SİYASƏT
27 Sentyabr - Anım Günü ilə əlaqədar Berlində tədbir keçirilib
Berlin, 29 sentyabr, AZƏRTAC
27 sentyabr - Anım Günü ilə əlaqədar Azərbaycanın Almaniyadakı səfirliyi tərəfindən Berlində tədbir təşkil olunub. Tədbirdə Almaniyanın elmi və mədəni dairələrinin nümayəndələri, Almaniyada yaşayan Azərbaycan, türk və digər icmaların üzvləri iştirak ediblər.
AZƏRTAC xəbər verir ki, əvvəlcə Azərbaycanın ərazi bütövlüyünün bərpası uğrunda mübarizədə canlarını qurban vermiş şəhidlərin xatirəsi bir dəqiqəlik sükutla yad olunub.
Azərbaycanın Almaniyadakı səfiri Nəsimi Ağayev Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun 30 il işğal altında qalmış əraziləri azad etməsindən danışıb. Bildirilib ki, Azərbaycan Ordusu həm 44 günlük Vətən müharibəsi, həm də builki antiterror tədbirləri zamanı böyük rəşadət və qəhrəmanlıq göstərib.
Diplomat, eyni zamanda, Azərbaycan Ordusunun hərbi əməliyyatlar zamanı yüksək humanistlik nümayiş etdirdiyini, heç vaxt mülki şəxsləri və ya onların yaşayış yerlərini hədəf almadığını vurğulayıb. O, Prezident İlham Əliyevin Azərbaycan xalqına 20 sentyabr tarixli müraciətində Qarabağ ermənilərinə vəd olunan təminatlardan danışıb. Onlara Azərbaycanın Konstitusiyası və beynəlxalq öhdəlikləri əsasında bütün hüquq və azadlıqların, o cümlədən dini, milli, təhsil, bələdiyyə və digər hüquqların veriləcəyini, eləcə də təhlükəsizliyinin təmin olunacağını vurğulayıb. N.Ağayev Azərbaycanın tez bir zamanda Ermənistanla sülh sazişi imzalamaq niyyətində və əzmində olduğunu ifadə edib.
Sonra çıxış edən Almaniya Bundestaqının keçmiş üzvü Aksel Fişer Azərbaycan ilə Ermənistan arasında tezliklə sülhün əldə olunmasının, xalqların barışmasının vacibliyindən danışıb. Bildirib ki, tarixdə bir-biri ilə uzun müddət müharibə aparan xalqlar çox olub, lakin bütün münaqişələrin sonunda sülhün əldə edilməsi labüddür. O, bu əsnada alman və fransız xalqları arasında münasibətlərin normallaşmasını, əldə olunan sülhü nümunə gətirib.
Çıxışlardan sonra Almaniyada yaşayan və fəaliyyət göstərən gənc azərbaycanlı musiqiçi - pianoçu Nərmin Nəcəflinin ifasında Anım Gününə həsr olunmuş konsert baş tutub. Konsertdə Azərbaycan və Avropa bəstəkarlarının əsərləri səsləndirilib.
Sonda ehsan süfrəsi açılıb.
Vüqar Seyidov
AZƏRTAC-ın xüsusi müxbiri
Berlin