REGİONLAR
Ağac üzərində oyma sənəti ilə məşğul olan qusarlı baytar FOTO VİDEO
Qusar, 28 fevral, Elxan Yusifli, AZƏRTAC
Ağac üzərində oyma ustası Rüfət Xanəhmədov Qusar rayonun Əniğ kəndində yaşayır.
AZƏRTAC-ın bölgə müxbiri xəbər verir ki, 72 yaşlı sənətkar oyma üsulu ilə müxtəlif heykəllər, məişət əşyaları, suvenirlər və oyuncaqlar hazırlayır.
Rüfət Xanəhmədov hələ məktəbdə oxuyarkən rəssamlıq və heykəltaraşlıq sahəsinə maraq göstərib. Qusarda sənətkarlığın bu növləri üzrə dərnəklərə qatılıb.
Hərbi xidmətdən sonra Şamaxı Kənd Təsərrüfatı Texnikumunda baytarlıq ixtisası üzrə təhsil alıb. Tələbəlik illərində də asudə vaxtlarını oyma sənəti ilə məşğul olub.
“Mənim sənətkarlıq sahəsinə böyük marağım var. Baytarlıq ixtisası üzrə oxumuşam. Baytarlıq sahəsində çalışsam da sənətkarlıqla da məşğul olmuşam. Bu işdən böyük zövq alıram. İti kəsici alətlə işlədiyimdən tələsməmək, səbirli davranmaq lazımdır. Sifariş əsasında müxtəlif heykəllər və suvenirlər hazırlayıram. Bir əl işinin hazırlanması üçün 10 günə kimi vaxt sərf edirəm. Suvenirləri 40-50 manata satıram”, - deyə Rüfət Xanəhmədov bildirib.
Rüfət Xanəhmədov əl işlərini əsasən dəndə, palıd, qızılağac və qovaq ağacından hazırlayır. Bu materiallar sınıb, çatlamadığından oyma sənəti üçün daha əlverişlidir.
Sənətkar deyir ki, indi ağac üzərində oyma sənətinə maraq göstərənlərin sayı azdır. Amma nəvəsi Şükran Xanəhmədov babasının yolunu davam etdirmək istəyir.
Eşitmə qüsurlu olan Rüfət Xanəhmədov Qusar rayonunda keçirilən bir çox mədəni tədbirlərdə, eləcə də Əlillərin Ümumrespublika Yaradıcılıq sərgi-müsabiqəsində iştirak edib.