Naftalan, 30 iyul, Elcan Məmmədov, AZƏRTAC

Regionların sosial-iqtisadi inkişaf proqramlarının icrası çərçivəsində aparılan quruculuq və abadlıq işləri sayəsində Naftalan şəhəri bu gün turizm sektorunda ön sıralara yüksəlib. Şəhər həm müalicəvi nefti ilə xəstələrin müalicəsində daha effektiv nəticələr əldə olunmasına, həm də son illər burada yaradılan müasir turizm infrastrukturuna görə yerli əhali və ölkəmizin qonaqları üçün cəlbedici kurort mərkəzinə çevrilib. Qeyd edək ki, Naftalanın tarixində dönüş mərhələsi 1970-1990-cı illərə təsadüf edir. Həmin dövrdə ümummilli lider Heydər Əliyev şəhərin inkişafı və böyük şöhrət qazanması üçün misilsiz xidmətlər göstərib. Belə ki, o illərdə şəhərdə müxtəlif sosial və iqtisadi təyinatlı müəssisələr tikilib istifadəyə verilib. Sonrakı dövrdə isə Prezident İlham Əliyevin şəxsi təşəbbüsü və həyata keçirilən proqramlar sayəsində Naftalan şəhəri turizm sektorunda ön sıralara yüksəldi. Şəhərin əsasını sanatoriya-kurort infrastrukturu təşkil edir. Son illər müasir əsaslarla yeni kurortların yaradılması ilə şəhərin turizm potensialı genişləndirilir, sahibkarlığın inkişafı üçün münbit şərait formalaşır. “Naftalan Mərkəzi sanatoriyası” da belə layihələrdən biridir.

Ölkədə sağlamlıq turizminin əhatə dairəsini daha da genişləndirən, bir hektar ərazidə yerləşən sanatoriya müalicə üçün bu məkana üz tutan vətəndaşların məmnunluğunu tam təmin edəcək şəraitə malikdir. Mərkəz bir çox terapiya sahələrini özündə birləşdirməklə, müxtəlif xəstəliklərin müalicəsi üçün sağlamlıq-profilaktik müəssisəyə çevrilir. Yeni müəssisədə 50 nəfərə yaxın personalın çalışması şəhər əhalisinin məşğulluğunun təmin olunmasına mühüm töhfədir.

Ümumilikdə, Naftalanda fəaliyyət göstərən kurort-sanatoriya müəssisələrində 1000 nəfərdən çox şəxs işlə təmin olunub ki, bu da şəhərdə işsizliyin aradan qaldırılmasında əhəmiyyətli rol oynayır. Hazırda fəaliyyət göstərən müəssisələr gün ərzində 3000-ə yaxın turist qəbul etmə imkanına malikdir. Son illərdə Naftalan şəhərində müasir tələblərə cavab verən 10-dan çox istirahət və sağlamlıq mərkəzi istifadəyə verilib. 2021-ci ildə daha 4 sanatoriya kompleksinin açılışı nəzərdə tutulur. Bu da gələcəkdə yeni iş yerlərinin açılması və daha çox turist qarşılanması deməkdir. Qeyd edək ki, müalicə müəssisələrinə gələn qonaqların sayında ən yüksək göstərici 2019-cu ildə qeydə alınıb, həmin ildə 60 ölkədən 12000-dən çox, ümumilikdə isə 40000-ə yaxın turist gəlib.

Diqqətə çatdıraq ki, 2020-2021-ci illərdə koronavirus pandemiyası turizm sənayesinə də təsir etdiyindən rəqəmlərdə azalma müşahidə olunub. Lakin bəzi məhdudiyyətlərin aradan qaldırılması ilə Naftalanın turizm sektorunda yenidən canlanma hiss edilir. Belə ki, son bir ayda sanatoriyalara 2000-ə yaxın turist gəlib. Beləliklə, şəhər infrastrukturunun yenilənməsi, yeni sağlamlıq-istirahət mərkəzlərinin istifadəyə verilməsi yerli və xarici turistlərin Naftalana olan marağını postpandemiya dövründə daha da artıracaq.

Naftalan Şəhər İcra Hakimiyyətindən AZƏRTAC-ın bölgə müxbirinə verilən məlumata görə, Naftalan Mərkəzi Sanatoriyası 176 yerlik 88 standart otaqdan 10 mərtəbəli korpusdan ibarətdir. Burda avtovağzal kompleksi, gözləmə zalı, kassa, saxlama kamerası, ana və uşaq otağı və 3 sanuzel mövcuddur.

Həkim İltifat Lütfizadə müsahibəsində bildirib ki, sanatoriyada tibbi müayinə üçün ginekologiya, kardiologiya, laboratoriya, hərəkət orqanlarının xəstəlikləri, dəri xəstəlikləri və ultrasəs müayinəsi şöbələri fəaliyyət göstərir.

“Naftalan Mərkəzi Sanatoriyası şəhərimizdə yerləşən digər sanatoriyalar kimi dayaq hərəkət, sinir sistemi, dəri və digər xəstəliklərin müalicəsi üçün olduqca faydalıdır. Fizioterapiya, lazerterapiya, puvaterpiya kimi müalicə üsulları ilə müalicəvi Naftalan vannasının birgə qəbul olunması çox effektiv olur. Bu sanatoriyanı digərlərindən fərqləndirən xüsusiyyətlərdən biridə burda yeni müalicə üsullarının tətbiq olunmasıdır. Bu əsasən dəri xəstəliklərində istifadə olunan puvaterapiya müalicə üsuludur. Bu üsul 28 ultrabənövşəyi şüadan ibarət bir kabinəsi olan avadanlıq vasitəsilə həyata keçirilir,”- deyə İ.Lütfizadə qeyd edib.

Vurğulayıb ki, bu sanatoriyanın digərlərindən fərqləndirən ən əsas cəhətlərdən biri Naftalan neftinə qənaət olunması, ətraf mühitin çirkləndirilməsinin qarşısının alınması və daha səmərəli istifadəsi üçün neft çənlərinə xüsusi filtrlərin yerləşdiriliməsidir. Bu filtrlər neftin digər qarışıqlardan ayrılmasına və ondan qənaətlə istifadəsinə şərait yaradacaq. Sanatoriyada istirahət üçün türk hamamı, fin hamamı, yaqut zalı, zümrüd zalının da mövcud olduğu diqqətə çatdırılıb.

Şəhərin qonaqları isə həm burdakı qiymətlərdən həm də xidmətlərdən razı olduqlarını bildiriblər. Goranboy sakini Allahşükür Ağayev 15 gündür burda müalicə olduğunu və xüsusilə qiymətlərdən razı olduğunu deyib: Bu gün müalicəvi istirahətim bitir. Demək olar ki, bütün xidmətlərdən yararlandım. Oynaq ağrılarından əziyyət çəkirdim. Tövsiyə etdilər ki, Naftalana gəlim burda müalicə olum. Xüsusilə deyim ki, qiymətlər çox əladır. Hər bir adam gündəlik 30-40 manat arası vəsair xərcləməklə qalmaq, yemək, istirahət və müalicə xidmətlərindən istifadə edə bilir. Naftalanda gəzdim, adam şəhərin gözəlliyinə heyran qalır.

İyulun 22-də Naftalan şəhərinə səfəri çərçivəsində Azərbaycan Respublikasının Prezidenti İlham Əliyev istismar müddəti başa çatmış Naftalan şəhər hava limanına da baxıb. Dövlətimizin başçısına hava limanı haqqında məlumat verilib. Bildirildi ki, 1977-ci ildə istismara verilən hava limanı 1997-ci ilə qədər erməni qəsbkarları tərəfindən dəfələrlə atəşə tutulub. Bu, limanda təyyarələrin enmə və qalxması üçün real təhlükəyə çevrilib. 1997-ci ildə isə hava limanının fəaliyyəti dayandırılıb.

Hava Limanının rəisi Xaqani İbrahimov söyləyib ki, 1977-ci ildən istifadə edilən hava limanında fəaliyyəti dövründə gündə 4-5 rels olmaqla uçuşlar həyata keçirilib. “1980-ci illərdə burdan Krosnadar-Donetsk-Naftalan marşrutu üzrə həftə ərzində 4 dəfə aviareyslərimiz olub. Aeroportun fəaliyyəti dövründə şəhərdə 5-dən çox kassamız fəaliyyət göstərib. 1996-cı ildə təyyarə limana eniş edərkən erməni qəsbkarları tərəfindən qanad nahiyəsindən vurulub. Sərnişinlərdən xəsarət alan olmayıb. Vətən müharibəsinə qədər hava limanı cəbhə bölgəsinə yaxın olduğu üçün daim atəşə məruz qalıb və fəaliyyətini dayandırıb.,”- deyə Hava Limanının rəisi bildirib.

Gələcəkdə zonada Hava Limanının yenidən fəaliyyətə başlaması Naftalan və Suqovuşan rayonlarının vahid turizm zonalarına çevrilməsi ilə bərabər ölkədə turizm sektorunun inkişafına daha da təkan verəcək.

Naftalanda gedən sürətli abadlıq işləri fonunda yolların sürətlə asfaltlanması yerli və xarici qonaqların rahatlığının təmin olunması üçün veloyolun istifadəyə verilməsini vacib edib. Velosiped həvəskarlarının daha rahat hərəkəti üçün şəhərdə 7 km uzunluğunda veloyol çəkilib. Həmçinin, şəhərdə turistlər üçün yeni istiqamətverici turizm məlumat nişanları və ərazi göstərici nişanlar quraşdırılır.