Əcnəbi turistlərin sayında Rusiyadan gələnlər üstünlük təşkil edir

Lerik, 24 iyul, İsmayıl Cəfərli, AZƏRTAC

Azərbaycanın əzəmətli dağları, saysız hesabsız qalaları, zümrüd meşələri, nadir ağacları, çayları, çağlayan şəlalələri, zəngin flora və faunası ilə seçilən Lerik rayonu istər yerli, istərsə də xarici turistlərin istirahət ünvanına çevrilib. Füsunkar təbiəti ilə diqqət cəlb edən Lerikə istirahət etmək üçün üz tutan turistlərin sayı bu il daha çoxdur. Avqust ayının axırlarınadək rayon ərazisindəki istirahət mərkəzlərində boş yer yoxdur.

AZƏRTAC xəbər verir ki, Talış dağlarının zirvəsində yerləşən Lerik rayonunun 161 kəndi var və əhalisinin sayı hazırda 85 minə yaxındır. Rayonun ərazisində 134 tarixi abidə, türbə, ziyarətgah qeydə alınıb. Bunların dördü ölkə əhəmiyyətli olduğundan ciddi qorunur. Lənkəran-Lerik avtomobil yolu boyunca bir sıra turizm, istirahət-əyləncə mərkəzləri inşa edilib. Turizm obyektlərində hər cür şəraiti olan kottec, istirahət evləri, əyləncə mərkəzləri, restoran və barlar, idman qurğuları qonaqların xidmətindədir. Bu obyektlərdə 600-dən çox, o cümlədən turizm istirahət-əyləncə mərkəzlərində eyni vaxtda 400 nəfərdən çox qonağın qəbulu üçün hər cür şərait var.

Lənkəran Turizm İnformasiya Mərkəzinin direktoru İlqar Əzimov deyir ki, havaların isti keçməsi ilə əlaqədar olaraq dağ və dağ ətəyi ərazilərdə olan turizm obyektlərində demək olar ki, hazırda boş yer yoxdur: “Yerlərin çoxu əvvəlcədən tutulub. Buraya həm yerli, həm də xarici turistlər gəlir. Bakıdan yola çıxan turist rahat magistral yolla rayonumuza asanlıqla gələ bilir. Magistral yolun salınması bölgəyə ümumi turist axının nəzərəçarpacaq qədər artmasına səbəb olub. Keçən ilin eyni dövrü ilə müqayisədə bu il gələn turistlərin sayı təxminən 40-45 faiz çoxdur”.

Uzunömürlülər diyarı kimi tanınan Lerikdə hazırda 13-dən çox istirahət mərkəzi fəaliyyət göstərir. Bunlardan biri müalicəvi istirahət mərkəzidir. Lerikin florası çoxsaylı müalicəvi dərman bitkiləri ilə də zəngindir. Yay fəslində ölkəmizin əksər rayonlarından cənub bölgəsinə istirahət etmək üçün gələnlər daha çox Lerikə üz tuturlar.

Onlardan biri də Sevda Hüseynovadır. “Neçə ildir Bakı Metropolitenində çalışıram. Əməkdaşlarımız hər il bura gəlir. Hamısı da bu yerlərdə həm istirahətdən, eləcə də yeməyindən, müalicəsindən çox razı qalır. Mən də ailəmlə gəldim gördüm, çox razıyam”, - deyə o bildirib.

Mingəçevirdən ailəsi ilə birgə Lerikdə dincəlməyə üstünlük verən Rüstəm Abbasquliyev isə deyib: “Gözəl yerdir, istirahət üçün əlverişli məkanları var. Uşaqlarla, ailə ilə bərabər istirahət etmək, təbiətin zənginliyinə, gözəlliyinə baxmaq üçün Lerik füsunkar rayondur. Cənub bölgəsi yeməkləri ilə də çox zəngindir”.

Ailəsi ilə birlikdə Lerikdə dincələn Cövdət Hacıyev qonşu ölkələrin istirahət mərkəzlərinə getməkdənsə, Azərbaycanı qarış-qarış gəzməyi üstün tutur: “Bakıda yaşayıram. Bura ikinci dəfədir gəlirəm. Lerik həqiqətən gözəldir, səfalı bir yerdir. Bəzi insanlar başqa dövlətlərdə - Gürcüstanda, Rusiyada, Türkiyədə istirahət etmək istəyir. Amma bu təbiəti, gözəlliyi heç bir yerə dəyişmərəm. Buranın gözəl istirahət zonaları var. Mən məsləhət görərdim ki, gəlib burada dincəlsinlər. Maddi cəhətdən də çox uyğundur. Gürcüstanda xərclədikləri pulun yarısına burada gözəl dincələ bilərlər. Bakıdan bura məsafə 300 kilometrdir, gəlməyə dəyər”.

Lənkəran Turizm İnformasiya Mərkəzinin direktoru İlqar Əzimov bildirir ki, Lerikə gələn turistlərin təxminən 10 faizi əcnəbilərdir: “Əcnəbi turistlərin sayında Rusiyadan gələnlər üstünlük təşkil edir. MDB dövlətlərindən, İrandan, Avropa ölkələrində gələnlər də var”.

Rusiyalı turist Sveta Kazlova Leriki belə gözəl təsəvvür etmədiyini deyir: “Biz Bakı və Azərbaycan haqqında çox eşitmişik. Ölkəniz haqqında oxumuşuq, internetdə informasiyalara baxmışıq. Sonra bu gözəlliyi, uca dağları, mehriban insanları gəlib görmək arzusunda olduq. Artıq 3 gündür Lerikdə ailəmizlə birlikdə dincəlirik. Hər şey ürəyimizcədir”.

Sveta Kazlovanın həyat yoldaşı Oleq də söhbətə qoşulur: “Biz Lerikin füsunkar mənzərəsindən zövq alırıq. Yeməklərinizin dadına baxmışam. Çox xoşuma gəldi. Kişilər təbii ki, ətli yeməkləri daha çox sevir. Xüsusən də qoyun ətindən olan kabab çox dadlıdır. Belə kabab bizdə yoxdur”.

Lerikə gələn turistlərin daha çox diqqətini cəlb edən nəinki respublikamızda, eləcə də dünyada yeganə olan Uzunömürlülər Muzeyidir. Uzunömürlülər diyarı kimi tanınan Lerikdə planetimizin ən qocaman sakinləri Şirəli Müslümov 168 il, Mahmud Eyvazov 150 il, Məcid Ağayev 143 il ömür sürmüşlər. Bu gün də Lerikdə yaşı 100-ü ötmüş 10-a yaxın sakin yaşayır. Azərbaycanda Azıx mağarasından sonra ən qədim insan məskəni olan Büzeyir mağarası da Lerikin ərazisində yerləşir. XVIII-XIX əsrlərdən başlayaraq məşhur fransız arxeoloqu Jak de Morqan, K.Şaffer və qardaşı Henri ilə apardığı arxeoloji qazıntı zamanı buranı “arxeoloji cənnət” adlandıraraq, qiymətli tarixi eksponatlar aşkar ediblər. Morqan Lerikin Veri kəndi ərazisindəki Qızılbaşlar qəbiristanlığında arxeoloji qazıntılar apararaq mərtəbəli qəbirlərdən tapdığı bütün maddi-mədəniyyət nümunələrini özü ilə Fransaya aparıb. Həmin eksponatlar indi də Paris muzeylərini bəzəyir.