Xocalı sakini: Otuz ildən sonra doğma torpağımızın təmiz havasını udmaq ömrümün ən gözəl mükafatıdır VİDEO
Xocalı, 3 iyul, AZƏRTAC
Bəzən bir insanın ən böyük arzusu nə var-dövlət, nə də şöhrət olur. İnsan üçün ən ülvi, ən əlçatmaz istək doğulduğu torpağa qayıdıb, öz evində, öz ocağında yaşamaq, ömrünün qalan hissəsini ata-baba yurdunda tamamlamaqdır. Bu gün dövlətimizin qüdrəti sayəsində həmin müqəddəs arzunu gerçəyə çevirən minlərlə soydaşımızdan biri də Xocalı rayon sakini Şirinov Hikmət Rasim oğludur.
AZƏRTAC-ın bölgə müxbiri xəbər verir ki, 1967-ci ildə Xocalıda dünyaya göz açan Hikmət Şirinov Birinci Qarabağ müharibəsinin iştirakçısıdır. O, gənc yaşlarından doğma torpaqlarının müdafiəsi uğrunda döyüşlərə qatılıb, Xocalı faciəsinin ağrı-acısını yaxından yaşayıb. Doğma yurdunun işğalı ilə o da minlərlə azərbaycanlı kimi məcburi köçkün həyatının ağır yükünü çiyinlərində daşımağa məcbur olub.
Uzun illər Bakının Pirşağı qəsəbəsindəki "Qızıl qum" sanatoriyasında müvəqqəti məskunlaşan Hikmət Şirinov ailəsi ilə birlikdə dözülməz şəraitdə yaşasa da, qayıdış ümidini heç vaxt itirməyib, doğma torpaqlarına qovuşacağı günü səbirlə gözləyib.
Məcburi köçkünlük həsrətindən Təzəbinə kəndindəki yeni ocağa
Müzəffər Ordumuzun tarixi Zəfəri və Xocalının tamamilə nəzarətə götürülməsi ilə Hikmət kişinin otuz ildən artıq qəlbində bəslədiyi o böyük həsrət də sona çatdı. Dövlət tərəfindən həyata keçirilən "Böyük Qayıdış" Proqramı çərçivəsində, təxminən bir il əvvəl Hikmət Şirinov ailəsi ilə birlikdə Xocalı rayonunun yenidən qurulan Təzəbinə kəndinə köçərək, öz doğma yurduna əbədi olaraq qovuşub.
Müasir şəhərsalma standartları ilə bərpa edilən Təzəbinə kəndində Şirinovlar ailəsi də daxil olmaqla, onlarla sakin yeni mənzillərlə təmin edilib. Altı nəfərlik bu ailə üçün xüsusi dizaynla bərpa edilmiş dördotaqlı, hər bir kommunal şəraiti olan geniş mənzil onların həyatında yeni və işıqlı bir səhifənin başlanğıcı olub.
İllərlə qəlbdə yaşadılan Vətən sevgisi artıq müvəqqəti sığınacaqlarda deyil, doğma elin havasında, suyunda və torpağında öz əksini tapır. Hikmət Şirinov hazırda doğma kəndində dövlətin yaratdığı imkanlardan bəhrələnərək kiçik təsərrüfatla məşğul olur, öz halal zəhməti ilə ailəsinin rifahına, kəndin iqtisadi dirçəlişinə töhfə verir.
“Nəvələrimin Xocalı torpağında böyüməsi mənim üçün ən böyük Zəfərdir”
Doğma kəndində keçirdiyi hər anın qədrini bilən Hikmət Şirinov AZƏRTAC-ın müxbiri ilə söhbəti zamanı sevinc göz yaşlarını gizlədə bilməyib: “Məcburi köçkünlük dövründə keçirdiyimiz günlər bir film kimi gözümün önündən keçir. Sanatoriya otaqlarında hər gecə Xocalını yuxumda görürdüm. Allaha çox şükür edirəm ki, bizə bu günləri yaşatdı. Bu gün öz kəndimdə yaşamaq, hər səhər pəncərəni açıb Xocalının təmiz havasını udmaq, doğma torpaqda oyanmaq illərlə çəkdiyimiz o ağır həsrətin ən gözəl mükafatıdır. Nəvələrimin Xocalı torpağında böyüməsi mənim üçün ən böyük Zəfərdir.
Dövlətimiz bizə hər bir şəraiti yaradıb, evimiz geniş və rahatdır. İndi məqsədim təsərrüfatımı böyütmək, bu torpaqları yenidən canlandırmaqdır. Biz bura qonaq gəlməmişik, biz bura evimizə, əbədi olaraq qayıtmışıq. Bizə bu xoşbəxtliyi bəxş edən Prezidentimiz İlham Əliyevə, şəhidlərimizə və qazilərimizə ömür boyu minnətdarıq”.
Qarabağın dirçəliş salnaməsi
Bu qayıdış təkcə bir ailənin sevinc hekayəsi deyil. Bu, Azərbaycanın ərazi bütövlüyünün və suverenliyinin tam bərpasından sonra doğma yurd-yuvalarına dönən insanların qələbə, ümid və yenidənqurma salnaməsinin parlaq mücəssəməsidir. Xankəndi, Ağdərə və Xocalıda reallaşdırılan irimiqyaslı infrastruktur layihələri, bərpa-tikinti işləri bu torpaqların əbədi sahiblərinin qayıdışının bir göstəricisidir.
Hər bərpa olunan ev, hər yanan yeni ocaq, küçələrdən ucalan hər uşaq səsi Qarabağın və Şərqi Zəngəzurun sürətlə dirçəldiyini, erməni vandalizminin izlərinin silindiyini bütün dünyaya nümayiş etdirir. Hikmət Şirinovun keçdiyi həyat yolu bir daha sübut edir ki, xalqımızın Vətənə bağlılığı, torpaq sevgisi heç zaman tükənmir və sarsılmır. İllərlə davam edən həsrət, səbir və sarsılmaz inamın sonunda doğma torpağa qayıdış ən böyük zəfər, ən dəyərli uğurdur.
Bu gün Xocalıda yenidən dinc həyat var, yenidən gələcəyə böyük ümid var və ən əsası, öz tarixi yurduna başıuca, qalib xalqın nümayəndəsi kimi qayıdan insanların çöhrəsində sonsuz qürur və qələbənin sevinci var.
Müxbir - Tahir Ağaməmmədov
Bölmənin digər xəbərləri
