İDMAN
17 YAŞLI AZƏRBAYCANLI ALMANİYANIN PEŞƏKAR BOKS MƏKTƏBİNİN DİQQƏT MƏRKƏZİNDƏDİR
Almaniyanın Leypsiq şəhərində yaşayan 17 yaşlı azərbaycanlı boksçu Rəşad İsmayılov peşəkar boksçuların yarışlarında uğurla çıxış edir. İstedadlı azərbaycanlı gəncin gələcəkdə dünyanın peşəkar boksçuları arasında şərəfli yer tutacağına əmin olan Almaniyanın Saksoniya əyaləti peşəkar boksçular cəmiyyətinin sədri cənab Tibor Rixter artıq iki ildir ki, onu himayəsinə götürmüşdür. O, Rəşadı mənzillə təmin etmiş, bir neçə imkanlı iş adamlarını ona maddi yardım göstərməyə cəlb etmişdir.
Cənab Tibor Rixter Azərbaycan Respublikasının Berlindəki səfirliyinə ünvanladığı məktubunda Rəşad haqqında xoş sözlər yazmışdır: “Rəşad İsmayılov gənc peşəkar boksçu kimi Almaniyada bir-birinin ardınca layiqli qələbələr qazanır, ona təhkim olunmuş tanınmış məşqçi Uve Transın rəhbərliyi altında öz döyüş üslubunu günü-gündən təkmilləşdirir, ustalığını yorulmadan artırır, müntəzəm və məqsədyönlü məşqlər edir. Biz - onun meneceri və məşqçiləri bu istedadlı və iradəli dəri əlcək ustasına böyük ümid bəsləyirik. Rəşadın aprelin 14-də İlzenburqda keçirəcəyi növbəti görüşün də qalibi olacağına şübhə etmirik. Bundan sonra Rəşad iyunun ortalarında Maqderburqda beynəlxalq peşəkar boksçular sırasında Almaniya tərəfindən çıxış edəcəkdir”.
Yusif Xəlilov
AZƏRTAC-ın xüsusi müxbiri
BERLİN