Kataloniya hökumətinin nümayəndəsi: Azərbaycanın bu tədbirə yüksək səviyyədə hazırlaşdığının şahidi olduq VİDEO
Barselona, 5 iyun, Aygün Həsənova, AZƏRTAC
İyunun 12-28 Bakıda keçiriləcək birinci Avropa Oyunları ilə Azərbaycan dünyanın idman tarixinə adını yazacaq. Bu yarışlarda Avropanın 49 ölkəsindən idmançılar iştirak edəcək. Dünyanın idman ölkələrindən biri kimi tanınan İspaniya Avropa Oyunlarına 216 idmançı ilə qatılacaq. Yay Olimpiya Oyunlarına 1992-ci ildə öz adlarını yazan ispanlar ilk Avropa Oyunlarının da nə qədər məsuliyyətli bir yarış olduğunu yaxşı bilirlər. Müsahiblərimizlə Avropa Oyunları, İspaniyanın bu yarışlarda iştirakı ilə bağlı danışdıq.
Kataloniya hökumətinin nümayəndəsi Cozef Mariya Perramon Bakıda keçiriləcək birinci Avropa Oyunlarını çox vacib hadisə kimi dəyərləndirib: “Barselonada 1992-ci ildə Yay Olimpiya Oyunları keçirilib. Ona görə də biz bilirik ki, bu cür idman oyunlarına hazırlaşmaq nə qədər çətindir. Bakıda olanda Azərbaycanın bu tədbirə necə yüksək səviyyədə hazırlaşdığının şahidi olduq. İnanırıq ki, Avropa Oyunları Bakıda əla təşkil ediləcək. Çünki bunun üçün sizdə potensial var. Bu oyunları layiqincə keçirməklə Azərbaycan bütün dünyaya zəngin tarixi, mədəniyyəti, incəsənəti və mətbəxini bir daha nümayiş etdirəcək”.
Azərbaycan son vaxtlar özünün qədim tarixi və mədəniyyəti ilə xarici vətəndaşların diqqətini cəlb edən bir ölkəyə çevrilib. Belə möhtəşəm tədbirlərin keçirilməsi isə respublikaya daha çox turistin gəlməsinə səbəb olacaq.
İspaniyanın Jerona əyalətinin Turizm idarəsinin marketinq üzrə direktoru Jaum Marin birinci Avropa Oyunlarının Azərbaycanı daha da yaxşı təbliğ etmək üçün gözəl fürsət olduğunu bildirdi: “Bilirik ki, sizin ölkənizin bütün sahələrdə çox böyük potensialı var. Bakı ispan turistləri üçün çox cəlbedici şəhərdir”.
Azərbaycan beynəlxalq tədbirlərə ən çox ev sahibliyi edən ölkələrdəndir. Avropanın tarixində ilk dəfə baş verəcək belə bir mühüm idman hadisəsinə ev sahibliyi etməklə isə ölkəmiz bütün dünyaya bir daha sübut edəcək ki, Azərbaycanda istənilən beynəlxalq tədbirlər yüksək səviyyədə təşkil olunur.
Kambrils şəhərinin Turizm idarəsinin nümayəndəsi Vadim Karyeqin tarixdə ilk dəfə keçiriləcək Avropa Oyunlarının məhz Bakıda keçirilməsi faktını yüksək qiymətləndirib. “Ölkəniz son dövrlər sürətlə inkişaf edib, beynəlxalq nüfuzu artıb, turistlər üçün sevimli məkana çevrilib. İnanırıq ki, birinci Avropa Oyunları Bakıda keçirilən “Eurovision” mahnı müsabiqəsi kimi çox yüksək səviyyədə təşkil ediləcək”, - deyə o qeyd edib.
Bildiyimiz kimi, Avropanın müxtəlif ölkələrində birinci Avropa Oyunları ilə bağlı çox vacib təbliğat tədbirləri təşkil edilib. Azərbaycanın birinci xanımı Mehriban Əliyevanın rəhbərliyi ilə birinci Avropa Oyunları Təşkilat Komitəsi mühüm işlər görüb.
İlk dəfə ölkəmizdə keçiriləcək bu yarışların əhəmiyyətindən danışan “Port Aventura”nın mətbuat katibi Oriol Qarsiya oyunların açılışında iştirak edəcəyini deyib: “Mən Bakıda keçiriləcək birinci Avropa Oyunları barədə çox eşitmişəm. Bu oyunlar Olimpiya Oyunları səviyyəsindədir. Oyunlarda bir çox idman növləri təqdim olunur. Bakı Olimpiya Stadionu çox möhtəşəmdir. İspaniyada bu oyunlara maraq olduqca böyükdür”.
“İspaniya kəndi” muzeyinin baş direktoru Anton Vidal Bakıda keçiriləcək Avropa Oyunlarına yüksək səviyyədə hazırlıqla bağlı çox məlumatlı olduqlarını bildirdi: “İspaniyada idmanı çox sevirlər. Onu da deyim ki, “Eurovision” mahnı müsabiqəsindən sonra Azərbaycan ispanlar üçün daha çox maraq kəsb edən ölkə olub. İndi isə Bakıdan Barselonaya və əks istiqamətə birbaşa uçuşlar var. Bu isə ispanların sizin ölkənizlə daha da yaxından tanışlığı üçün şərait yaradacaq”.
İspaniya birinci Avropa oyunlarına böyük önəm verən ölkələrdəndir. Bu ilk növbədə dünyanın mədəniyyət, turizm sənayesində önəmli mövqeyə sahib olan ispanların idmana olan sevgilərindən irəli gəlir.
İspaniya turizm şirkətinin nümayəndəsi İrina Bılik Bakıda keçiriləcək Avropa Oyunlarının qitənin tarixində çox vacib hadisə olduğunu dedi: “İspaniyada bu oyunlara böyük maraq var. Biz də oyunlarda iştirak edəcəyik. Biz həm də bu oyunları təbliğ edəcəyik. Bakı gözəl, müasir, çox cəlbedici turizm istiqaməti olan şəhərdir. İspanlar da Bakıya böyük maraq göstərir”.
Kalelya şəhərinin Turizm idarəsinin nümayəndəsi Jaum Baqo Roman birinci Avropa Oyunlarının Azərbaycanı dünyada daha da yaxşı tanıdacağını və bunun üçün əla imkan yarandığını deyib. O, oyunları izləmək üçün Azərbaycana gələcəyini bildirib.
Birinci Avropa Oyunlarının başlanmasına sayılı günlər qalır. Vaxt azaldıqca isə təkcə ölkəmizdə deyil, bütün Avropada idman həyəcanı artır. İspaniyada birinci Avropa Oyunları ilə bağlı apardığımız qısa sorğu da bir daha göstərdi ki, burada bu oyunlara maraq böyükdür və hamı səbirsizliklə bu yarışların açılışını gözləyir.
Qeyd edək ki, bir müddət əvvəl Bakı-Barselona-Bakı birbaşa aviareysi fəaliyyətə başlayıb. Uçuşlar həftədə bir dəfə təşkil edilir. “Azərbaycan Hava Yolları” QSC, “Summer Tour” və “Terramar Group” turizm şirkətlərinin təşkilatçılığı ilə bir qrup Azərbaycan jurnalisti İspaniyada olaraq bu ölkənin turizm məkanları ilə tanış olub, eyni zamanda Azərbaycanla bağlı maraqlı söhbətlər aparıblar.
Bölmənin digər xəbərləri
