FHN-in Akademiyasında gənc kursantların hərbi andiçmə və məzunların buraxılış mərasimi keçirilib VİDEO
Bakı, 10 oktyabr, Göyçək Mahmudlu, AZƏRTAC
Oktyabrın 10-da Fövqəladə Hallar Nazirliyinin (FHN) Akademiyasında gənc kursantların hərbi andiçmə və məzunların təntənəli buraxılış mərasimi olub.
AZƏRTAC xəbər verir ki, mərasimdə fövqəladə hallar naziri general-polkovnik Kəmaləddin Heydərov, nazir müavinləri və nazirliyin məsul vəzifəli şəxsləri, FHN yanında İctimai şuranın üzvləri, FHN Akademiyasının müəllim və professor heyəti, kursantları və onların valideynləri, ictimaiyyət nümayəndələri iştirak ediblər.
Əvvəlcə, mərasim iştirakçıları FHN-in Akademiyasının həyətində ucaldılmış Ümummilli Lider Heydər Əliyevin abidəsi önünə gül dəstələri düzərək, Ulu Öndərin əziz xatirəsini ehtiramla yad ediblər.
Azərbaycanın Dövlət Himni səsləndirildikdən sonra ölkəmizin müstəqilliyi, ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Sonra FHN-in Akademiyasının bayrağı təntənəli surətdə meydana gətirilib.
Daha sonra FHN-in Akademiyasına yeni qəbul olmuş kursantlar hərbi and içiblər.
Mərasimdə çıxış edən fövqəladə hallar naziri general-polkovnik Kəmaləddin Heydərov kursantları, məzunları və onların valideynlərini təbrik edib. Nazir builki mərasimin ölkəmizdə yaranmış yeni ruh yüksəkliyi şəraitində keçirildiyini diqqətə çatdıraraq deyib: "Bu il xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən 44 günlük Vətən müharibəsində əldə etdiyimiz misilsiz Qələbənin 5 ili tamam olur. Bu Qələbə Azərbaycan dövlətinin qüdrətini, rəşadətli Azərbaycan Ordusunun gücünü, Müzəffər Ali Baş Komandan, Prezident İlham Əliyevin müdrikliyini və sarsılmaz qətiyyətini bir daha bütün dünyaya göstərdi. Müasir dünyada hər bir ölkənin uğurlu gələcəyi həmin ölkədə təhsilin səviyyəsi ilə müəyyən edilir. Ümummilli Lider Heydər Əliyev ölkəmizə rəhbərlik etdiyi dövrdə təhsilin inkişafı üçün ciddi addımlar atıb. Bu gün Heydər Əliyev siyasətinin davamçısı, Prezident İlham Əliyev təhsilin müasirləşməsinə və inkişafına böyük diqqət yetirir. Dövlətimizin başçısının təşəbbüsü ilə xüsusi dövlət proqramları həyata keçirilir və aparılan təhsil islahatları uğurlu nəticələr verir. FHN Akademiyasında ötən müddət ərzində maddi-texniki bazanın yaradılması, kursantların tədris və təliminin, sosial-məişət şəraitinin müasir tələblərə uyğun təmin edilməsi istiqamətində işlər görülüb. Ötən dövrdə akademiyadan 1272 nəfər məzun olub. Onlar FHN-in ayrı-ayrı qurumlarında xidmətlərini davam etdirirlər. Akademiyada son illərdə beynəlxalq əməkdaşlıq əlaqələrinin qurulması, elmi-pedaqoji kadr hazırlığı, aktual məsələlərə dair layihələrin hazırlanması məqsədilə beynəlxalq simpoziumlar, konfranslar, seminarlar, görüşlər və digər elmi-mədəni tədbirlər təşkil olunur. Bu il akademiyaya qəbul olmuş kursantları və akademiyanı müvəffəqiyyətlə bitirərək zabit rütbəsi ilə FHN-in qurumlarında çalışacaq bütün məzunları ürəkdən təbrik edir, onlara müstəqil Azərbaycanın gələcəyi naminə öz fəaliyyətlərində uğurlar arzulayıram".
Akademiyanın rəisi general-mayor Baba Salayev çıxış edərək bildirib ki, bu tədris ilində Dövlət İmtahan Mərkəzi tərəfindən keçirilən imtahanlarda yüksək bal toplayaraq akademiyanın əyani şöbəsinin bakalavriat səviyyəsinə 100, qiyabi şöbəsinə 19, magistratura şöbəsinə isə 15 nəfər qəbul olub. 97 nəfər bakalavriat, 15 nəfər isə magistratura səviyyəsində təhsilini müvəffəqiyyətlə başa vurub. 5 magistrant təhsilini yüksək səviyyədə başa vurduğuna görə nazirlik tərəfindən böyük etimad göstərilərək akademiyanın əməkdaşları sırasına qoşulub.
FHN-in Akademiyasına qəbul olan kursantların valideynləri adından çıxış edən Eldəniz Tağıyev məzun və kursantları təbrik edərək onlara uğurlar arzulayıb. Kursantların akademiyada yüksək səviyyədə təhsil alacağına, məzunların isə müstəqil və suveren dövlətimiz qarşısında öz vəzifə borclarını layiqincə yerinə yetirəcəklərinə əminliyini ifadə edib.
Daha sonra mərasim FHN-in müvafiq əmri ilə “leytenant” hərbi və xüsusi rütbələri verilmiş məzunlara diplomların təqdim olunması ilə davam etdirilib.
Akademiyanı əla qiymətlərlə bitirmiş məzun leytenant Əli Əliyev akademiyanın məzunlarının buraxılış rəmzi olan xatirə lövhəsini “Yaş kötüyü”nə vuraraq məzun yoldaşları adından and içib.
Məzunlar akademiyanın bayrağı ilə vidalaşaraq onu IV kurs kursantlarına təhvil veriblər.
FHN-in Akademiyasının bayrağı altında şəxsi heyətin təntənəli keçidi ilə mərasim başa çatıb.
Akademiyanın məzunu Adil Səfərovun atası İmaməddin Səfərov AZƏRTAC-ın müxbiri ilə sevincini bölüşüb: "Adil akademiyanı qırmızı diplomla bitirdi. Çox qürurlu və fərəhliyəm. Bu illər ərzində onlar üçün çox yaxşı şərait yaradıldı. Akademiyanı bitirən kursantlara gələcək fəaliyyətlərində uğurlar, yeni daxil olanlara isə əzm və zehin açıqlığı arzulayıram".
Bölmənin digər xəbərləri
