Panel sessiya: Mədəniyyət və Hüquq VİDEO
Bakı, 10 dekabr, AZƏRTAC
Dekabrın 10-da Mədəniyyət Nazirliyinin təşkilatçılığı ilə Heydər Əliyev Mərkəzində "Mədəniyyət və Hüquq: Müasir çağırışlar" adlı elmi-praktik forumu çərçivəsində "Mədəniyyət və Hüquq" adlı panel keçirilib.
AZƏRTAC xəbər verir ki, forumun moderatoru Azərbaycan Respublikası Vəkillər Kollegiyasının Biznes Hüququ Komitəsinin sədri Nazlı Əhmədova olub.
Paneldə Azərbaycan Respublikası Milli Məclisinin Hüquq Siyasəti və Dövlət Quruculuğu komitəsinin sədri, hüquq elmləri üzrə fəlsəfə doktoru Əli Hüseynli, Azərbaycanda Atatürk Mərkəzinin direktoru, akademik Nizami Cəfərov, Azərbaycan Respublikası Milli Məclisinin Hüquq Siyasəti və Dövlət Quruculuğu və Müdafiə, Təhlükəsizlik və Korrupsiya ilə Mübarizə komitələrinin üzvü Erkin Qədirli, Musiqişünas, sənətşünaslıq üzrə fəlsəfə doktoru Nigar Axundova, kulturoloq, tarix elmləri doktoru, professor, Azərbaycan Diplomatik Akademiyasının Hüquq fakültəsinin dekan müavini, hüquq üzrə fəlsəfə doktoru Cavid Qədirov, hüquqşünas, tədqiqatçı Emil Məcidov çıxış ediblər.
Çıxışlarda panel iştirakçıları mədəniyyətin hüquq və dövlət sistemi kontekstindəki rolunu müxtəlif aspektlərdən qiymətləndiriblər. Onlar vurğulayıblar ki, mədəniyyət yalnız bir incəsənət və ya irs sahəsi kimi deyil, həm də hüquq sisteminin və dövlət idarəçiliyinin formalaşmasında, vətəndaş cəmiyyətinin inkişafında mühüm rol oynayır. Panel iştirakçıları, həmçinin Azərbaycan mədəniyyətinin qorunması, onun milli dəyərlər çərçivəsində saxlanması və qlobal çağırışlar fonunda beynəlxalq arenada tanıdılması məsələlərinə diqqət çəkiblər.
Hüquq və mədəniyyətin qarşılıqlı təsiri mövzusu geniş müzakirə olunub. Mədəniyyətin hüquqi normativlər və dövlət siyasəti ilə inteqrasiyası, mədəni irsin qorunması üçün hüquqi mexanizmlərin tətbiqi, eləcə də hüquqi çərçivədə mədəniyyət sahəsində strateji qərarların verilməsi məsələləri çıxışlarda əsas yer tutub.
Panel iştirakçıları mədəniyyətin diplomatiya və strateji əməkdaşlıq sahəsindəki əhəmiyyətini vurğulayıblar. Onlar qeyd ediblər ki, mədəniyyət yumşaq güc rolunu oynayaraq ölkənin beynəlxalq imicini formalaşdırır, iki və çoxtərəfli əməkdaşlıq çərçivəsində Azərbaycanın tanıdılmasına xidmət edir və qlobal miqyasda ölkəmizin nüfuzunu artırır. Bu baxımdan mədəniyyət yalnız milli dəyərlərin qorunması üçün deyil, həm də xarici siyasət və beynəlxalq əlaqələrin gücləndirilməsi üçün strateji resurs kimi dəyərləndirilib.
Ümumilikdə çıxışlarda mədəniyyətin hüquq, dövlət idarəçiliyi, diplomatiya və beynəlxalq əməkdaşlıqla qarşılıqlı əlaqəsi, onun milli və qlobal səviyyədə qorunması və təbliği məsələləri geniş və əhatəli şəkildə müzakirə olunub.
Bölmənin digər xəbərləri
