Abbas Abbasov: Burundi, Ruanda və Konqo Demokratik Respublikasının nümayəndələri ilə sıx əməkdaşlıq qurmuşuq VİDEO
Bakı, 31 oktyabr, AZƏRTAC
Son bir ildə fəaliyyətimizi əhəmiyyətli dərəcədə genişləndirmişik. Dekolonizasiya prosesinin vacib hissəsi olan reparasiya məsələləri çərçivəsində artıq beynəlxalq layihələr həyata keçiririk və konfranslar təşkil edirik.
Belçika müstəmləkəçiliyinə gəldikdə isə qeyd etmək istərdim ki, XVIII-XX əsrlərdə bu ölkənin kolonial siyasəti zamanı törədilən insanlığa qarşı qəddar cinayətlər barədə dünya ictimaiyyəti kifayət qədər məlumatlıdır. Lakin aidiyyəti beynəlxalq təşkilatlar bu məsələlərə zəruri reaksiyanı göstərmir, reparasiya və kompensasiya mövzularını müzakirə etmirlər.
Biz beynəlxalq qeyri-hökumət təşkilatı olaraq dekolonizasiya prosesində mühüm rol oynayan bir təşkilat kimi, bu mövzunu beynəlxalq təşkilatların gündəliyinə gətirməyə çalışırıq. Əminik ki, yaxın illərdə reparasiya və kompensasiya məsələlərində beynəlxalq reaksiya artacaq və dünya ictimaiyyəti Konqo Demokratik Respublikası, Burundi və Ruandaya qarşı ədalətli mövqe nümayiş etdirəcək.
AZƏRTAC xəbər verir ki, bu sözləri jurnalistlərə açıqlamasında Bakı Təşəbbüs Qrupunun (BTQ) icraçı direktoru Abbas Abbasov söyləyib.
O bildirib ki, Burundi, Ruanda və Konqo Demokratik Respublikasının nümayəndələri, eləcə də oradakı qeyri-hökumət təşkilatları ilə sıx əməkdaşlıq qurulur. Onlar mövzunu kompensasiya və reparasiya əsasında irəli sürür və beynəlxalq təşkilatlardan, həmçinin aidiyyəti ölkələrdən kompensasiyalar tələb edirlər. BTQ isə bu istiqamətdə beynəlxalq hüquq çərçivəsində onlara dəstək göstərməyə çalışacaq.
"Bakı Təşəbbüs Qrupu əvvəlcə Fransanın dənizaşırı əraziləri ilə əməkdaşlığa başlamışdı. Bu əməkdaşlıq həmin ərazilərin nümayəndələrinin səlahiyyətli qərarına əsaslanaraq qurulmuşdu. Daha sonra Niderlandın və digər ölkələrin müstəmləkəçiliyi dövründən qalmış ərazilərlə əməkdaşlığa başladıq. Hazırda bu işləri Belçika müstəmləkələri ilə davam etdiririk. Qeyd etmək istərdik ki, Bakı Təşəbbüs Qrupu adətən müəyyən bir ölkə üzrə fəaliyyət göstərmir. Biz yalnız müstəmləkəçilikdən təsirlənmiş ərazilərin müraciətlərini araşdırır, qiymətləndirir və əməkdaşlığa başlayırıq. Gələcəkdə belə müraciətlər daxil olduqda, tərəfimizdən araşdırılacaq və müvafiq əməkdaşlıqlar qurulacaq", - deyə A.Abbasov vurğulayıb.
Bölmənin digər xəbərləri
