Gürcüstan Orta Dəhlizin rəqabət qabiliyyətini artırmaq üçün addımlar atır
Tbilisi, 15 may, AZƏRTAC
Orta Dəhlizin inkişafı strateji prioritetdir. Gürcüstan 2032-ci ilə qədər əsas nəqliyyat və logistika infrastrukturunun inkişafı üçün 7 milyard ABŞ dolları səfərbər etməyi planlaşdırır.
AZƏRTAC xəbər verir ki, bu sözləri Gürcüstanın iqtisadiyyat və davamlı inkişaf nazirinin müavini Tamar İoseliani TRACECA Hökumətlərarası Komissiyasının 18-ci illik iclasında çıxışı zamanı bildirib.
Onun sözlərinə görə, Gürcüstan Orta Dəhlizin rəqabət qabiliyyətini artırmaq üçün üzv ölkələr və TRACECA çərçivəsində tərəfdaşlarla sıx əməkdaşlıqda maraqlıdır. Gürcüstan çoxtərəfli təşəbbüslər çərçivəsində nəqliyyat və tranzit potensialını genişləndirmək üçün fəal şəkildə çalışır.
Qeyd olunub ki, 2025-ci ildə Gürcüstan limanlarında konteyner daşımalarında kəskin artım qeydə alınıb. Yük dövriyyəsi 20 faiz artıb. Dəmir yolu istiqamətində də müsbət dinamika müşahidə olunur. Burada konteyner daşımalarının illik göstəricisi 14 faiz, Orta Dəhliz boyunca nəqliyyat axınları isə 33 faiz artıb.
O da bildirilib ki, Anaklia Dərinsulu Limanı 2029-cu ilə qədər liman 600 min TEU-ya qədər yük aşıra biləcək. 2035-ci ilə qədər isə bu rəqəm ən azı 1 milyon TEU-ya qədər artacaq.
Bölmənin digər xəbərləri
