İDMAN

Serbiyalı Mikeç Damir kişilər arasında 10 metr məsafəyə hava tapançası ilə atəşaçma yarışının qalibi olub [YENİLƏNİB] VİDEO

17.06.2015 [18:08]
Çap et
A⁺ A^-

Kişilər arasında 10 metr məsafəyə hava tapançası ilə atəşaçma yarışının qalibi Serbiya idmançısı Mikeç Damir olub. O, qızıl medal uğrunda Ukrayna, İtaliya, Portuqaliya, Polşa, Slovakiya, Serbiya və Türkiyə idmançıları ilə mübarizədə rəqiblərinə üstün gələrək 201.8 xalla birinciliyi təmin edib. İdmançı “Rio-2016” Yay Olimpiya Oyunlarında iştirak hüququ əldə edib.

İkinci yerə portuqaliyalı Kosta Joao, üçüncü yerə isə slovakiyalı Juraj Tuzunski çıxıblar.

M.Damir cari ildə Avropa çempionatında 10 metr məsafəyə hava tapançası ilə atəşaçma yarışında ikinci yeri tutub. 2009-cu ildə dünya çempionatında ikinci yerə çıxan serbiyalı atlet 2008-ci il Pekin və 2012-ci il London Olimpiadalarının da iştirakçısı olub.

17:08

Kişilər arasında 10 metr məsafəyə hava tapançası ilə atəşaçma yarışının final mərhələsi başlayıb.

Qızıl medal uğrunda Ukrayna, İtaliya, Portuqaliya, Polşa, Slovakiya, Serbiya və Türkiyədən 8 idmançı mübarizə aparırlar.

16:10

Sonra qaliblər mükafatlandırılıb.

Medalları atletlərə Beynəlxalq İdman Atıcılığı Federasiyasının idarə heyətinin üzvü Kevin Kilti təqdim edib.

15:43

Kişilər arasında səngər stendi yarışının qalibi Rusiya idmançısı Aleksey Alipov olub.

O, qızıl medal uğrunda slovakiyalı Erik Varqa ilə mübarizə aparıb. Rəqibindən daha üstün olan A.Alipov mümkün 15 atışın hamısını düzgün yerinə yetirərək birinciliyi təmin edib. Rusiyalı atlet çempion olmaqla yanaşı, gələn il Braziliyada keçiriləcək Yay Olimpiya Oyunlarında iştirak hüququ əldə edib.

Gümüş medalı slovakiyalı Erik Varqa, bürünc medalı isə italiyalı Covanni Pellielo qazanıblar.

A.Alipov 2004-cü il Afina və 2008-ci il Pekin Olimpiadalarının qalib olub.

15:35

Kişilər arasında 10 metr məsafəyə hava tapançası ilə atəşaçma yarışının finalçıları məlum olub.

Qızıl medal uğrunda Ukrayna, İtaliya, Portuqaliya, Polşa, Slovakiya, Serbiya və Türkiyədən 8 idmançı mübarizə aparacaq.

Azərbaycanı bu yarışda təmsil edən Rəsul Məmmədov və Ruslan Lunev təsnifat mərhələsində mübarizəni dayandırıblar.

15:25

Hazırda kişilər arasında səngər stendi yarışının finalı keçirilir.

Qızıl medal uğrunda rusiyalı Aleksey Alipov və slovakiyalı Erik Varqa mübarizə aparırlar.

Bürünc medal uğrunda görüşdə isə italiyalı Covanni Pellielo ilə böyük britaniyalı Edvard Ling qarşılaşırlar.

14:03

Kişilər arasında 10 metrdən hava tapançası ilə atəşaçma yarışı başlayıb.

Bu yarışda 33 idmançı medal uğrunda mübarizə aparır. Azərbaycanı Rəsul Məmmədov və Ruslan Lunev təmsil edirlər.

Azərbaycan idmançılarından Elvin İsmayılov və Əlmirzə Quliyev kişilər arasında səngər stendi yarışının təsnifat mərhələsində mübarizəni dayandırıblar.

13:16

Qadınlar arasında 10 metr məsafəyə hava tapançası ilə atəşaçma yarışının qalibi serbiyalı Zorana Arunoviç olub.

Səkkiz ölkədən idmançıların mübarizə apardıqları final mərhələsində Z.Arunoviç 199.5 xal qazanaraq qızıl medala sahib olub. Beləliklə o, "Rio-2016" Yay Olimpiya Oyunlarında iştirak etmək hüququ qazanıb.

Yarışda gümüş medalı ispaniyalı Sonia Franquet, bürünc mükafata isə belaruslu Viktoriya Çayka layiq görülüb.

Sonra qaliblər mükafatlandırılıb.

Qaliblərə medalları Malta Olimpiya Komitəsinin baş katibi Yozef Kassar təqdim edib.

Xatırladaq ki, Z.Arunoviç 2012-ci il London Olimpiadasında 4-cü və 7-ci yerləri tutub. O, 2010-cu ildə keçirilən dünya çempionatında isə birinci yerə layiq görülüb.

11:55

Qadınlar arasında 10 metrdən hava tapançası ilə atəşaçma yarışının finalı keçirilir.

Finalda 8 ölkənin idmançıları mübarizə aparırlar.

Azərbaycan təmsilçiləri İradə Aşumova və Nərminə Səmədova mübarizəni təsnifat mərhələsində dayandırıblar.

10:37

Qadınlar arasında 10 metrdən hava tapançası ilə atəşaçma yarışının təsnifat mərhələsi başlayıb.

Yarışda 36 idmançı mübarizə aparır. Azərbaycanı İradə Aşumova və Nərminə Səmədova təmsil edir.

10:30

İyunun 17-də Bakı Atıcılıq Mərkəzində birinci Avropa Oyunlarının atıcılıq yarışlarının ikinci günü başlayıb.

AZƏRTAC xəbər verir ki, yarışın ikinci günündə kişilər və qadınlar arasında 10 metrdən hava tapançası ilə atəşaçma, həmçinin kişilər arasında səngər stendi yarışları keçirilir.

Qadınlar arasında 10 metrdən hava tapançası ilə atəşaçma yarışında ölkəmizi İradə Aşumova və Nərminə Səmədova təmsil edir. Bu gün həmçinin Azərbaycanın iki idmançısı- Rəsul Məmmədov və Ruslan Lunev kişilər arasında 10 metrdən hava tapançası ilə atəşaçma yarışında medal uğrunda mübarizə aparacaq.

Elvin İsmayılov və Əlimirzə Quliyev isə kişilər arasında səngər stendi yarışının ikinci təsnifat günündə mübarizələrini davam etdirəcəklər.

Fərdi yarışların qalibləri birbaşa "Rio-2016" Yay Olimpiya Oyunlarında iştirak etmək hüququ qazanacaqlar.

Azərbaycanın təcrübəli atıcısı İradə Aşumova beynəlxalq yarışlarda tanınan simadır. Avropa Oyunlarının ən yaşlı iştirakçısı olan 57 yaşlı Aşumova Barselona (1998) və Lahti (2002) dünya çempionatlarının gümüş mükafatçısı, 2004-cü il Afina Olimpiya Oyunlarının isə bürünc mükafatçısıdır.