Astarada Vətən müharibəsi qazisi ad günündə ailə həyatı qurub – toy mərasimi el şənliyinə çevrilib VİDEO
Astara, 15 iyul, İsmayıl Cəfərli, AZƏRTAC
44 günlük Vətən müharibəsi xalqımıza Qələbə sevincini yaşatmaqla bərabər, qəhrəman oğullarımızı da bizlərə tanıtdı. Minlərlə igid oğullarımız Vətən uğrunda haqq savaşının iştirakçısı, şəhid və qazi oldu. Sonda əldə etdiyimiz möhtəşəm Qələbə Azərbaycan xalqının Vətənə necə bağlılığını, onun üçün gözünü qırpmadan canından keçməyə hazır olduğunu bir daha bütün dünyaya nümayiş etdirdi. 30 illik həsrətimizə son qoyan igidlərimiz düşməni torpaqlarımızdan qovaraq ayağından, qolundan, əlindən, gözündən oldular. Vətən müharibəsində sol gözünü itirən qazi Orxan Əlizadə də onlardan biridir.
AZƏRTAC xəbər verir ki, ötən gün Astara rayonunda qazimizin toy mərasimi keçirilib.
Qəhrəman qazimizin toyunda onun yaxınları, ailə üzvləri ilə bərabər, silahdaşları, qazilər, rayon rəsmiləri və ictimaiyyət nümayəndələri də iştirak ediblər. Qazi Orxan Əlizadənin şad günündə iştirak edən qonaqlar çıxışlarında Qələbə sevincini, bu qüruru bizə bəxş etdiyinə görə şəhidlərimizi bir daha yada salıb, Müzəffər Ali Baş Komandana, igid əsgər və zabitlərimizə, qazilərimizə, qəhrəman Azərbaycan xalqına minnətdarlıqlarını bildiriblər.
Qazi Orxanın atası Natiq Əliyev deyir ki, bu gün onun üçün həyatının ən yaddaqalan, əlamətdar günüdür: “Övladımın toyudur. Oğlum qazidir. Bu, məni qürurlandırır. Mən onunla fəxr edirəm. Allah bütün qazilərimizə cansağlığı versin, şəhidlərimizə rəhmət eləsin. Bizi qoruyan Ordumuzu Allah qorusun! Allah Ali Baş Komandanımıza, Prezidentimizə kömək olsun. Dövlətin dəstəyini hər zaman hiss edirik. Oğlumun müalicəsində bizə yaxından kömək etdilər, bu gün də edirlər. Allah onlardan razı olsun”.
Bəyin anası Püstə Əliyeva üçün də bu gün xüsusi məna kəsb edir. “Bu gün mənim oğlumun toy günü və ad günüdür. Oğlumu təbrik edirəm. Ona xoşbəxtlik arzulayıram. Çox sağ olsun dövlətimiz, hər zaman dövlət qayğısı ilə əhatə olunuruq, dövlət qazilərini tək qoymur. Bu gün də dövlət məmurları bizim bu şad günümüzə gəlib, oğlumun toyunda iştirak edirlər. Allah Prezidentimizi qorusun, diqqətini bizim üstümüzdən əsirgəmir! Çox sağ olsunlar!”, - deyə qəhrəman anası bildirib.
Mərasimdə Orxanın silahdaşları da iştirak edirdilər. Aralarında qazilər də vardı. Onlarla söhbət zamanı müharibə xatirələrindən, Qələbə sevincindən və dövlətimizin şəhid ailələrinə, qazilərə göstərdiyi diqqət və qayğıdan danışdılar. Qazilər Orxanın toy mərasiminin sanki el şənliyi kimi keçirildiyini vurğulayaraq, bunu xalqımızın öz qəhrəmanlarına necə sahib çıxdığının bir nişanəsi olduğunu söylədilər. Qeyd edək ki, Prezident İlham Əliyevin müvafiq sərəncamı ilə 2021-2025-ci illər ərzində şəhid ailələri, müharibə əlilləri və digər həssas qrupa aid olan insanların mənzillə tam təminatının həyata keçirilməsi üçün dövlət proqramı təsdiqlənib. Nəticədə bu günə kimi bu kateqoriyaya aid olan 13 mindən çox şəxs mənzil və ya fərdi evlərlə təmin edilib. Bunun təxminən 3500-ü postmüharibə dövründə verilib. Eyni zamanda, qazilərin sağlamlığının qorunması, onların müasir protezlərlə təminatı, reabilitasiya kurslarını keçməsi üçün də çox mühüm addımlar atılır. Bu da onların öz sağlamlıqlarını bərpa etməsinə töhfə verir. Sosial-psixoloji xidmətlərin göstərilməsini də bu işlərə əlavə etmək olar. Həmçinin ölkəmizin Birinci vitse-prezidenti Mehriban Əliyevanın rəhbərlik etdiyi Heydər Əliyev Fondu tərəfindən də bu kateqoriyadan olan insanlarla bağlı müxtəlif layihələr həyata keçirilir. Bütün bunlar onu deməyə əsas verir ki, şəhid ailələri, qazilər və digər həssas qrupa aid insanlara diqqət və qayğının göstərilməsi, onların mənzil-məişət şəraitinin yaxşılaşdırılması kimi məsələlər dövlətimizin yürütdüyü siyasətin prioritet istiqamətlərindən biridir.
Söhbət etdiyimiz Vətən müharibəsi qazisi 2-ci qrup əlildir. O da digər yoldaşları kimi, Orxana xoşbəxtlik arzulayıb: “Mən qardaşıma cansağlığı və xoşbəxtlik arzulayıram. Bu gün onun şad günüdür. Ümumiyyətlə, Allah şəhidlərimizə rəhmət eləsin, qazilərimizə isə şəfa versin. Ağır vəziyyətdə olan qardaşlarımız da “YAŞAT” Fondunun dəstəyi ilə xaricdə müalicə alırlar, inşallah, onlar da sağlamlıqlarına qovuşarlar. Çox şükür bu günə ki torpaqlarımız düşməndən təmizləndi. Var olsun dövlətimiz, həmişə yanımızdadır, diqqət və qayğısı üzərimizdədir. Ali Baş Komandanımıza minnətdarıq, bizi qiymətləndirib, cəmiyyətimiz də biz qazilərə böyük hörmət var. Yaşasın qüdrətli Azərbaycanımız!”.
“Arzu edirəm ki, bütün subay qazilərə belə toy qismət olsun”, - deyə Vətən müharibəsi qazisi Rüfət Əsədullayev isə Orxanın Vətən müharibəsindəki qəhrəmanlığından danışıb: “Orxan qardaşımız döyüşlərdə aktiv iştirak edib. Xüsusən də Xocavənd uğrunda döyüşlərdə. Düşmən tərəfindən atılan mərmi nəticəsində ağır dərəcəli qəlpə yaraları alıb. Dövlətimizin diqqət və qayğısı ilə müalicə olundu, şükür Allaha, bu gün ayaq üstədir, ailəsinin və onu sevənlərin yanındadır”.
Toyda iştirak edən bir başqa qazi isə Möhnət Səmədovdur. Deyir ki, Orxanın toyunda iştirak etmək onun borcu idi. Çünki hər ikisi döyüşlərdə canlarından keçməyə hazır idilər, təki Vətən sağ olsun! “Şəhidlərimiz bizim qürur mənbəyimizdir. Allah onlara rəhmət eləsin, qazilərimizə isə cansağlığı versin. Bu gün qazi toyu olduğuna görə bunu vurğulamaq mənə şərəfdir. Mən Azərbaycan vətəndaşı kimi döyüşlərdə yaralanmışam, dövlətimdən də razıyam. Şükürlər olsun ki, indi ayaq üstəyik, qardaşımızın şad günündə iştirak edirik”, - deyə o bildirib.
Qeyd edək ki, bu gün ailə həyatı quran qazi Orxan Natiq oğlu Əlizadə 1995-ci il iyulun 14-də Astara rayonunun Pensər kəndində anadan olub. 2000-2012-ci illərdə Pensər kənd 1 saylı tam orta məktəbində orta təhsil alıb. 2013-2015-ci illərdə Naxçıvanda yerləşən "N" saylı hərbi hissədə xidmət edib. Vətən müharibəsi başlayanda könüllü olaraq ordu sıralarına yazılan Orxan 2020-ci il sentyabrın 27-də Füzuli istiqamətində gərgin döyüşlərə atılıb. Cəbrayıl, Qubadlı və Xocavənd rayonlarının düşmən işğalından azad olunmasında iştirak edib. Oktyabrın 3-də Xocavənddə yanına düşən mərmi nəticəsində ağır yaralanıb. Sol gözünü itirən qəhrəmanımız Ali Baş Komandanın sərəncamları ilə "Cəsur döyüşçü", "Füzulinin azad olunmasına görə", "Qubadlının azad olunmasına görə" və "Cəbrayılın azad olunmasına görə" medalları ilə təltif olunub.
Bölmənin digər xəbərləri
