Gəncədəki “Çökək hamam” əsaslı şəkildə təmir edilir
Gəncə, 18 avqust (AZƏRTAC). Gəncə şəhərində XVII əsrdə memar Şeyx Bahəddin Məhəmməd Amilin layihəsi əsasında inşa edilmiş “Çökək hamam”ın əsaslı şəkildə təmirinə başlanılmışdır. Bu qədim abidənin bərpasına türkiyəli mütəxəssislər cəlb edilmişlər.
Türkiyəli bərpaçı Coşqun Ceylan AZƏRTAC-a bildirmişdir ki, binanın tikintisində yumurta ağı və gil-əhəng, yəni gəc qarışığından və qırmızı kərpicdən istifadə olunmuşdur. Tikili iki kiçik və bir böyük kümbəzdən ibarətdir. Təmir prosesində abidənin orijinallığı qorunur və ancaq köhnə kərpicdən istifadə olunur.
Türkiyəli mütəxəssis dİqqətə çatdırmışdır ki, bina köhnə olduğundan yağış suları onun içinə dolaraq qəza vəziyyəti yaratmışdır. Odur ki, binanın damı izolyasiya edilmiş və dağılmış hissələr yenidən bərpa edilir. Binanın daxili və xarici hissəsində də əsaslı təmir aparılır. Bir sözlə, Gəncənin fəxri olan abidələrdən sayılan “Çökək hamam”ın yüksək səviyyədə təmiri və istifadəyə verilməsi üçün bütün imkanlardan istifadə olunur.
Bölmənin digər xəbərləri
