ELM VƏ TƏHSİL
“Əlyazmalar yanmır” və “Elmi əsərlər” jurnallarının yeni nömrələri nəşr olunub
Bakı, 8 oktyabr, AZƏRTAC
Azərbaycan Milli Elmlər Akademiyası (AMEA) Məhəmməd Füzuli adına Əlyazmalar İnstitutunun Elmi Şurasının qərarı ilə “Əlyazmalar yanmır” və “Elmi əsərlər” jurnallarının növbəti nömrələri çapdan çıxıb.
İnstitutdan AZƏRTAC-a bildirilib ki, jurnalların yeni nömrələrində ədəbiyyatşünaslıq, dilçilik, mətnşünaslıq, mənbəşünaslıq, kitabxanaşünaslıq, kitabşünaslıq kimi sahələr üzrə bir sıra məqalələr, o cümlədən AMEA-nın Humanitar Elmlər Bölməsinin akademik-katibi, akademik Teymur Kərimlinin “Xətlərin izi ilə: Azərbaycanın görkəmli şəxslərinin avtoqraf və epistolyar irsinin axtarışında”, filologiya elmləri doktoru Aybəniz Əliyeva-Kəngərlinin “Divani-lüğət-it-türk” Azərbaycan folklor kitabının qaynaqlarından biri kimi”, filologiya elmləri doktoru Paşa Kərimovun “Yusif haqqında ilk türk dastanı” sərlövhəli yazıları dərc olunub. Jurnalların tam elektron mətni ilə institutun www.manuscript.az linkində tanış olmaq mümkündür.
Xatırladaq ki, hər iki jurnal Ali Attestasiya Komissiyasının “Azərbaycan Respublikasında dissertasiyaların əsas nəticələrinin dərc olunması tövsiyə edilən dövri elmi nəşrlərin siyahısı”na daxildir.