Əməkdar İncəsənət Xadimi Zakir Bağırovun 100 illiyinə həsr olunmuş xatirə gecəsi keçirilib
Bakı, 23 dekabr, Flora Şükürova, AZƏRTAC
Dekabrın 23-də M.Maqomayev adına Azərbaycan Dövlət Filarmoniyasında Əməkdar İncəsənət Xadimi, bəstəkar Zakir Bağırovun 100 illiyinə həsr olunmuş xatirə gecəsi keçirilib.
AZƏRTAC xəbər verir ki, tədbir Mədəniyyət və Turizm Nazirliyi və Filarmoniyanın birgə təşkilatçılığı ilə reallaşıb.
Əvvəlcə qonaqlar bəstəkarın həyat və yaradıcılığının əks olunduğu fotosərgiyə baxıblar. Daha sonra sənətkarın ömür yolundan bəhs edən videoçarx nümayiş olunub.
Tədbirdə Əməkdar İncəsənət Xadimi Sərdar Fərəcov çıxış edərək, görkəmli bəstəkarın həyat və yaradıcılığından danışıb. Vurğulanıb ki, 1916-cı il martın 16-da Şuşada anadan olan Zakir Bağırov bəstəkarlıq fəaliyyəti ilə yanaşı, musiqi folklorumuzun toplanması və nota salınması sahəsində də mühüm xidmətlər göstərib. O, 1935-ci ildə ilk dəfə olaraq görkəmli bəstəkar Tofiq Quliyevlə birlikdə tarzən Mansur Mansurovun ifasında “Rast”, “Dügah” və “Segah” muğamlarını nota yazıb və çap etdirib. Bəstəkarın 1972-ci ildə Səməd Vurğunun eyniadlı əsəri əsasında yaratdığı “Aygün” operası musiqi mədəniyyətimizin gözəl nümunələrindəndir. Zakir Bağırov bir sıra teatr tamaşalarına və filmlərə musiqi yazıb. “Aygün”, “Bərəkətli torpaq”, “Sədaqət yolu ilə”, “Təbiətin dostları”, “Bizim Azərbaycan” və başqa bədii, o cümlədən sənədli filmlərin musiqisi ona məxsusdur.
Diqqətə çatdırılıb ki, bəstəkarın yaradıcılıq irsinə “Aygün”, “Qoca Xattabıç” operaları, “Qaynana”, “Kəndimizin səsi” operettaları, uşaq baleti, fortepiano ilə simfonik orkestr, tar ilə simfonik orkestr, kamança ilə simfonik orkestr üçün konsertlər, xalq çalğı alətləri orkestri üçün süitalar, kamera-instrumental əsərlər, mahnı və romanslar, film və tamaşalara yazılmış musiqilər daxildir.
Tədbir konsert proqramı ilə davam edib.
Konsertdə bəstəkarın oğlu Elşad Bağırovun dirijorluğunda Ü.Hacıbəyli adına Azərbaycan Dövlət Simfonik Orkestrinin müşayiəti ilə Azərbaycan Dövlət Filarmoniyasının direktoru, Xalq Artisti Murad Adıgözəlzadə pianoda bir sıra musiqi əsərləri səsləndirib.
Bölmənin digər xəbərləri
