Bakı, 1 iyul, AZƏRTAC

Azərbaycan Memarlıq və İnşaat Universitetinin (AzMİU) beynəlxalq elmi əməkdaşlığının genişləndirilməsi, reytinqlərdə mövqeyinin möhkəmləndirilməsi, elmi tədqiqatların keyfiyyətinin artırılması və innovasiya ekosisteminin inkişafı ali təhsil müəssisəsinin prioritet istiqamətləri sırasında yer alır. AzMİU-nun elmi işlər üzrə prorektoru professor Nigar Aslanova AZƏRTAC-a müsahibəsində xarici universitetlər və elmi mərkəzlərlə birgə layihələrin həyata keçirilməsi, “Scopus” və “Web of Science” indeksli jurnallarda məqalələrin sayının artırılması, yeni elmi laboratoriyaların yaradılması, startapların dəstəklənməsi və gənc tədqiqatçıların beynəlxalq elmi mühitə inteqrasiyası istiqamətində görülən işlərdən danışıb. Onunla müsahibəni təqdim edirik.

-Universitetin beynəlxalq elmi əməkdaşlıq imkanları nələri əhatə edir?

- Beynəlxalq elmi əməkdaşlıq dedikdə, ilk növbədə, beynəlxalq elmi mərkəzlərlə əlaqələrin qurulması, xarici alimlərlə birgə tədqiqatların aparılması, həmin tədqiqatların nəticələrinin “Scopus” və “Web of Science” indeksli nəşrlərdə dərc olunması, beynəlxalq elmi layihələrdə iştirak, doktorantların xarici ölkələrdə elmi-tədqiqat laboratoriyalarında staj keçməsi, eləcə də müxtəlif texnopark və laboratoriyalardan birgə istifadə nəzərdə tutulur. Bu məqsədlə universitetdə infrastruktur yenilənib. Müasir laboratoriyalar və elmi mərkəzlər yaradılıb. Bu sıraya İnformasiya təhlükəsizliyi və kibertəhlükəsizlik laboratoriyası, Zəlzələyə davamlılıq üzrə elmi-tədqiqat mərkəzi və digər yeni strukturlar daxildir.

Universitetin elmi potensialının artırılması istiqamətində də sistemli işlər görülür. Son illər xarici ölkələrin alimləri, eləcə də Azərbaycan Milli Elmlər Akademiyasının institutlarından tanınmış tədqiqatçılar kafedralara cəlb olunub və bu addımlar öz müsbət nəticələrini verir.

Beynəlxalq elmi tanınmanın əsas göstəricilərindən biri “Scopus” və “Web of Science” indeksli jurnallarda dərc olunan məqalələrin sayıdır. Digər universitetlərlə müqayisədə bizim universitetdə bu göstərici 1,7 təşkil edib. “Scopus” indeksli jurnallarda universitet alimlərinin məqalələrinə edilən istinadlar ötən illə müqayisədə iki dəfə artıb. “Web of Science” indeksli jurnallarda isə bu artım üç dəfə olub. Xüsusilə “Web of Science” dünyanın ən nüfuzlu elmi bazalarından biri hesab olunduğundan bu nəticə universitet üçün mühüm göstəricidir.

Universitet mütəmadi olaraq dünya miqyasında tanınan alimləri əməkdaşlığa dəvət edir. Onlar bizim alimlərlə birgə tədqiqatlar aparır, beynəlxalq seminar və konfranslarda iştirak edirlər. Dəvət olunan alimlər gənclərin elmə cəlb olunmasına da mühüm töhfə verirlər. Onlar gənc alimlərin və doktorantların beynəlxalq elmi mərkəzlərlə əlaqələrinin qurulmasına, xarici laboratoriyalarda staj keçmələrinə, beynəlxalq elmi məqalələrinin hazırlanmasına dəstək göstərirlər. Son üç il ərzində universitetin doktorantları tərəfindən 70-ə yaxın “Scopus” indeksli məqalə çap olunub ki, bu da kifayət qədər yaxşı göstəricidir.

Beynəlxalq əməkdaşlığın mühüm istiqamətlərindən biri də birgə elmi layihələrdir. Bu il Azərbaycan–Özbəkistan beynəlxalq elmi layihələri müsabiqəsi elan olunub və ölkə üzrə maliyyələşdirilməsi nəzərdə tutulan beş layihənin hamısında universitetimizin alimləri iştirak edir.

Dünya reytinqlərində universitetlərin qiymətləndirilməsində mühüm göstəricilərdən biri də International Research Network (IRN) – Beynəlxalq Elmi Tədqiqat Şəbəkəsidir. Bu göstərici universitet alimlərinin xarici həmkarları ilə birgə hazırladıqları və “Scopus”, “Web of Science” kimi beynəlxalq bazalarda dərc olunan elmi məqalələrin sayını əks etdirir.

– Universitetin elmi fəaliyyətində prioritet istiqamətlər hansılardır?

– Universitetin prioritet istiqamətləri ilk növbədə onun adında da əks olunan memarlıq və inşaat sahələridir. Burada memarlıq, inşaat mühəndisliyi, mexanika, inşaat konstruksiyaları, ekologiya, su təchizatı və mühəndis qurğuları, risklərin idarə olunması, iqtisadiyyat və biznes istiqamətlərində elmi tədqiqatlar aparılır. Fundamental elmlər sahəsində isə fizika, kimya, riyaziyyat, informasiya texnologiyaları və mexanika mühəndisliyi üzrə güclü elmi məktəblər fəaliyyət göstərir. Yeni yaradılmış İnformasiya təhlükəsizliyi və kibertəhlükəsizlik laboratoriyası da universitetin müasir elmi prioritetlərini əks etdirir. Laboratoriyaya Stanford Universitetinin dünyanın ən çox istinad olunan alimləri siyahısında yer alan azərbaycanlı alim rəhbərlik edir. Burada kibertəhlükəsizlik, pilotsuz uçuş aparatları və digər müasir texnologiyalar üzrə tədqiqatlar aparılır. Son keçirilən beynəlxalq konfranslarda dron texnologiyalarının tikinti sahəsində tətbiqi ilə bağlı maraqlı layihələr də müzakirə olunub. Universitetdə ictimai elmlər və əcnəbi dillər istiqamətlərində də elmi fəaliyyət davam etdirilir. Ümumilikdə, elmi istiqamətlərin əhatə dairəsi kifayət qədər genişdir.

– Startap və innovasiya layihələri necə dəstəklənir?

– Bu istiqamət üzrə struktur Elm və innovasiya məsələləri üzrə prorektorluq kimi fəaliyyət göstərir. Universitetdə uzun illərdir Biznes İnkubasiya Mərkəzi fəaliyyət göstərir. Son illər bu istiqamətdə işlər daha da sürətlənib. Rəqəmsal İnkişaf və Nəqliyyat Nazirliyinin dəstəyi ilə həyata keçirilən layihə çərçivəsində tələbələr startap ekosisteminə cəlb olunub, onlar üçün təlimlər təşkil edilib, mentorlarla görüşlər keçirilib, müxtəlif hakaton və müsabiqələrə hazırlıq aparılıb. Hazırda məqsəd bu istiqamətdə müəllim heyətinin də fəallığını artırmaqdır. Çünki onların elmi nəticələri və ixtiraları gələcəkdə uğurlu startaplara çevrilə bilər.

– Universitet qarşısında duran strateji hədəflər hansılardır?

– Strateji məqsəd dünya universitetləri arasında universitetin mövqeyini möhkəmləndirmək, beynəlxalq nüfuzunu artırmaq və rəqabət qabiliyyətini qorumaqdır. Bu istiqamətdə artıq mühüm nəticələr əldə olunub. Son açıqlanan “QS dünya universitetləri reytinqi”ndə universitet əvvəlki mövqeyi ilə müqayisədə 50 pillə irəliləyərək 1000+ qrupundan 900–1000 intervalına yüksəlib. Bu isə universitetin inkişaf tempinin və həyata keçirilən islahatların nəticəsidir. Bu nailiyyət universitetin beynəlxalq aləmdə tanınmasına, akkreditasiya proseslərində üstün mövqeyə malik olmasına və beynəlxalq əməkdaşlıq imkanlarının genişlənməsinə xidmət edir. Bunun üçün universitet bir tərəfdən memarlıq, inşaat və mühəndislik kimi ənənəvi güclü istiqamətlərini inkişaf etdirməli, digər tərəfdən isə informasiya texnologiyaları, ekologiya və müasir elmin digər prioritet sahələrində geri qalmamalıdır. Eyni zamanda, müasir dövrün tələblərinə uyğun yeni istiqamətlərin inkişaf etdirilməsi, innovativ yanaşmaların tətbiqi və əmək bazarının tələblərinə cavab verən yüksəkixtisaslı mütəxəssislərin hazırlanması universitetin strateji hədəfləri sırasındadır.