20 Yanvar xalqımızın qəhrəmanlıq salnaməsidir
Yevlax, 20 yanvar, Tahir Ağaməmmədov, AZƏRTAC
1990-cı il yanvarın 19-dan 20-nə keçən gecə sovet imperiyasının ordusu Azərbaycan xalqına qarşı qanlı cinayət həyata keçirib. Mən bu hadisələrin, əliyalın insanlara qarşı törədilən qətliamın şahidi olmuşam.
Bu sözləri yanvarın 20-də Yevlaxdakı Şəhidlər xiyabanını ziyarətə gəlmiş rayon mərkəzi xəstəxanasının həkimi Niyaz Hüseynov AZƏRTAC-a müsahibəsində deyib. O bildirib ki, faciənin törədildiyi həmin gecə təhsil aldığı Tibb Universitetinin tələbələri ilə birgə etiraz səsini ucaldanlar arasında olub: “Tələbə yoldaşlarımla birgə əvvəlcə “Salyanski kazarma” deyilən yerdə idik. Gecə saat 12-yə yaxın sovet ordusunun əsgərləri əhaliyə atəş açmağa başladılar. Sonra tanklar Hökumət evinə doğru hərəkət etdilər. Tanklar qarşılarına çıxan hər şeyi əzib keçir, evlər, küçələr, insanlar nizamsız atəşə tutulurdu. Mən tələbə yoldaşlarımla Təcili Yardım Xəstəxanasına gəldim. Bütün mərtəbələr yaralılarla, cəsədlərlə dolu idi. Tibb Universitetinin tələbələri həmin vaxt böyük fədakarlıqlar etdilər. Biz yaralılara tibbi yardım göstərir, qanlarının kəsilməsində, cərrahiyyə stoluna çıxarılmasında, yaralarının sarınmasında kömək edirdik”.
N.Hüseynov qeyd edib ki, yanvarın 20-ni hüzn günü kimi qeyd etsək də, əslində bu gün xalqımızın qəhrəmanlıq salnaməsidir.
Bölmənin digər xəbərləri
