ELM VƏ TƏHSİL
Azərbaycanın ali təhsil sistemində tədqiqat və innovasiya siyasətinin idarə olunması gücləndirilir
Bakı, 21 iyun, AZƏRTAC
Azərbaycan Milli Elmlər Akademiyasının (AMEA) Yüksək Texnologiyalar Parkında (YT Park) Avropa İttifaqının Texniki Yardım və İnformasiya Mübadiləsi (TAİEX) layihəsinin ekspertləri ilə görüş keçirilib.
AMEA-dan AZƏRTAC-a bildirilib ki, görüş Azərbaycanın ali təhsil sistemində tədqiqat və innovasiya siyasətinin idarə olunmasının gücləndirilməsi məqsədi daşıyıb.
Tədbirdə YT Parkın direktoru, aqrar elmlər üzrə fəlsəfə doktoru Vüqar Babayev TAİEX layihəsinin ekspertləri ilə əməkdaşlığın ölkəmizdə müasir elmi və texnoloji nailiyyətlərə əsaslanan yüksək texnologiyalar sahəsinin inkişafına təkan verəcəyini vurğulayıb.
Sonra Rumıniya Milli Siyasi Araşdırmalar və Dövlət İdarəetmə Universitetinin şöbə müdiri Mihai Paunesku tədqiqat və innovasiyaların idarə edilməsindən, öz ölkəsinin bu sahədə mövcud vəziyyətindən, tədqiqat, tədris qiymətləndirilməsindən və metodlarından bəhs edib.
Litva Tədris Elmləri Universitetinin riyaziyyat, informatika və fizika kafedrasının müəllimi Gintaras Arbutavikius isə ölkəsinin təcrübəsi, şirkətlər üçün təlim ehtiyaclarının tədqiqi və biznes təşkilatlarında tədqiqat problemlərindən söz açıb.
Sonda qonaqlar YT Parkın ərazisi ilə tanış olub, burada yaradılan şərait, rezidentlərin fəaliyyəti barədə məlumat alıblar.