9 Aprel hadisələri Gürcüstan üçün qəhrəmanlıq tarixidir
Bakı, 10 aprel (AZƏRTAC). Gürcüstanda fəaliyyət göstərən Azərbaycanlıların Mədəniyyət Mərkəzinin (AMM) təşkilatçılığı ilə 9 Aprel - Gürcüstanın müstəqilliyinin bərpası gününə həsr olunmuş tədbir keçirilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, AMM-nin rəhbəri Fazil Həsənov 9 Aprel faciəsinin həm gürcü xalqı, həm də bu ölkədə yaşayan soydaşlarımız üçün yadda qalan tarixi hadisə olduğunu demişdir. Qeyd edilmişdir ki, 23 il əvvəl aprelin 9-da baş vermiş hadisələr azadlığa aparan yoldur. Bu faciənin qurbanlarının anılması ilə bağlı keçirilən tədbirlərdə Azərbaycan və Gürcüstan rəsmilərinin birgə iştirakı qonşu və dost ölkələrimizin eyni taleyi yaşadığını sübut edir.
Qanlı Yanvar faciəsindən danışan F.Həsənov bildirmişdir ki, bu hadisə azərbaycanlılar üçün böyük dərdlə yanaşı, bir qəhrəmanlıq səhifəsidir.
Sonra tədbir iştirakçıları bir dəqiqəlik sükutla 9 Aprel qurbanlarının xatirəsini yad etmişlər.
Azərbaycan-Gürcüstan parlamentlərarası dostluq qrupunun rəhbəri, Milli Məclisin deputatı Qənirə Paşayeva qeyd etmişdir ki, 20 Yanvar hadisələri xalqımızın müstəqillik uğrunda necə mübariz olduğunu göstərdi. Qanlı Yanvar günü birlik və həmrəyliyini nümayiş etdirən xalqımız bu gecəni faciə kimi deyil, qəhrəmanlıq tarixi kimi qəbul etmişdir. Bu hadisələr sübut etmişdir ki, xalqın iradəsini, istəyini hətta tankla belə qıra bilməzlər. 9 Aprel də Gürcüstan üçün qəhrəmanlıq tarixidir.
9 Aprel hadisələri zamanı azərbaycanlıların gürcü xalqının kədərini paylaşmaq üçün Rustavelli küçəsi boyunca yüz minlərlə qərənfillər düzdüyünü xatırladan Q.Paşayeva Azərbaycan-Gürcüstan əlaqələrinin bu gün də sürətlə inkişaf etdiyini bildirmişdir. Vurğulanmışdır ki, xalqlarımız tarixi unutmamalı, 20 Yanvar və 9 Aprel hadisələrinin törədilməsində günahkar olanlar isə təkcə tarix deyil, ədalət qarşısında da cavab verməlidirlər. Məhz o zaman şəhidlərimizin ruhu şad olacaqdır.
Milli Məclisin deputatı Etibar Hüseynov, Kvemo Kartli-Borçalı bölgəsi qubernatorunun müavini Hüseyn Yusifov, “Ziya” qəzetinin baş redaktoru Nizami Məmmədzadə, Azərbaycanın Gürcüstandakı səfirliyinin əməkdaşı Vasif Bədəlov və başqaları 9 Aprel faciəsinin sovet ordusu tərəfindən törədilmiş qanlı hadisələrdən biri olduğunu vurğulamışlar.
Sonda 9 Aprel faciəsi ilə bağlı film nümayiş olunmuşdur.
Bölmənin digər xəbərləri
