İmişlinin Tuqay meşələrində yulğun ağacları 50 faizə qədər artıb VİDEO
İmişli, 18 noyabr, Aydın Yavərzadə AZƏRTAC
Kür-Araz ovalığında yerləşən İmişli rayonu ərazisi həm də adı qırmızı kitaba düşən yulğun ağaclarının məskənidir. Həmin ərazidə Yulğun ağacları əsasən Tuqay meşələrində daha geniş yayılıb. Son illərdə isə bu ağacların ciddi şəkildə artımı müşahidə edilir.
AZƏRTAC-ın bölgə müxbiri xəbər verir ki, İmişlidə yulğun ağaclarına əsasən Araz və Kür çayı sahillərində daha çox rast gəlinir. Son illərdə isə bu ağacların artması çay kənarlarında əsrarəngiz gözəllik yaratmaqla yanaşı, oksigen mənbəyi olaraq böyük potensial mənbəyinə çevrilib.
Bioloq Gülüstan Quliyeva deyir ki, yulğun bitkisinin adı latınca tamarix olaraq bilinir və bir çox əhəmiyyətləri var: “Yulğun ağacı yulğunkimilər fəsiləsinə aid olan bitkidir və dünyada bir çox növü var. Onların arasında florida, koç, 4 erkəkcikli, 8 erkəkcikli, meyr yulğunu daha çox yayılan növlərdir. Qafqaz ərazisində yulğunun 10 növü bitir ki, bunun da 7-si Azərbaycanın payına düşür. Yulğun bitkisi əsasən düzənlik, dağətəyi, yarımsəhra və bozqır tipli ərazilərdə yayılır. Bu bitki quraqlığa davamlı olması ilə yanaşı, çay kənarı ərazilərində də yayılır. Yulğun növləri bir-birinə çox bənzəsə də onları fərqləndirən cəhətlər də var ki, bunu da gövdədən, rəng və yarpaq quruluşundan ayırd etmək olur. Məsələn, 4 erkəkcikli yulğunun gövdəsi boz və qara-boz rəng olur, yarpaqları isə kiçik və pulcuq şəkillidir. Meyr yulğununda isə yarpaqlar lanseft şəkilli olmaqla uzunsovdur. Yulğun bitkisi çox əhəmiyyətli olmaqla yanaşı, həm də gözəl çiçəkləri olan ağacdır. Bu ağaclar aprel-may ayında ağ və çəhrayı rəngli çiçəklər açır, daha sonra toxum verir ki, bu da yulğun ağaclarını çiliklə bərabər həm də toxumla artırmağa imkan verir. Yulğunun ən üstün cəhəti isə digər bitkilərdən daha çox oksigen verməsidir. Eyni zamanda, yulğunluq ərazinin havası, hətta onun tüstüsü ağciyər və tənəffüs yolları üçün müalicəvi əhəmiyyətə malikdir”.
Uzun illərdən bəri meşəbəyi çalışan Qəhrəman Ələkbərov son illər ərzində İmişli rayonu ərazisində yulğun ağaclarının artmasının müşahidə edildiyini bildirir: “Azərbaycan ərazisində yulğun bitkisinin ən çox yayıldığı ərazi Naxçıvan Muxtar Respublikası, Abşeron yarımadası və Kür-Araz ovalığının payına düşür. İmişli ərazisində isə yulğun ağacları Araz çayı boyunca yerləşən 2000 hektardan, Kür çayı boyunca isə 2500 hektardan çox olan Tuqay meşələrində daha çox yer alır. Hündürlüyü 6 metrədək olan bu ağaclar əsasən təbii bərpa yolu ilə çoxalır. Bu ağaclar təbiətdəki bir çox canlılar üçün sığınacaq rolu da oynayır. Eyni zamanda, yulğunluq sahəsinin havası çox müalicəvi əhəmiyyətə malikdir”.
Bölmənin digər xəbərləri
