Vətən müharibəsi qazisi: Fərqi yox idi, hansı milləti təmsil edirsən, hamımız bir amal uğrunda döyüşürdük VİDEO
Şəmkir, 2 noyabr, Ruslan Novruzoğlu, AZƏRTAC
Vətən müharibəsində Qələbənin qazanılmasında mühüm amillərdən biri də xalqımızın birlik və həmrəylik nümayiş etdirməsi oldu. Millətindən asılı olmayaraq, bu ölkədə yaşan hər kəs Vətənin bütövlüyü uğrunda savaşdan çəkinmədi. Sonda hamılıqla birgə Zəfər sevincini yaşadıq.
AZƏRTAC xəbər verir ki, ölkəmizdə yaşayan axıska türkləri də Vətən müharibəsində düşmənə qarşı döyüşlərdə iştirak edib. Belə qazilərimizdən biri Ramuz Meraliyevdir. O, Vətən müharibəsinə könüllü gedərək, torpaqlarımızın azadlığı uğrunda haqq savaşında iştirak edib.
Ramuz Meraliyev Şəmkirin Sarıtəpə kəndində yaşayır. Vətən müharibəsi başlayanda o, bir neçə ay idi ki, hərbi xidmətdən evə qayıtmışdı.
Müharibənin sonuna qədər döyüşlərdə iştirak edən Ramuzın atası da övladını yola saldıqdan bir müddət keçməmiş döyüşlərə yollanmaq üçün rayon komissarlığına müraciət edib. “Müharibə başlananda oğlum könüllü getdi. Hər gün cəbhədən gələn xəbərləri həyəcanla izləyirdim. Sonra dözə bilmədim, rayon komissarlığına yollandım. Dedim ki, mən də getmək istəyirəm. Mənə dedilər ki, kifayət qədər əsgərimiz var, hələlik ehtiyac yoxdur. O günlərdə Allaha dua edirdik ki, qalib gələk. Torpağı, Vətəni qorumaq lazımdır. Bu torpaq bizim hamımızın Vətənidir”, - deyə qazi atası Virşan Meraliyev söyləyib.
Ramuzın döyüş yolu Füzuli istiqamətindən başlayıb. Düşmən mövqelərinə od ələyib, sonra Şuşaya istiqamət götürüblər. Elə həlledici döyüşlər də Şuşada olub. Qazimiz döyüşdə yaralansa da, şəhərin azad edilməsində axıra qədər savaşıb: “Bir tərəfimiz dağ, bir tərəfimiz isə dərə idi. Ermənilər dərənin içindən atırdılar. Amma o dərədən çıxa bilmirdilər. Bizim o döyüşdə 6 yaralımız oldu. Yaralıları çıxaranda məni də vurdular. Amma o an hiss etməmişəm, yaralanmağımı bilmirdim. Səhər açılanda gördüm ki, ayağımdan yaralanmışam. Heç kim döyüşdən çəkinmirdi, hamı irəli can atırdı. Fərqi yox idi, hansı milləti təmsil edirsən, hamımız bir amal uğrunda döyüşürdük. Hamımız bir ölkənin əsgəriyik. Hər kəs döyüşdə yalnız düşməni öldürməyi düşünürdü. Mən də onlardan biri. Sevinirəm ki, torpaqlarımızın azadlığı üçün döyüşmüşəm və indi o torpaqlar azad nəfəs alır”, - deyə qazi Ramuz Meraliyev bildirib.
Ramuz döyüşlər bitdikdən sonra kəndə dönəndə onu camaat elliklə, sevinclə, şadlıqla qarşılayıb. Vətən müharibəsində göstərdiyi igidliyə görə “Döyüşdə fərqlənməyə görə” və “Şuşanın azad olunmasına görə” medalları ilə təltif edilib.
Bölmənin digər xəbərləri
