20 Yanvar şəhidlərinin xatirəsi bölgələrdə də yad olunur
İmişli-Neftçala-Salyan-Biləsuvar, 20 yanvar, Mahir Babayev, AZƏRTAC
İmişlidə 20 Yanvar faciəsinin 26-cı ildönümü ilə bağlı anım tədbiri keçirilib.
AZƏRTAC xəbər verir ki, rayonun rəhbərliyi, ictimaiyyət nümayəndələri, təhsil, səhiyyə, mədəniyyət işçiləri, hüquq mühafizə orqanlarının əməkdaşları, hərbçilər Şəhidlər xiyabanına gələrək ölkəmizin azadlığı və bütövlüyü uğrunda şəhid olan Vətən oğullarının məzarlarını ziyarət edib, abidə önünə tər qərənfillər düzüblər.
Mərasimdə çıxış edən İmişli Rayon İcra Hakimiyyətinin başçısı Vilyam Hacıyev 26 il əvvəl sovet hərbi birləşmələrinin Bakıda törətdiyi qırğınlardan, günahsız insanlara qarşı edilən vəhşiliklərdən danışıb. Qanlı Yanvar gecəsində qəhrəman vətən oğlanlarının göstərdiyi qəhrəmanlıqlar konkret faktlarla yada salınıb. Bildirilib ki, 20 Yanvar faciəsi ölkəmizin tarixinə həm də qəhrəmanlıq salnaməsi kimi daxil olub.
Anım mərasimi İmişli rayonundakı Heydər Əliyev Mərkəzində bədii hissə ilə davam edib.
X X X
Ümumxalq Hüzn Günü Neftçalada da bir sıra tədbirlərlə qeyd olunub.
AZƏRTAC xəbər verir ki, rayonun icra strukturları, hüquq mühafizə orqanlarının rəhbərləri, yüzlərlə sadə neftçalalı 20 Yanvar faciəsi qurbanlarının abidəsini ziyarət edib. Abidə önünə əklil və gül dəstələri qoyulub, azadlıq mübarizləri ehtiramla anılıb.
Mərasimdə bildirilib ki, Bakıdakı qırğınlardan sonra sovet hərb maşını xalqın iradəsini qırmaq üçün bölgələrdə, o cümlədən Neftçalada da çirkin əməllərini həyata keçirib. Rayonun mərkəzində şütüyən tanklarla təkcə insanlar deyil, binalar da güllə atəşinə tutulurdu. Elə o günlərdə Neftçala da azadlıq, müstəqillik uğrunda üç şəhid verdi. Əbülfəz Cəfərov, Nurəddin Ağahüseynov, Şəmsəddin Orucov şəhidlik zirvəsinə ucaldı, 10 neftçalalı əlil oldu.
20 Yanvar əlilləri və şəhid ailələri ilə keçirilən görüşdə rayon icra hakimiyyətinin başçısı İsmayıl Vəliyev Prezident İlham Əliyevin bu kateqoriyadan olan insanlara xüsusi qayğı göstərdiyini diqqətə çatdırıb.
Əlillər və şəhid ailələrinin üzvləri xatirələrindən danışıb, onlara göstərilən qayğıya görə dövlətimizin başçısına minnətdarlıqlarını bildiriblər.
Anım mərasimi məktəblilərin 20 Yanvara həsr etdikləri rəsm əsərlərinin nümayişi və ədəbi-bədii kompozisiya ilə davam edib.
X X X
Salyanda 20 Yanvar faciəsinin anım mərasimi şəhidlərin xatirə kompleksindən başlanıb.
AZƏRTAC xəbər verir ki, abidə önünə əklil və gül dəstələri qoyulduqdan sonra rayonun icra strukturlarının rəhbərləri, ictimaiyyət nümayəndələri və yüzlərlə salyanlı 20 Yanvarda şəhid olan və Salyan qəbiristanlığında uyuyan Elçin İmanovun məzarını da ziyarət edib.
Daha sonra ərazi bütövlüyümüz uğrunda canından keçən salyanlı şəhidlərin uyuduğu şəhidlər xiyabanına baş çəkilib.
Xalqımızın azadlıq və istiqlal mücadiləsində əsas mərhələlərdən biri olan 20 Yanvar qürur tariximiz kimi salyanlıların yaddaşına da əbədi həkk olunub. Zaman keçdikcə bu faciə qəhrəmanlıq simvoluna çevrilir və müstəqillik tariximizin bir parçası olan şəhidlərin əziz xatirəsi xalqımızın qəlbində əbədiləşir.
X X X
20 Yanvar faciəsinin 26-cı ildönümü Biləsuvarda da böyük izdihamla qeyd olunub.
AZƏRTAC xəbər verir ki, rayonun icra strukturlarının rəhbərləri, minlərlə biləsuvarlı Vətən uğrunda canından keçən qəhrəman oğul və qızların xatirəsinə ucaldılan 20 Yanvar abidəsini və Şəhidlər xiyabanını ziyarət edib. İstiqlal tariximizin qəhrəmanlarının abidəsi önünə gül dəstələri düzülüb, xatirələri ehtiramla yad olunub. Uşaqların əl işləri və rəsm əsərlərindən ibarət "20 Yanvar balacaların gözü ilə” adlı sərgi maraqla qarşılanıb.
Anım mərasimində çıxış edən rayon icra hakimiyyətinin başçısı Mahir Quliyev 20 Yanvarın Azərbaycan xalqının həm hüzn, həm də şərəf günü olduğunu söyləyib. 1990-cı il yanvarın 19-dan 20-nə keçən gecə başda cinayətkar M.Qorbaçov olmaqla, imperiya cəlladlarının Bakıda törətdiyi qırğınları diqqətə çatdıran natiq bildirib ki, xalqımız imperiyanın hərb maşını qarşısında əyilmədi, dünyaya azadlıq əzmini nümayiş etdirdi. Qanı ilə azadlıq və müstəqillik tariximizin ilk səhifəsini yazanlar sırasında şəhidlik zirvəsinə ucalan biləsuvarlı Baba Xanmədov və Əlimərdan Hüseynov da var idi.
Mərasimdə 20 Yanvar şəhidlərinin qəhrəmanlıq yolunun xronikasını əks etdirən ədəbi-bədii kompozisiya nümayiş etdirilib.
Bölmənin digər xəbərləri
