VIII “Ortaq türk keçmişindən ortaq türk gələcəyinə” beynəlxalq elmi simpozium işə başlayıb VİDEO
Bakı, 2 iyul, AZƏRTAC
Azərbaycan Milli Elmlər Akademiyasının (AMEA) Folklor İnstitutu, UNESCO üzrə Azərbaycan Respublikasının Milli Komissiyası, UNESCO üzrə Türkiyə Respublikasının Milli Komissiyası, Türk Mədəniyyəti və İrsi Fondu və Türkiyənin Hacettepe Universitetinin birgə təşkilatçılığı ilə iyulun 2-də Mərkəzi Elmi Kitabxanada “Türkoloji folklorşünaslıq: nəzəri konteksti, praktik yönləri və təhlil perspektivləri” mövzusunda VIII “Ortaq türk keçmişindən ortaq türk gələcəyinə” beynəlxalq elmi simpoziumu işə başlayıb.
AZƏRTAC xəbər verir ki, iki gün davam edəcək simpozium Azərbaycan Prezidentinin “Birinci Türkoloji Qurultayın 100 illik yubileyinin keçirilməsi haqqında” 2025-ci il 22 oktyabr tarixli Sərəncamının icrası çərçivəsində təşkil olunub.
Simpoziumun açılış mərasimində AMEA-nın prezidenti akademik İsa Həbibbəyli, Türk Mədəniyyəti və İrsi Fondunun prezidenti professor Aktotı Raimkulova, UNESCO üzrə Türkiyə Respublikasının Milli Komissiyasının İdarə Heyətinin sədri professor Öcal Oğuz və UNESCO üzrə Azərbaycan Respublikasının Milli Komissiyasının birinci katibi Mustafa Şabanov çıxış ediblər.
AMEA rəhbəri çıxışında bildirib ki, 1926-cı ildə Bakıda keçirilmiş Birinci Türkoloji Qurultay türkologiya elminin tarixində yeni mərhələnin əsasını qoyub. Yüz il sonra Bakı yenidən Türk dünyasının alimlərini bir araya gətirib.
Akademik qeyd edib ki, Azərbaycan Prezidenti İlham Əliyevin “Birinci Türkoloji Qurultayın 100 illik yubileyinin keçirilməsi haqqında” Sərəncamı bu sahəyə göstərilən dövlət qayğısının və siyasi iradənin bariz ifadəsidir. Qəbələdə keçirilmiş Türk Dövlətləri Təşkilatına üzv ölkələrin dövlət başçılarının 12-ci Zirvə Görüşündə qəbul olunan Bəyannamədə də Birinci Türkoloji Qurultayın 100 illik yubileyinin qeyd edilməsinin əhəmiyyəti xüsusi vurğulanıb.
İsa Həbibbəyli bildirib ki, Azərbaycanda türkologiya elmi xüsusilə müstəqillik illərində yeni inkişaf mərhələsinə qədəm qoyub.
AMEA prezidenti vurğulayıb ki, Birinci Türkoloji Qurultaydan sonra türkologiya müstəqil elmi sistem kimi formalaşıb, tarix, etnoqrafiya, dilçilik, ədəbiyyat və digər istiqamətlər bu elmin əsas sahələri kimi inkişaf edib.
Çıxışında “Türk Dünyası Həftəsi”nin tədbirlərinə də toxunan İsa Həbibbəyli bildirib ki, Heydər Əliyev Mərkəzində keçirilən açılış mərasimi türkologiya elminə göstərilən yüksək diqqətin təzahürü olub.
Akademik vurğulayıb ki, Azərbaycan Milli Elmlər Akademiyasının qarşısında duran əsas vəzifələrdən biri Birinci Türkoloji Qurultayın Azərbaycan və bütövlükdə Türk dünyası üçün tarixi əhəmiyyətini geniş ictimaiyyətə çatdırmaqdır.
Sonda İsa Həbibbəyli bu elmi simpoziumun türkologiyanın yeni inkişaf istiqamətlərinin müəyyənləşdirilməsinə, Türk dünyası alimləri arasında elmi əməkdaşlığın daha da möhkəmlənməsinə mühüm töhfə verəcək.
Simpozium iyulun 3-dək işini bölmə iclasları ilə davam etdirəcək. Tədbir çərçivəsində Azərbaycan və müxtəlif ölkələrdən olan alimlər türkoloji folklorşünaslığın nəzəri əsasları, praktik istiqamətləri, ortaq türk mədəni irsinin qorunması və tədqiqat perspektivlərinə dair məruzələrlə çıxış edəcəklər.
Bölmənin digər xəbərləri
