Son tunc - Erkən dəmir dövrünə aid olduğu ehtimal edilən 20-yə yaxın kurqan aşkarlanıb

Ağstafa, 11 oktyabr, R.Novruzoğlu, AZƏRTAC

“Keşikçidağ” Dövlət Tarix-Mədəniyyət Qoruğu yarandığı gündən indiyədək mütəmadi olaraq elmi-tədqiqat və arxeoloji qazıntı işləri aparılır. Buna baxmayaraq, qoruq ərazisində yerləşən daş dövrü üzrə abidələrin hələ də geniş tədqiqinə ehtiyac duyulur. Son qazıntılarda Keşikçidağ mağaralar kompleksinin yerləşdiyi Ceyrançöldə Paleolit, Aşel dövrünə aid əmək alətləri, çapacaqlar, daş məmulatları aşkarlanıb.

AZƏRTAC xəbər verir ki, bu tədqiqatların davamı olaraq Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin təşəbbüsü ilə rusiyalı alimlər Keşikçidağ mağaralar kompleksinin yerləşdiyi Ceyrançöl ərazisində elmi-tədqiqat və kəşfiyyat işləri aparmaq məqsədilə buraya ezam olunublar.

Rusiya Federasiyasının Sankt-Peterburq vilayətində yerləşən Rusiya Elmlər Akademiyasının Maddi-Mədəniyyət Tarixi İnstitutunun tarix elmləri namizədi Oçerednoy Aleksandr Konstantinoviç, tarix elmləri doktoru Sergey Aleksandroviç Kulakov, Novosibirsk şəhərində yerləşən Rusiya Elmlər Akademiyasının Sibir bölməsinin Arxeologiya və Etnoqrafiya İnstitutunun tarix elmləri doktoru Anoikin Anton Aleksandroviç, Rusiya Elmlər Akademiyasının Dağıstan Mərkəzinin Geologiya İnstitutunun geoloqu, elmlər namizədi İdris İdrisov Abdulbutayeviç AMEA-nın Arxeologiya, Etnoqrafiya və Antropologiya İnstitutunun daş dövrü üzrə mütəxəssisi tarix üzrə fəlsəfə doktoru Azad Zeynalovun iştirakı ilə qoruq ərazisində yerləşən yaşayış düşərgələrində olublar. Onları Ceyrançöl ərazisinə cəlb edən əsas məqsədlərdən biri də Ceyrançölün Mingəçevir və Dmanisi arealında yerləşdiyini nəzərə alaraq burada yaşayış düşərgələrinin mövcudluğudur.

Arxeoloq və geoloqların birgə fəaliyyət apardığı işlər əsasən Candargöl istiqamətindən şərqə doğru davam etdirilir. Buna səbəb sovetlər dönəmində bu ərazilərdə geoloqlar tərəfindən yaşı minilliklərə dayanan heyvan sümüklərinin aşkarlanmasıdır. Lakin həmin sümüklər tam tədqiq edilməyib.

Rusiyalı alimlərin apardığı bu ekspedisiyanın yekunlarına dair "Keşikçidağ" Dövlət Tarix-Mədəniyyət Qoruğuna məxsus informasiya mərkəzində dəyirmi masa təşkil olunub. Dəyirmi masada qoruq ərazisində aparılmış arxeoloji qazıntılar zamanı aşkarlanmış maddi-mədəniyyət nümunələri, qoruğa məxsus çap məhsulları, qoruq ərazisindən fraqmentləşmiş halda əldə olunmuş küplərin bərpası prosesi nümayiş olunub, qoruq əməkdaşları tərəfindən məlumat verilib.

Sonda ekspedisiyanın apardığı araşdırmalarda əldə olunan daş məmulatlar sərgilənib, həmçinin iki yeni yaşayış düşərgəsi və Son tunc - Erkən dəmir dövrünə aid olduğu ehtimal edilən 20-yə yaxın kurqanın aşkarlandığı bildirilib.