2025-ci ildə “Kapital Bank”a 50 milyon dollar sindikatlaşdırılmış kredit vəsaiti cəlb olunub
Bakı, 22 aprel, AZƏRTAC
2025-ci ildə “Kapital Bank”a 50 milyon dollar həcmində sindikatlaşdırılmış kredit vəsaiti cəlb olunub.
AZƏRTAC xəbər verir ki, bu barədə “Kapital Bank”ın İdarə Heyətinin sədri Fərid Hüseynov bankın ötən ilin yekunları və 2026-cı ilin fəaliyyət planlarına dair keçirdiyi mətbuat konfransında deyib.
O bildirib ki, ötən il bankın tarixində ilk sindikatlaşdırılmış kredit sazişi imzalanıb. Körfəz regionunun aparıcı bankı olan “Mashreq Bank”la əməkdaşlıq çərçivəsində “Kapital Bank”a 50 milyon dollar həcmində sindikatlaşdırılmış kredit vəsaiti cəlb olunub.
“Bank, həmçinin ötən il Özbəkistanın ən böyük IT ekosistemi ilə tərəfdaş olub. “Uzum” ekosisteminə daxil olan “MAKESENSE” şirkətinə 22 milyon dollar həcmində sindikativ kredit ayrılıb. Bu əməkdaşlıqla "Kapital Bank"ın tarixində ilk dəfə olaraq beynəlxalq maliyyə bazarında fəaliyyət göstərən hüquqi şəxsə sindikat krediti ayrılıb. Ötən il “Birbank” brendlərinə tamamilə yeni bir nəfəs gətirdik və “Birbank Invest”i ictimaiyyətə təqdim etdik. “PAŞA Kapital” İnvestisiya Şirkəti ilə birgə ərsəyə gətirdiyimiz bu layihə Azərbaycanın bank tərəfindən təqdim olunan ilk müstəqil investisiya tətbiqidir. Biz investisiya mühitini o qədər sadələşdirdik və əlçatan etdik ki, artıq rəqəmlər də öz sözünü deyir. Bu gün cəmi 1 dollarla qlobal bazarlara giriş etmək mümkündür. İstifadəçilərimiz ABŞ-nin aparıcı şirkətləri və birja fondları (ETF) da daxil olmaqla 12 mindən çox maliyyə alətindən faydalana bilirlər. Bütün bunlar sürətli rəqəmsal qeydiyyat, 7/24 investisiya imkanı, 500 min dollaradək sığorta və yüksək təhlükəsizlik standartları ilə baş verir. Çox qısa zaman keçməsinə baxmayaraq, artıq 100 minə yaxın istifadəçimizin bizə güvənməsi və dövriyyənin 25 milyon dollardan çox olması onu göstərir ki, cəmiyyətimiz bu transformasiyaya çoxdan hazır idi”, - deyə Fərid Hüseynov vurğulayıb.
Bank sədri bildirib ki, “Birbank” tətbiqində çata ünvanlanan müraciətlərin 70 faizi süni intellekt vasitəsilə cavablandırılır: “2025-ci ilədək “Birbank” çatına ünvanlanan müştəri sorğularının emalı 40 faizdən 70 faizə yüksəlib. Bu artım müştərilərin məmnuniyyət nəticələrinin də 75 faizə yüksəlməsinə səbəb olub. Müştərilər artıq bir çox əməliyyatları müstəqil şəkildə icra edə bilirlər - kartların blokdan çıxarılması, əməkhaqqı avansı, nağd kredit və ya kredit kartı üçün müraciət kimi xidmətlər artıq operator müdaxiləsi olmadan həyata keçirilir. Rəqəmsallaşma trendini daxili əməliyyatlarımızda da tətbiq edirik. Nümunə olaraq, robotik avtomatlaşdırma (RPA) texnologiyası vasitəsilə 2025-ci ildə 8 departament üzrə 46 biznes prosesini avtomatlaşdırmışıq və bu, bizə 93 min saatlıq manual iş yükünə qənaət etmək imkanı yaradıb”.
Bölmənin digər xəbərləri
