Ukraynalı tələbələr Azərbaycanın Vətən müharibəsi barədə məlumatlandırılıb VİDEO
Dnepr, 4 iyun, AZƏRTAC
Azərbaycanın Ukraynadakı fövqəladə və səlahiyyətli səfiri Elmira Axundova nüfuzlu Dnepr Texniki Milli Universitetinin geniş tələbə auditoriyası qarşısında mühazirə oxuyub.
AZƏRTAC xəbər verir ki, səfir mühazirədə əsasən Azərbaycanın uğurlu xarici siyasəti, Azərbaycan-Ukrayna münasibətləri, 44 günlük Vətən müharibəsi mövzularına toxunub.
Elmira Axundova qeyd edib ki, Azərbaycan xalqının ümummilli lideri Heydər Əliyev bütün istiqamətlərdə böyük uğurlar qazanıb, dünyanın aparıcı ölkələri ilə Azərbaycan arasında iqtisadi, siyasi, elmi, mədəni, humanitar və diplomatik münasibətlərin inkişafına xüsusi diqqət yetirib. Ulu Öndərin müdrik və uzaqgörən siyasəti Azərbaycanı dünyanın ən çox inkişaf etmiş ölkələri ilə strateji tərəfdaşlıq səviyyəsinə qaldırıb. Belə ölkələrdən biri olan Ukrayna Azərbaycanın ən etibarlı strateji tərəfdaşlarındandır. Ölkələrimiz müstəqillik əldə edəndən sonra Heydər Əliyev Azərbaycan ilə Ukrayna arasında möhkəm təmələ əsaslanan dostluq münasibətləri qurulması üçün öz tarixi missiyasını bacarıqla yerinə yetirib. Bu gün Azərbaycan və Ukrayna beynəlxalq arenada strateji tərəfdaşlar kimi tanınır.
Səfir vurğulayıb ki, Ulu Öndərin uzaqgörən xarici siyasəti bu gün Prezident İlham Əliyev tərəfindən uğurla davam etdirilir. Dövlətimizin başçısı xarici siyasət məsələlərini daim diqqət mərkəzində saxlayır, diplomatiyamız qarşısında duran prioritet vəzifələri müəyyənləşdirir, onların planlı və ardıcıl surətdə həyata keçirilməsini təmin edir. Prezident İlham Əliyevin güclü şəxsiyyət kimi möhkəm iradəsi, dərin və strateji baxışı və düşünülmüş, çevik qərarları Azərbaycanın müstəqil xarici siyasət yürütmək imkanlarını şərtləndirir.
Elmira Axundova mühazirəsi zamanı vurğulayıb ki, Prezident, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu 44 günlük Vətən müharibəsi zamanı ərazilərimizi işğaldan azad edib. Hazırda həmin ərazilərimiz yenidən qurulur və bərpa edilir. 44 günlük Vətən müharibəsi Azərbaycanın gücünü, iradəsini, birliyini göstərdi. Göstərdi ki, Azərbaycan xalqı bu vəziyyətlə heç vaxt barışmayacaq.
Mühazirədən sonra diplomat tələbələrin suallarını cavablandırıb.
Emil Hüseynli
AZƏRTAC-ın xüsusi müxbiri
Dnepr
Bölmənin digər xəbərləri
