“Şuşa İli” çərçivəsində Bursada azərbaycanlı rəssamın fərdi rəsm sərgisi açılıb VİDEO
Bursa, 24 oktyabr, AZƏRTAC
Türkiyənin Bursa vilayətində azərbaycanlı rəssam Təhminə Əlinin fərdi rəsm sərgisi açılıb.
AZƏRTAC xəbər verir ki, Azərbaycanda fəaliyyət göstərən İctimai-Siyasi Proseslər Beynəlxalq Araşdırmalar Mərkəzi (İSBAM) tərəfindən də təşkil olun sərgi “Şuşa İli”nə həsr olunub.
Oktyabrın 24-də sərginin rəsmi açılış mərasimi keçirilib.
Əvvəlcə Azərbaycan və Türkiyənin Dövlət himnləri səsləndirilib, şəhidlərin əziz xatirəsi bir dəqiqəlik sükutla yad edilib.
Açılış mərasimində çıxış edən Türkiyənin İnternet Jurnalistləri Federasiyasının rəhbəri Mesut Demir, İSBAM sədri Samir Adıgözəlli, Azərbaycanın İstanbuldakı baş konsulluğunun konsulu Zaur Allahverdizadə, Bursa Böyükşəhər Bələdiyyəsinin sədri Alinur Aktaş, AK Partinin Bursadan millət vəkili Osman Mesten tədbirin Türkiyə-Azərbaycan qardaşlığı üçün böyük əhəmiyyət kəsb etdiyini bildiriblər.
Qeyd edilib ki, Müzəffər Ali Baş Komandan İlham Əliyevin liderliyi ilə Azərbaycan 44 gün davam edən Vətən müharibəsi nəticəsində otuz ilə yaxın işğal altında olan tarixi torpaqlarını azad etdi. Bu tarixi Qələbəyə gedən yolda Türkiyə böyük siyasi və mənəvi dəstəyi ilə daim qardaş Azərbaycanın yanında oldu. Şuşa Bəyannaməsi isə iki qardaş ölkə arasındakı tarixi əlaqələri strateji müttəfiqlik səviyyəsinə yüksəltdi. Bu da iki qardaş ölkə arasındakı ayrılmaz bağların ən böyük nümunələrindən biridir.
Çıxışçılar işğaldan azad edilən ərazilərdə Azərbaycan dövlətinin apardığı bərpa-yenidənqurma işlərini xüsusi vurğulayıblar.
Tədbir çərçivəsində Mesut Demirə “Zəfər Media” medalı, Alinur Aktaş və Bursa valisi Yakup Canbolata isə Türkiyə-Azərbaycan qardaşlığına verdiyi töhfələrə görə xüsusi plaketlər təqdim edilib.
Sonra rəssamın Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın həkk olunduqları “Azərbaycan-Türkiyə-dostluq” əsəri Türkiyə Prezidentinə təqdim edilmək məqsədilə ölkənin dövlət rəsmilərinə təhvil verilib.
Üç gün davam edəcək sərgidə rəssamın ümumilikdə 35 əsəri nümayiş etdirilir.
AZƏRTAC-ın xüsusi müxbiri
Bursa
Bölmənin digər xəbərləri
