Bakıdan İsmayıllının ucqar kəndinə üz tutan fransız dili müəllimi REPORTAJ VİDEO
İsmayıllı, 14 mart, Rəşad Türkoğlu, AZƏRTAC
Dan yeri sökülmədən, sükutun pozulması ilə Qumral xanımın yuxudan oyanmasına səbəb iş yerinə vaxtında çatmaq istəyidir. O, İsmayıllının şəhər mərkəzindən xeyli aralıda yerləşən Mollaisaqlı kəndində yaşayır. Bakı şəhər sakini Qumral Məmmədli ötən ilin payızında şagirdlərə fransız dilini öyrətmək üçün paytaxtdan buraya üz tutub.
AZƏRTAC xəbər verir ki, Bakı Dövlət Universitetinin Filologiya fakültəsində xarici dil müəllimliyi (fransız dili) ixtisası üzrə bakalavr, Azərbaycan Dillər Universitetində magistratura təhsili almış Qumral Məmmədli pedaqoji fəaliyyətinə Bakıda başlasa da, sonra ucqar kənddə işləmək qərarına gəlib. Həftədə iki gün olmaqla, səhər saatlarında kəndin dolaylı küçələrindən keçərək Mollaisaqlı kənd tam orta məktəbinə gələn müəllimə sinfə daxil olanda şagirdlərini fransız dilində salamlayır.
“Peşəsinin müqəddəsliyini anlayan müəllim üçün harada dərs deməyin önəmi yoxdur. Yetər ki, onun biliyindən kimsə faydalansın. Ucqar kənd məktəblərindən birini seçmək istəyimi valideynlərim bir qədər təəccüblə qarşılasalar da, buna etiraz etmədilər, əkinsə, mənə dəstək oldular. Bu qərarı özüm versəm də, sonrakı proseslərin necə olacağını bilmirdim. Şəhərdən kənd mühitinə düşmək bir az çətin görünürdü. Lakin indi düşünürəm ki, bu işin öhdəsindən gələ bildim, istər kollektivin, istər rəhbərliyin, istər şagirdlərin, eləcə də kənd camaatının sevgisini qazanmışam. Mən də bu sevgini onlara qaytarmağa çalışıram”, - deyə Qumral Məmmədli bildirir.
İşini və şagirdlərini sevən müəllimə sinifdə dərslərini həvəslə və bir qədər fərqli üsulla keçirir. Deyir ki, şəhər məktəbindən gəlib əyalətdə işləməkdə məqsədi uşaqlara stimul vermək, onlarda elmə və təhsilə maraq oyatmaqdır: “Düşünürəm ki, bunun öhdəsindən gəlirəm, artıq uşaqlarda o stimulu görürəm. Adətən, kənd yerlərində uşaqlar rayon mərkəzinə, şəhər müəllimlərinin yanına üz tuturlar. Amma mənim məqsədim şəhər müəlliminin kənd məktəbi şagirdlərinin yanına gəlməsi, onlara təhsil verməsidir. Ona görə də buradayam, əlimdən gələni edirəm ki, ucqar kənddə olan şagirdlər istəklərinə çata bilsinlər”.
Peşəsinin vurğunu olan qəhrəmanımız dərsdən sonra kənddə qaldığı evə üz tutur. Paytaxtda doğulub boya-başa çatsa da, kənd həyatına uyğunlaşdığını deyən Qumral xanım, təsərrüfat işlərindən də çəkinmir.
Günün ikinci yarısında Qumral müəllimə məktəbdən əlavə hazırlaşmaq üçün onun yanına üz tutan şagirdlərə vaxtını ayırır və bu işi təmənnasız edir: “Mən bu missiyanı ona görə üzərimə götürdüm ki, burada uşaqların fransız dilinə, elmə çox böyük marağı var idi. Bildiyimiz kimi, kənd yerlərində müəllim yanına getmək o qədər də əlçatan deyil. Mən özüm onlara təklif etdim ki, istəsəniz dərsdən sonra biz bir müddət fransız dili ilə məşğul ola bilərik. Təbii ki, bu, bir növ ənənə formasında davam edir. Vaxtilə mənə də kömək edən müəllimlərim olub”.
Mollaisaqlı kənd tam orta məktəbinin X sinif şagirdi Leyla Qasımlı deyir ki, Qumral müəllimə onlar üçün yad deyil, dost-doğma kimidir, səmimidir.
Digər məktəbli Aysel Gidayevanın sözlərinə görə, Qumral müəlliməni tanıdıqdan sonra şagirdlərdə bu peşəyə sevgi daha da artıb.
Məktəblilərlə hazırlıq prosesi axşam saatlarına qədər davam edir. Bununla da gününə yekun vuran Qumral Məmmədli növbəti gün dan yeri sökülmədən, sükutun pozulması ilə oyanmaq üçün otağına çəkilir. Şagirdlərin ikinci evi olan məktəbdə uşaqların doğmasına çevrilən müəllimləri onlara səbirlə elm öyrətməklə yanaşı, mənəvi zənginliyi də aşılayır. Müəllimlik elə bir peşədir ki, onun əməyinin qarşılığını heç cür ödəmək mümkün deyil. Müəllimin əməyinin qarşılığı yalnız sevgidir. Bu sevgi isə heç vaxt azalmır, əksinə, çətin həyat yollarında biz onların dəyərini daha yaxşı anlamağa başlayırıq.
Bölmənin digər xəbərləri
