafqaz dövlətlərinin qarşılıqlı münasibətləri, xarici siyasəti, böyük dövlətlərin və beynəlxalq təşkilatların region siyasəti, erməni təşkilatlarının Gürcüstan, İran və Rusiya əleyhinə fəaliyyəti və digər problemlərə həsr edilmiş məruzələr dinlənilib, geniş müzakirələr aparılıb.
Bölmənin digər xəbərləri
