Bakıda "Dildə, fikirdə, əməldə birlik – Türk dünyasının gələcəyi" mövzusunda panel iclas keçirilib – YENİLƏNİB VİDEO
Bakı, 3 may, AZƏRTAC
Bakıda Türkiyə Prezident Administrasiyasının Kommunikasiya İdarəsinin təşkilatçılığı ilə "Dildə, fikirdə, əməldə birlik – Türk dünyasının gələcəyi" mövzusunda panel iclas keçirilib.
AZƏRTAC xəbər verir ki, Heydər Əliyev Mərkəzində keçirilən 3 May – Türkçülük Gününə həsr edilən tədbirdə Türk Dövlətləri Təşkilatına (TDT) üzv və müşahidəçi ölkələrin nümayəndələri iştirak ediblər.
Tədbirin Türk dünyasının ortaq dəyərləri və gələcək inkişaf istiqamətləri üzrə müzakirə aparmaq məqsədilə təşkil edilib.
Panel iclası Azərbaycan və Türkiyə respublikalarının dövlət himnlərinin səsləndirilməsi, hər iki ölkənin şəhidlərinin əziz xatirəsinin yad edilməsi ilə başlayıb.
Sonra Türk dünyasının ortaq dəyərlərinin əks olunduğu videoçarx nümayiş etdirilib.
Türkiyənin Azərbaycandakı Səfirliyinin media müşaviri Alptekin Cihangir İşbilir çıxış edərək paneldən əvvəl Türkiyə və Azərbaycanın ictimaiyyət nümayəndələrinin və media təmsilçilərinin iştirakı ilə iki dəyirmi masa keçirildiyini diqqətə çatdırıb.
Qeyri-Hökumət Təşkilatlarına Dövlət Dəstəyi Agentliyinin İcraçı direktoru Aygün Əliyeva Türk dünyasını təkcə ortaq tarixin deyil, həm də ümumi mənəvi dəyərlərin birləşdirdiyini deyib: “Bizim üçün hər bir türk yurdu eyni taleyi bölüşdüyümüz bir ana nəfəsi qədər doğmadır. Zaman-zaman türk xalqlarını bir-birindən ayrı salınmağa çalışsalar da, onlar tarixin bütün sınaqlarından üzüağ çıxmağı bacarıblar. Çünki biz həm qılıncı, həm qələmi, həm də könlü ilə tarix yazan millətik. Nə xoş ki, bu gün Türk dünyası artıq bir xəyal deyil, reallıqdır, tarixi missiyadır. Bu, gələcək nəsillərə ötürməli olduğumuz müqəddəs bir mirasdır. Biz hər birimiz bu mirası qoruyaraq mədəniyyətimizi, dilimizi, adət-ənənəmizi, birliyimizi və gücümüzü yaşatmalıyıq”.
Türkiyənin ölkəmizdəki səfiri Birol Akgün Türk Dövlətləri Təşkilatının (TDT), sadəcə, regional platforma deyil, eyni zamanda, həmrəyliyin təzahürü, beynəlxalq aləmdə əməkdaşlığı və birliyi təşviq edən platforma olduğunu bildirib.
"Siyasi həmrəylik, enerji təhlükəsizliyi, elm və mədəni diplomatiya sahəsində ortaq əməkdaşlıq üzərində çalışırıq. Biz sülhün, qarşılıqlı etimadın bərqərar olduğu bölgə qurmağı hədəfləyirik. Elm və texnologiyadan tutmuş enerji əməkdaşlığına qədər birgə strategiyalar, proqramlar və layihələr hazırlamaq labüddür və biz bunu dəstəkləyirik. Mədəni diplomatiya sahəsində fəaliyyətlərin dərinləşdirilməsi təkcə Türk dünyasında deyil, beynəlxalq ictimaiyyətdə də müsbət türk obrazının formalaşmasına səbəb olacaq", - deyə B.Akgün qeyd edib.
İclasa videoformatda qoşulan Türkiyə Prezidenti Administrasiyasının Kommunikasiya İdarəsinin rəhbəri Fahrettin Altun isə Türk dünyasının ortaq gələcəyi ilə bağlı fikir mübadiləsi aparmaq məqsədilə keçirilən paneli son dərəcə mənalı hesab etdiyini və xeyirli olacağına ümidvarlığını ifadə edib.
O, fikirlərinə belə davam edib: "Türk Dövlətləri Təşkilatı türk dünyasını siyasi, iqtisadi, mədəni və sosial sahələrdə bir araya gətirərək bölgəmizin ən güclü əməkdaşlıq strukturlarından birinə çevrilib. Türkiyə bu strukturu daha da gücləndirmək və ortaq dəyərlər əsasında irəliləyişini davam etdirmək üçün ilk gündən böyük səylər göstərir.
Mərhum İsmayıl Qaspıralının irəli sürdüyü “Dildə, fikirdə, əməldə Birlik” şüarı keçmişdən bu günə Türk dünyasının şüarı olub.
“Dildə birlik”: Bu, ünsiyyət və anlaşmamızı gücləndirmək və ümumi dilin daşıyıcısı olduğu dəyərləri nəsillər boyu yaşatmaq deməkdir.
“Fikirdə birlik": Türk Dünyasının ortaq baxışını qlobal sınaqlar və çağırışlar qarşısında ortaq strateji düşüncə ilə formalaşdırmaq deməkdir.
“Əməldə birlik”: Məqsədimiz iqtisadi inkişafdan təhsil islahatlarına, rəqəmsal transformasiyadan gənclərin bilik və bacarıqlarının inkişafına qədər hər sahədə konkret layihələrlə irəliləməkdir.
Türk dünyası ölkələri olaraq ortaq tarix və mədəniyyətimizdən aldığımız güclə bu gün əməkdaşlığımızı daha da yüksək səviyyəyə qaldırmaq məsuliyyətini daşıyırıq. Bu məsuliyyəti dərk edərək ümid edirəm ki, panelimiz intellektual biliklərimizi zənginləşdirməklə yanaşı, konkret addımlarla irəliləməyimizi təmin edən ilham mənbəyi olacaq. Türk dünyasının qədim mərkəzlərindən biri olan Bakıda keçirdiyimiz toplantının dəyərli natiqlərinə və tədbirin təşkilində əməyi keçən dəyərli həmkarlarıma təşəkkürümü bildirirəm. Ümid edirəm ki, bu görüş Türk millətinin və Türk dünyasının gələcəyi və firavanlığı üçün faydalı olacaq".
Panel iclasda iştirak edən TDT-yə üzv və müşahidəçi ölkələrin nümayəndələri Türk dünyası ölkələri arasında əməkdaşlığın daha da gücləndirilməsi yollarını müzakirə edib, əlaqələrin dərinləşdirilməsi naminə təkliflər irəli sürüblər.
Tədbirin sonunda bədii hissə nümayiş etdirilib.
Bölmənin digər xəbərləri
