2004-CÜ İLİN DÖVLƏT BÜDCƏSİNƏ DƏYİŞİKLİKLƏR EDİLƏCƏK

28.06.2004 [23:19]
Çap et
A⁺ A^-

İyunun 28-də Milli Məclisin hüquq siyasəti və dövlət quruculuğu məsələləri və iqtisadi siyasət daimi komissiyalarının birgə iclası keçirilmişdir.

İclasda “Azərbaycan Respublikasının 2004-cü il dövlət büdcəsi haqqında” Qanununa dəyişikliklər və əlavələr edilməsi barədə” qanun layihəsi müzakirə olunmuşdur.

İqtisadi siyasət daimi komissiyasının sədri Səttar Səfərov demişdir ki, Prezident İlham Əliyevin əhalinin rifahının yüksəldilməsi ilə əlaqədar seçkiqabağı xalqa verdiyi vədlər real həyatda öz əksini tapır. Ölkəmizin iqtisadiyyatında əldə olunan nailiyyətlər, dövlət büdcəsinin gəlirlər hissəsində artımla müşayiət olunmuşdur və artım sahəsində xalqın aztəminatlı hissəsinin müavinətlərinin artırılmasına, eləcə də digər sahələrə sərf olunacaqdır.

Sonra maliyyə nazirinin müavini Azər Bayramov layihə ilə bağlı məlumat vermişdir.

Deputatlar və dəvət olunmuş şəxslər məsələ ilə bağlı öz təkliflərini vermişlər.

Layihəni Milli Məclisin müzakirəsinə çıxarmaq qərara alınmışdır.