ELM VƏ TƏHSİL
“Alim və ekspertlərin kitabxanası” layihəsinə başlanılır
Bakı, 20 oktyabr, AZƏRTAC
“İqtisadçı Tələbələrin Elmi Fəaliyyətinə Yardım” İctimai Birliyi və Azərbaycan Dövlət İqtisad Universitetinin (UNEC) Tələbə Elmi Cəmiyyəti “Alim və ekspertlərin kitabxanası” adlı yeni layihəyə start verir.
UNEC-dən AZƏRTAC-a bildirilib ki, layihə çərçivəsində yerli və xarici alim və ekspertlərdən tələbələr üçün kitab tövsiyələri alınacaq.
İlk olaraq Türkiyənin görkəmli iqtisadçısı Mahfi Eğilmezin tələbələr üçün tövsiyələri və fikirləri təqdim edilib. O, tələbələrə Zeynel Dinlerin "Mikroekonomi", Emeritus Gülten Kazganın "İktisadi düşünce. Politik iktisadın evrimi", Alaeddin Şenelin "Kemirgenlerden sömürgünlere insanlık tarihi" kitablarını oxumağı tövsiyə edib.
Mahfi Eğilmez bu kitablar haqqında deyib: “Professor Zeynel Dinlerin "Mikroekonomi" kitabı mikroiqtisadiyyatı bütün incəlikləri ilə ələ alan bir kitabdır. Tələbələrə olduqca faydalı olacağı qənaətindəyəm. Professor Gülten Kazganın kitabı iqtisadi düşüncə tarixini, bütün nəzəriyyələri və iqtisadçıları tarixi perspektiv çərçivəsindən izah edir. Mənim indiyə qədər oxuduğum ən yetkin iqtisadi düşüncə kitabıdır. Alaeddin Şenelin kitabı bir dünya tarixi kitabıdır. İbtidai dünyadan başlayır və bütün dünya tarixini sosioloji, siyasi və iqtisadi aspektləri ilə təhlil edir. Mən iqtisadi biliklərimi tamamlamaq üçün bu kitabdan çox şey öyrəndim”.