“Sizin sayənizdə” – 46 illik həkim ömrünün ən böyük mükafatı VİDEO
Gəncə, 3 sentyabr, AZƏRTAC
Övladı narahatlıq keçirən valideyn üçün həmin an dünyada ən vacib məsələ yalnız onun sağalmasıdır. Belə məqamlarda valideynin ümidlə üz tutduğu ünvan uşaq həkimidir. Bu sahə yalnız tibbi bilik deyil, həm də böyük səbir, məsuliyyət və balaca xəstənin ağrısını özününkü kimi hiss etməyi tələb edir.
Gəncə səhiyyəsində artıq 46 ildir uşaqların sağlamlığının keşiyində dayanan Rizvan Əsgərov da ömrünün böyük hissəsini məhz bu məsuliyyətli sənətə həsr edib. AZƏRTAC-ın bölgə müxbiri təcrübəli həkimlə onun yarıməsrlik əmək yolu, ötən illərlə modern tibb arasındakı fərqlər barədə söhbət edib, eləcə də fəaliyyəti dövründə qarşılaşdığı yaddaqalan məqamlara nəzər salıb.
Rizvan Əsgərov 1974-cü ildə Azərbaycan Tibb Universitetinə qəbul olunub. 1980-ci ildə ali təhsilini pediatr ixtisası üzrə başa vurduqdan sonra əmək fəaliyyətinə Göygöl rayonunda başlayıb. 1980–1989-cu illərdə burada çalışan gənc mütəxəssis təcrübəli həmkarlarından çox şey öyrənərək özünü peşəkar kimi formalaşdırıb.
1989-cu ildən fəaliyyətini Gəncə şəhərində davam etdirən mütəxəssis 1992-ci ildən Zülfüqar Məmmədov adına Gəncə Şəhər Birləşmiş Xəstəxanasının Pediatriya şöbəsinə rəhbərlik edir. Onun tibb yolunun başlanğıcı isə məktəb illərinə gedib çıxır.
“8-ci sinifdən sonra müəllimimin dəstəyi ilə məndə bu sahəyə həvəs yarandı. Ondan əvvəl ömrümü bu peşəyə bağlayacağımı heç təsəvvür etməzdim. 1974-cü ildə tələbə adını qazandım, 1980-ci ildə isə universiteti uğurla bitirdim”, – deyən təcrübəli həkim vurğulayır ki, bu yolu seçən şəxs ömrünü bütünlüklə ona həsr etməlidir.
İlk pasiyentləri Göygöl rayonunda qəbul edib. Onun üçün hər müraciət həm məsuliyyət, həm də yeni təcrübə demək idi. Təcrübəli həkimlərin yanında çalışmaqla peşəsinin incəliklərini mənimsəyən Rizvan Əsgərov qısa müddətdə öz dəst-xəttini müəyyənləşdirib.
46 illik iş dövründə müxtəlif narahatlıqları olan uşaqları müalicə edib. Bəzən elə nadir hallara rast gəlib ki, həmin uşaqlar sonradan da onun yaddaşında qalıb. “Xüsusilə, nadir patologiyaları olan uşaqlar hər zaman yadda qalır. Vaxtında düzgün diaqnoz qoyduğum hallar az olmayıb. O dövrdə göndərişlə postsovet ölkələrində müalicə alıb qayıdan və mənə təşəkkür edən valideynlər çox olub. Vaxtında qoyulan dəqiq diaqnoza görə minnətdarlıq eşitmək mənim üçün böyük sevincdir”, – deyə o bildirir.
Rizvan Əsgərov işə başladığı illərlə bugünkü tibb arasında müqayisə aparmağın çətin olduğunu deyir: “Fəaliyyətə başladığım dövrlə indiki arasında dağlar qədər fərq var. Əvvəllər müalicə imkanlarımız çox məhdud idi. Düzgün diaqnoz təyin etmək çətin olurdu, çox əziyyət çəkirdik, bəzən terapiya da effekt vermirdi. Bu gün isə səhiyyəmizdə modern müayinə və müalicə avadanlıqları mövcuddur. Mütəxəssis diaqnoz təyin etməkdə əvvəlki kimi çətinlik çəkmir. İndi gənc kadrlarımız müasir metodlardan və texnikadan istifadə etməklə ən ağır halların öhdəsindən gələ bilirlər”.
İllər, onilliklər dəyişsə də, dəyişməyən bir şey var: mütəxəssisin üzərinə düşən məsuliyyət. Pediatrın fikrincə, uşağı sağaltmaq yalnız tibbi prosedurları yerinə yetirməkdən ibarət deyil. Bəzən bütün gecəni pasiyentin yanında keçirməli, vəziyyətində baş verən hər bir dəyişikliyi izləməlisən. O, el arasında formalaşmış bir deyimi də xatırladır: “Əgər xəstə həkimin yanından çıxanda özünü 30-40 faiz sağalmış hiss etmirsə, deməli, o təbib yerində deyil”.
Rizvan Əsgərov üçün bu sahə həm də daim öyrənmək, yenilənmək və zamanla ayaqlaşmaq deməkdir. O, müasir imkanların iş prosesini xeyli asanlaşdırdığını qeyd etməklə yanaşı, peşəyə vicdanlı yanaşmanın dəyişməz qaldığını vurğulayır. Bu gün də fəaliyyətini davam etdirən qocaman pediatr səhiyyə işçilərinin əməyinin dövlət tərəfindən qiymətləndirilməsini də xüsusi qeyd edir. Sentyabrın 2-də TƏBİB-in tabeliyində çalışan həkimlərlə bağlı qərarı, əməkhaqqı artımlarını mühüm addım kimi dəyərləndirir: “Çox böyük işdir. Bu gərgin əməyi qiymətləndirdiklərinə görə əvvəlcə Prezident İlham Əliyevə və bu işin təşəbbüsçüsü olan Birinci vitse-prezident Mehriban xanım Əliyevaya dərin minnətdarlığımı bildirirəm. Bu addım kollektivimizin daha həvəslə çalışması üçün stimul olacaq”.
Onun sözlərinə görə, həyata keçirilən hərtərəfli islahatlar bir daha təsdiqləyir ki, Azərbaycan dövləti həm vətəndaşların sağlamlığının etibarlı qorunmasını, həm də gecə-gündüz fədakarlıqla çalışan tibb işçilərinin layiqincə qiymətləndirilməsini özünün başlıca vəzifələrindən biri hesab edir.
46 illik əmək yolunda Rizvan Əsgərovun həyatında ailəsinin də xüsusi yeri var. O, Azərbaycanın Tehrandakı səfirliyinə edilən terror hücumu zamanı diplomatik nünayəndəliyimizin şəhid olan mühafizə xidmətinin rəisi Orxan Əsgərovun atasıdır. Bu fakt onun həyat hekayəsinə tamam başqa bir məna qatır: bir tərəfdə illər boyu uşaqların həyatını xilas edən təbib, digər tərəfdə isə səfirliyimizin təhlükəsizliyi naminə canından keçən oğul.
Söhbətimizin sonunda qocaman pediatr bu günün uşaqlarını və onların valideynlərini düşündürən məsələyə də toxunur. Onun fikrincə, uşaqların sağlam böyüməsində böyüklərin nəzarəti mühüm rol oynayır. “Valideynlərə tövsiyəm odur ki, övladlarını smartfon və digər zərərli texnologiyalardan maksimum uzaq tutsunlar”, - deyə əlavə edir.
Bu gün də Gəncədə uşaqların sağlamlığı naminə çalışan, 46 illik peşə təcrübəsinə malik Rizvan həkimin həyat yolu göstərir ki, bəzi peşələr sadəcə vəzifə deyil, ömrün mənasına çevrilir. Belə bir ömrün ən böyük qazancı isə illər sonra qarşılaşdığın sağalmış uşağın təbəssümü, valideynin minnətdarlığı və “sizin sayənizdə” sözləridir...
Müxbir - Elcan Məmmədov
Bölmənin digər xəbərləri
