AZƏRBAYCAN KƏNDİNİN QABAQCIL NÜMAYƏNDƏLƏRİ HEYDƏR ƏLİYEVİN MƏZARINI ZİYARƏT ETMİŞLƏR
...Həmin gün Fəxri xiyabana gəlmiş zəhmət adamlarının - 25 Sosialist Əməyi Qəhrəmanının, 100 nəfərdən artıq “Lenin” və digər ordenlərin kavalerinin əksəriyyətinin adını məktəb yaşımızdan bilirik, bir çoxunun haqqında yazılmış şerlərin, bəstələnmiş nəğmələrin misraları indi də qulaqlarımızda səslənir. Bu adamlar keçmiş İttifaqın ali məclislərinin nümayəndələri olmuş, yüksək kürsülərdən çıxışlar etmişlər. İki dəfə Sosialist Əməyi Qəhrəmanı Şamama Həsənova, Sosialist Əməyi Qəhrəmanı, Qəhrəman ana Şamama Əliyeva, Sosialist Əməyi Qəhrəmanları Baba Səmədov, Əlisəfa Yaqubov, Barat Quliyev, Ərəstun Məmmədov, Fərzalı Abbasov, Əhməd Əhmədov və başqaları onların əməyini layiqincə qiymətləndirmiş respublika rəhbərinə son borcunu vermək üçün Fəxri xiyabana gəlmişlər. Ötən əsrin 90-cı illərinin əvvəllərində respublikada elə bir ab-hava var idi ki, bu adamlar layiq görüldükləri orden-medalları gəzdirməyə çəkinirdilər. Yalnız Heydər Əliyevin hakimiyyətə qayıdışından sonra əmək adamı yenidən qürur hissi keçirməyə başladı.
Füzuli rayonundakı keçmiş məşhur “1 May” kolxozunun sədri ŞAMAMA HƏSƏNOVA AZƏRTAC-ın müxbirinə demişdir: “Bu müqəddəs gündə gözəl insan, mahir təşkilatçı, kənd təsərrüfatının dərin bilicisi, Azərbaycanın dünya şöhrətli oğlunun ziyarətinə gəlmişik. O, bizim yanar çırağımız idi. Onunla bağlı o qədər xatirələrim var ki! “Haramı” düzündən kolxoz üçün 300 hektar torpaq almaq istəyirdim. Bütün mərhələlərdə rədd cavabı alandan sonra məcbur olub respublikanın rəhbərinə müraciət etdim. Məsələ həll olundu. Qısa müddətdə burada 70 hektarda üzüm, qalanında taxıl əkdirdim, 3 kilometrlikdən su çəkdirdim, hovuz, ikimərtəbəli yaraşıqlı bina tikdirdim. Bir gün eşitdim ki, rayona, özü də bizim kolxoza gəlir. Görüşən kimi dedi ki, “o” torpaqdan necə istifadə etdiyinə baxmaq istəyirəm. Baxdı, razı qaldı, qayıtdı ki, Süleyman Rüstəm haqlı deyib: “Çevirdin səhranı sən gülüstana”. Sonra yeni binanın eyvanında çörək kəsdi, çay içdi. Sözümün canı odur ki, iş adamının bütün xahişinə əməl edər, tapşırığın icrasını yoxlayardı. Heydər Əliyev həmişə bizimlədir. O, Azərbaycanın Atatürküdür. Allah rəhmət eləsin!”.
Sinələri orden-medallı adamlar hüznlə məzarın önündən keçirlər. Bu mükafatların hamısına Heydər Əliyevin əli dəyib, onları əmək qabaqcıllarının yaxasına özü sancıb. Beyləqan rayonunun Təzəkənd kəndindən Sosialist Əməyi Qəhrəmanı ƏHMƏD ƏHMƏDOV xatırlayır: “Üçüncü “Lenin” ordenini yaxama sancanda dedi ki, sən ulduzsuz qəhrəmansan. Allah qoysa, ulduz da alarsan. 1981-ci ilin fevralında qəhrəman adını alanda həmin əhvalatı özü yada saldı: “Bu da sənin “Qızıl ulduz”un”.
Bərdə rayonundan məşhur mexanizator TƏRLAN MUSAYEVA: “Heç inana bilmirəm ki, Heydər Əliyev vəfat edib. O, əbədi olaraq xalqımızın yaddaşında qalacaqdır. Əmək adamlarının hər birinə diqqət yetirirdi. Hamıya ata, qardaş idi. On il SSRİ Ali Sovetinin iclaslarında kreslomuz yanaşı olub. Nə qədər səmimi insan idi! Adamı dinləməyi, dərdini yüngülləşdirməyi bacarırdı. Naxçıvan blokadada olanda mənə zəng vurdu. Kolxoz sədri idim. Muxtar Respublikanın heyvandarları üçün ot istəyirdi. Dörd vaqon ot göndərdim. Mən onun yaxşılıqlarını heç vaxt unutmaram. Hazırda Bakıda onun verdiyi mənzildə yaşayıram. Allah rəhmət eləsin!”.
Mərasim “Abşeron” mehmanxanasında ehsan süfrəsi arxasında davam etmişdir.
Bölmənin digər xəbərləri
