Səfir: Çin və Azərbaycan qlobal idarəetmədə islahatların aparılmasında və onun təkmilləşdirilməsində əsas qüvvədir VİDEO
Bakı, 8 sentyabr, AZƏRTAC
Çin Xalq Respublikasının Sədri Si Cinpin tərəfindən irəli sürülən təşəbbüs (Qlobal İdarəetmə Təşəbbüsü - red.) müasir dünyanın ümumbəşəri istəklərinə və təxirəsalınmaz ehtiyaclarına cavab verir. O, irəli sürüldükdən dərhal sonra müxtəlif ölkələrin liderləri və beynəlxalq təşkilatların rəhbərləri tərəfindən bəyənilib və dəstəklənib. Prezident İlham Əliyev “ŞƏT plyus” formatdakı çıxışında qeyd edib ki, Azərbaycan beynəlxalq sülhün, təhlükəsizliyin və inkişafın təşviqi məqsədilə Çin tərəfindən irəli sürülən Qlobal İnkişaf, Qlobal Təhlükəsizlik və Qlobal Sivilizasiya təşəbbüslərini fəal dəstəkləyib.
AZƏRTAC xəbər verir ki, bu barədə Çin Xalq Respublikasının Azərbaycan Respublikasındakı səfiri Lu Mey Prezident İlham Əliyevin Çinə son səfərinin yekunlarına həsr olunmuş brifinqdə bildirib.
“Bu il ümumdünya antifaşist müharibəsində Qələbənin 80 illiyi və BMT-nin yaranmasının 80 illiyi qeyd olunur. Bununla əlaqədar olaraq Sədr Si Cinpin qlobal idarəçiliyi gücləndirmək və təkmilləşdirmək məqsədilə Çin müdrikliyini və Çin versiyasını tətbiq edərək Qlobal İdarəetmə Təşəbbüsünü təntənəli şəkildə irəli sürüb.
Mövcud beynəlxalq vəziyyət dəyişikliklər və sarsıntılara məruz qalır, bu da BMT-yə və çoxtərəfliliyə mənfi təsir göstərir, qlobal idarəetmə defisiti isə artmaqda davam edir. Sədr Si Cinpin qeyd edilən təşəbbüsü irəli sürərək “Hansı qlobal idarəetmə sistemi qurulmalıdır?” və “Qlobal idarəetmədə necə islahat edilməli və o, təkmilləşdirilməlidir? suallarına diqqət çəkib”, - deyə diplomat bildirib.
Onun sözlərinə görə, hər biri öz istiqaməti olan dörd qlobal təşəbbüs paralel olaraq həyata keçirilir. Onlar müxtəlif tərəflərdən qeyri-sabit olan dünyaya əminlik və müəyyənlik gətirərək və Çinin beynəlxalq məsələlərdə məsuliyyətini və rolunu nümayiş etdirərək bəşəriyyət üçün ortaq gələcəyi olan bir cəmiyyətin qurulmasında strateji rəhbərliyi təmin edir.
“Azərbaycan, həmçinin dövlətlərin suveren bərabərliyi, BMT Nizamnaməsinə və beynəlxalq hüquqa hörmət əsasında beynəlxalq münasibətlərin yaxşılaşdırılmasına yönəlmiş mühüm və vaxtında olan tədbir kimi Çin Xalq Respublikası Sədrinin təqdim etdiyi Qlobal İdarəetmə Təşəbbüsünü alqışlayır. Hər iki dövlət - Çin və Azərbaycan - Qlobal Cənub ölkələridir və qlobal idarəetmədə islahatların aparılması və onun təkmilləşdirilməsinin əsas qüvvəsidir”, - deyə səfir vurğulayıb.
Bölmənin digər xəbərləri
