Təbii fəlakətlərin ziyan vurduğu meşələr necə bərpa olunur? Zaqataladan reportaj VİDEO
Zaqatala, 16 dekabr, AZƏRTAC
Yaz-yay aylarında meşə və dağlıq ərazilərdə baş verən yanğınlar on hektarlarla yaşıllıqların məhvinə səbəb olur. Bununla yanaşı, təbii fəlakətlər və qasırğalar nəticəsində də ekologiyaya xeyli ziyan dəyir.
AZƏRTAC-ın əməkdaşı xəbər verir ki, şimal-qərb bölgəsinə daxil olan Zaqatala və Balakən rayonlarında bu ilin yaz-yay aylarında sel daşqınları, qasırğalar ekologiyaya xeyli ziyan vurub. Bəs ekoloji tarazlığı bərpa etmək üçün müvafiq qurumlar tərəfindən hansı tədbirlər görülür?
Əməkdaşımız üç il əvvəl Zaqatalanın yüksək dağlıq ərazilərində baş verən yanğın sahələrində, eləcə də qasırğa nəticəsində ciddi ziyan dəyən ərazilərdə olub, həyata keçirilən meşəbərpa işləri ilə maraqlanıb.
Yanğın və təbii fəlakətlərin baş verməsi gözlənilməz olduğundan onun qarşısının alınması da olduqca çətin və uzun vaxt tələb edir. Bir neçə il əvvəl Zaqatalada yüksək dağlıq ərazidə yanğının söndürülməsi bir həftə davam etmişdi. Müvafiq qurumlarla yanaşı, yerli sakinlər də bu təbii fəlakətin aradan qaldırılmasına könüllü qatılmışdı.
Bu ilin yaz-yay aylarında isə rayonun Əliabad ərazisində leysan, dolu ilə müşayiət olunun tufan və qasırğa təsərrüfatlara xeyli zərər vurmuş, hətta uzun illərin əkin sahələrini yararsız vəziyyətə salmışdı.
8 saylı Regional Meşə Bərpa Mərkəzinin direktor əvəzi Həbib Poladovun sözlərinə görə, bu ilin iyun ayında güclü tufan-qasırğa nəticəsində Əliabad meşə fondu sahələrində müxtəlif növ ağaclar kökündən aşmış, əraziyə ciddi ziyan dəymişdi.
“Aşan ağaclar mərkəzin əməkdaşları tərəfindən ardıcıllıqla qeydiyyata alınıb və oduncaq ehtiyatı hesablanıb. Həmin oduncaq rayonda olan məktəblərə, bağçalara, təhsil müəssisələrinə, tibb mərkəzlərinə, ehtiyacı olan şəhid ailələrinə, qazilərə və əhaliyə tərəfimizdən dəyəri əvvəldən ödənilmək şərti ilə verilir” - deyən Həbib Poladov əlavə edib ki, yaxın vaxtlarda yıxılmış, aşmış bu ağaclar götürüldükdən sonra həmin ərazilərdə yeni meşə sahələrinin, əkinlərin aparılması nəzərdə tutulur.
Direktor əvəzi bildirib ki, noyabr ayında “Dünya ağac günü” ilə əlaqədar rayonun Qanıx çayı vadisində yerləşən meşə zolağında 3 hektara yaxın yeni meşəlik salınıb, ətrafı mühafizə olunub.
Rayonda, eləcə də bölgədə ekoloji tarazlığın bərpasında xüsusi tingliklərin təşkili və onların fəaliyyətinin tənzimlənməsi daim nəzarətdə saxlanılır. Bu işdə tingçilik təsərrüfatlarının rolu danılmazdır. Mütəxəssislər bildirirlər ki, hazırda tinglik təsərrüfatında yaz-yay aylarında səpilən toxumlardan yetişən tinglərin yeri dəyişdirilir, yaxşı inkişaf etməsi, böyüməsi üçün geniş əraziyə əkilir. Əvvəlki illərin tingləri isə sahələrə, meşə zolaqlarına köçürülməsi üçün çıxarılaraq hazır vəziyyətə gətirilir.
Bu barədə bizə regional mərkəzin əkin mühəndisi Elçin Gözəlov məlumat verib: “Yaz mövsümündə 22 hektar ərazidə 84 minə yaxın müxtəlif cins ağac tingləri əkmişik. Hazırda payız əkin kampaniyası davam edir. Noyabrın 1-dən indiyədək 29 hektar sahədə 70 minə yaxın meşə cinslərindən ibarət tinglər əkilib. 17,5 hektar sahədə 1900-ə yaxın palıd toxumu səpini aparılıb. Bununla yanaşı, seyrək meşə hissələrində, xırda talalarda 90 hektar sahədə meşəbərpa işləri aparılıb”.
Elçin Gözəlov yaz əkini üçün də indidən işlərin görüldüyünü, tinglərin yetişdirildiyini diqqətə çatdırıb. Bildirib ki, gücləndirilmiş tədbirlər nəticəsində son iki ildə rayon ərazisinin meşə və dağlıq ərazilərində heç bir yanğın hadisəsi qeydə alınmayıb. Qarşıdakı aylarda da meşə zolaqlarında təbii fəlakətin yaratdığı fəsadlar aradan qaldırılacaq və həmin zolaqlarda iqlimə uyğun tinglər əkiləcək.
Yeri gəlmişkən, Zaqatala və Balakən rayonlarında yol kənarlarında, həmçinin park və xiyabanlarda salınan yaşıllıqlar, əkilən tinglər bu təsərrüfatda yetişdirilir və ödənişsiz olaraq təmin edilir.
Bölmənin digər xəbərləri
