AzMİU-da Memar Əcəmi Naxçıvani adına xüsusi təqaüd təsis olunub VİDEO
Bakı, 25 iyun, AZƏRTAC
Azərbaycan Memarlıq və İnşaat Universitetində (AzMİU) Memar Əcəmi Naxçıvani adına xüsusi təqaüd təsis edilib.
Universitetin sosial məsələlər və ictimaiyyətlə əlaqələr üzrə prorektoru Orxan Naqdiyev AZƏRTAC-a müsahibəsində bildirib ki, 2025-2026-cı tədris ili AzMİU üçün mühüm nailiyyətlər, beynəlxalq əməkdaşlıq və genişmiqyaslı tədbirlərlə yadda qalan uğurlu bir il olub. O qeyd edib ki, tədris ilinin sonuna yaxın universitet təhsil, elm və ictimai fəaliyyət istiqamətlərində əldə etdiyi nəticələri uğurla yekunlaşdırır.
Prorektor vurğulayıb ki, Azərbaycan Respublikası Prezidentinin Sərəncamı ilə 2026-cı ilin “Memarlıq və Şəhərsalma İli” elan olunması, eləcə də görkəmli memar Əcəmi Naxçıvaninin anadan olmasının 900 illiyinin qeyd edilməsi universitetin fəaliyyətində xüsusi yer tutur. Bununla əlaqədar universitetdə elmi, maarifləndirici və mədəni tədbirləri əhatə edən geniş tədbirlər planı hazırlanaraq icrasına başlanılıb.
Orxan Naqdiyev bildirib ki, AzMİU 2026-cı ildə ölkəmizdə keçirilən Ümumdünya Şəhərsalma Forumunun 13-cü Sessiyası tədbirlərində də fəal iştirak edib. Azərbaycan Şəhərsalma Kampaniyası, Bakı Şəhərsalma Həftəsi və forumun əsas sessiyaları çərçivəsində universitet tərəfindən müxtəlif formatlarda tədbirlər təşkil olunub, professor-müəllim heyəti və tələbələr beynəlxalq müzakirələrdə yaxından iştirak ediblər.
Onun sözlərinə görə, Memar Əcəmi Naxçıvaninin 900 illik yubileyi münasibətilə universitetdə silsilə tədbirlər keçirilir və bu fəaliyyətlərin 2026-cı ilin sonunadək, həmçinin növbəti tədris ilində də davam etdirilməsi nəzərdə tutulur.
Prorektor qeyd edib ki, yubiley münasibətilə ilk dəfə olaraq memarlıq ixtisası üzrə təhsil alan tələbələr üçün Memar Əcəmi Naxçıvani adına xüsusi təqaüd təsis olunub. Hazırda yüksək akademik göstəriciləri ilə seçilən iki tələbə bu təqaüdün ilk sahibləridir.
Orxan Naqdiyev əlavə edib ki, bu il universiteti təxminən 2500 tələbə bitirir. “Məzun günü” proqramı rəsmi və əyləncəli hissələrdən ibarət olacaq. Tədbirdə dövlət qurumlarının nümayəndələri, ictimai xadimlər və digər fəxri qonaqlar iştirak edəcəklər. Təhsil və ictimai fəaliyyət sahəsində fərqlənən məzunlar mükafatlandırılacaq.
Bölmənin digər xəbərləri
