31 mart - Azərbaycanlıların soyqırımı gününə həsr olunmuş elmi-nəzəri konfrans keçirilmişdir
Bakı, 29 mart (AZƏRTAC). Azərbaycan Milli Elmlər Akademiyasının (AMEA) İnsan Hüquqları İnstitutunda 31 mart - Azərbaycanlıların soyqırımı gününə həsr olunmuş “1918-1920-ci illərdə ermənilərin azərbaycanlılara qarşı həyata keçirdikləri soyqırımları Fövqəladə Təhqiqat Komissiyasının sənədlərində” mövzusunda elmi-nəzəri konfrans keçirilmişdir.
Tanınmış alim və mütəxəssislərin iştirakı ilə təşkil olunan tədbirdə AMEA-nın İnsan Hüquqları İnstitutunun direktoru, Milli Məclisin deputatı Aytən Mustafayeva 1918-1920-ci illərdə ermənilərin xalqımıza qarşı törətdikləri qanlı cinayətlərdən danışmışdır. Qeyd olunmuşdur ki, qəsbkar düşmən zaman-zaman dəhşətli faciələr törətmiş, günahsız qanlar axıtmışdır.
1918-1920-ci illərdə erməni hərbi birləşmələrinin türk-müsəlman əhalisinə qarşı həyata keçirdikləri soyqırım faktlarının Fövqəladə Təhqiqat Komissiyasının sənədlərində arxivlərdə saxlanılmasının əhəmiyyətini vurğulayan A.Mustafayeva xatırlatmışdır ki, Komissiya 1918-ci il iyulun 15-də Azərbaycan Milli Hökuməti tərəfindən Gəncədə yaradılmışdır. Komissiyanın məqsədi erməni silahlı terror qrupları tərəfindən 1918-ci ildə Bakıda, Şamaxıda, Qubada, ölkəmizin digər bölgələrində həyata keçirilən soyqırımlarla bağlı təhqiqat sənədlərinin toplanması, eləcə də həmin sənədlərin müxtəlif dillərdə (ingilis, fransız, rus, ərəb və s.) nəşr edilməsi, azərbaycanlıların başına gətirilən faciələr barədə dünya xalqlarına məlumatların çatdırılması olmuşdur.
A.Mustafayeva ulu öndər Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” Fərmanının əhəmiyyətini vurğulamışdır.
Mənfur ermənilərin bu gün də qəsbkarlıq siyasəti apardıqlarını bildirən İnsan Hüquqları İnstitutunun direktoru demişdir ki, bu barədə dünya ictimaiyyətinə daha ətraflı və dolğun informasiyalar, məlumatlar çatdırılmalıdır.
Milli Arxiv İdarəsinin rəisi, professor Ataxan Paşayev Fövqəladə Təhqiqat Komissiyasının fəaliyyəti haqqında məlumat vermişdir.
Bildirilmişdir ki, qeyd edilən Komissiyanın sənədlərinin xeyli hissəsi ermənilər tərəfindən Bakıda, Şamaxıda və digər şəhər və bölgələrimizdə törədilmiş soyqırımlara həsr edilmişdir. Bakıdakı qırğınlar zamanı qətlə yetirilən azərbaycanlıların sayı 11 mindən artıq olmuşdur.
Digər çıxış edənlər də 31 mart - Azərbaycanlıların soyqırımı gününün xalqımızın qan yaddaşından heç zaman silinməyəcəyini vurğulamışlar.
Sonra mövzu ilə bağlı müzakirələr aparılmışdır.
######
Bölmənin digər xəbərləri
