İyul döyüşlərindən 4 il ötür: artilleriya atəşinə tutulan Dondar Quşçu kəndindən REPORTAJ VİDEO
Tovuz, 12 iyul, Ruslan Novruzoğlu, AZƏRTAC
İyul döyüşlərindən dörd il ötür. 2020-ci il iyulun 12-də dövlət sərhədinin Tovuz istiqamətində təxribat törədən düşmən ordumuzla bacarmayacağını görüb, dinc əhalini, mülki evləri, tikililəri hədəf aldı. Döyüşlərin davam etdiyi beş gün ərzində Tovuzun bir neçə yaşayış məntəqəsi, infrastruktur obyektləri ağır artilleriya atəşinə tutuldu. Düşmən bununla əhalini qorxuya salmaq istəyirdi. Amma istəyinə nail ola bilmədi. Azərbaycan Ordusu düşmənə sarsıdıcı zərbə endirərək, onun mənfur niyyətinin qarşısını aldı.
AZƏRTAC xəbər verir ki, artilleriya zərbəsinə məruz qalan yaşayış məntəqələrindən biri də rayonun Dondar Quşçu kəndidir. Həmin günlərdə təkcə Dondar Quşçu kəndinə 40-dan çox top mərmisi düşmüş, evlərə və infrastruktura ciddi ziyan dəymişdi.
Sakinlər evsiz qalsa da, kəndlərini tərk etmədilər, orduya dəstəyi bir an belə dayandırmadılar. Kənd sakini İkram Vəliyev həmin günləri belə xatırlayır: “Mən həmin gün həyətimdə iş görürdüm. Biz heç vaxt ermənilərin atəşkəsi pozmasını ciddiyə almamışıq. Bilirdik ki, törədilən təxribatın cavabı hərbçilərimiz tərəfindən misli ilə verilir. Hər zaman dövlətimizə, ordumuza inanmışıq. Həmin gün evlərə ciddi ziyan dəysə də, kəndimizdən çıxmadıq. Hamının bir amalı var idi: “Biz qələbə qazanmalıyıq!”. Bu döyüşlərdən sonra Vətən müharibəsi başladı və Qarabağımız azad olundu”.
Dondar Quşçu kəndində evləri dağılan sakinlər qısa müddətdə yeni mənzillərlə təmin edildilər və indi onlar həmin evlərdə xoşbəxt yaşayırlar. “Həmin gün çox yaxşı yadımda qalıb. Kəndimiz ermənilər tərəfindən atəşə məruz qalanda mən xəstə olduğum üçün xəstəxanaya gedirdim. Yolda bizə dedilər ki, evinizə mərmi düşüb, dağılıb. Ev dağılsa da, kənddən çıxmadıq, qohumumun evində qaldıq. Evimiz də dövlətimiz tərəfindən tez bir müddətdə yenidən tikildi, bərpa olundu”, - deyə döyüşlər zamanı evi dağılan Tellarə Əliyeva o günləri yada salır.
İyul döyüşləri başlayanda sakinlərin təsərrüfatda qızğın iş dövrü idi. Sahələrdə kartof yığılır, mal-qaraya ot tədarükü görülür, suvarma işləri aparılırdı. Düşmənin məqsədi isə insanların dinc həyatını pozmaq, onların təsərrüfat işlərinə mane olmaq idi. Buna baxmayaraq, sakinlər döyüş gedən günlərdə belə bir an da olsun, təsərrüfat işlərindən qalmadılar.
Qeyd edək ki, Tovuz döyüşləri zamanı müdafiənin ön xəttində olan general-mayor Polad Həşimov və polkovnik İlqar Mirzəyev də daxil olmaqla, 12 hərbçimiz şəhidlik zirvəsinə ucaldı, 1 mülki şəxs həlak oldu. Bu döyüşlərdə düşmənin 100-dən çox hərbçisi məhv edildi, çox sayda döyüş texnikası sıradan çıxarıldı.
Beləliklə, düşmən dövlət sərhədinin Tovuz istiqamətində təxribata əl atsa da, niyyəti baş tutmadı, xalqın gözünü qorxuda bilmədi. Tovuz döyüşlərindən sonra isə Azərbaycan Ordusu Qarabağda tarix yazdı, düşmənin belini qırdı, Zəfər qazandı. Bu Zəfər Tovuzun Qaraqayasından başladı, Şuşada, Xankəndidə bayrağımızın dalğalanması ilə başa çatdı.
Bölmənin digər xəbərləri
