Astara, 21 oktyabr, Bağır Əliyev, AZƏRTAC

Oktyabrın 21-də Astara Rayon Mərkəzi kitabxanasında Azərbaycan aşıq sənətinin görkəmli nümayəndəsi, qüdrətli söz ustadı Aşıq Ələsgərin 200 illik yubileyinə həsr olunmuş tədbir keçirilib.

AZƏRTAC-ın bölgə müxbiri xəbər verir ki, Lənkəran Regional Mədəniyyət İdarəsinin baş məsləhətçisi, Astara rayonu üzrə nümayəndə Şadoğlan Bayramov tədbirdə çıxış edərək Aşıq Ələsgərin 200 illik yubileyinin ölkəmizdə geniş qeyd edilməsi ilə bağlı Azərbaycan Prezidenti İlham Əliyevin Sərəncam imzalamasını Aşıq Ələsgər yaradığıcılığına və bütövlükdə aşıq sənətinə verilən yüksək qiymətin və dövlət qayğısının bariz nümunəsi olduğunu deyib.

Astara Rayon Mərkəzləşdirilmiş Kitabxana Sisteminin direktor əvəzi İlyas Məmmədov Aşıq Ələsgərin həyat və yaradıcılığı haqqında məruzə ilə çıxış edib. Qeyd olunub ki, Aşıq Ələsgərin yaradıcılığı da hər zaman ulu öndər Heydər Əliyevin diqqət mərkəzində olub. Məhz onun təşəbbüsü və bilavasitə rəhbərliyi ilə hələ sovet dövründə Aşıq Ələsgərin 150 illik yubiley tədbirləri dövlət səviyyəsində ölkə və SSRİ miqyasında təntənəli şəkildə qeyd olunub, böyük söz ustadının əsərləri dəfələrlə nəşr edilib, qədim yurd yerimiz olan Göyçə mahalında Aşıq Ələsgərin abidəsi ucaldılıb.

Diqqətə çatdırılıb ki, aşıq sənətinə Ümummilli Lider tərəfindən göstərilən diqqət və qayğı bu gün Prezidentimiz İlham Əliyev tərəfindən uğurla davam etdirilir. Azərbaycan Prezidentinin və Birinci vitse-prezident Mehriban xanım Əliyevanın diqqət və qayğısı sayəsində aşıq sənəti 2009-cu ildə UNESCO-nun Qeyri-Maddi Mədəni İrs Siyahısına daxil edilib.

Astara Rayon Heydər Əliyev Mərkəzinin direktoru Kübra Səmədova, Mərkəzi Kitabxananın metodika və biblioqrafiya şöbəsinin müdiri Nərgiz Məhərrəmova Aşıq Ələsgər yaradıcılığının bədii məziyyətlərindən danışıblar.

Azərbaycan Aşıqlar Birliyinin üzvü, beynəlxalq festivalların iştirakçısı, “Şindan” aşıqlar ansamblının rəhbəri, Sım Folklor Evinin direktoru aşıq Elxan Şindanlı Aşıq Ələsgərin şeirlərindən parçalar söyləyib, onun şeirlərinə bəstələnmiş mahnılar ifa edib.

Tədbir iştirakçıları Aşıq Ələsgərin anadan olmasının 200 illik yubileyinə həsr olunmuş videoçarxa baxdıqdan sonra qüdrətli söz ustadının ömür yoluna və yaradıcılığına həsr olunmuş sərgi ilə tanış olublar.