İran: SEPAH yeni protokollar əsasında Hörmüz boğazından keçidə icazə verir
Qahirə, 16 may, AZƏRTAC
İslam İnqilabı Keşikçiləri Korpusunun (SEPAH) Hərbi Dəniz Qüvvələri İranın hazırladığı “qanuni protokollar” əsasında Hörmüz boğazından daha çox gəminin keçidinə icazə verir.
AZƏRTAC xəbər verir ki, bu barədə İranın rəsmi televiziya kanalı bildirib. Qeyd olunur ki, Tehran bu strateji dəniz yolunu İsrail və ABŞ ilə münaqişənin başladığı dövrdən etibarən faktiki olaraq məhdudlaşdırmışdı.
Qeyd olunub ki, hazırda Hörmüz boğazından daha çox gəmi SEPAH Hərbi Dəniz Qüvvələri ilə koordinasiya əsasında keçə bilir. Bildirilir ki, bu addım daha çox ölkənin İran və SEPAH tərəfindən bu region və Hörmüz boğazı üçün hazırlanmış yeni hüquqi protokolları qəbul etdiyini göstərir.
Qeyd edək ki, dünya neftinin və mayeləşdirilmiş təbii qazın təxminən beşdə biri bu boğazdan keçir. Hörmüz boğazı, həmçinin gübrə və dəniz yükdaşımaları üçün də mühüm tranzit marşrutudur və İran ilə ABŞ arasında aparılan danışıqlarda əsas mübahisə mövzularından biridir.
Tehran boğaz üzərində nəzarəti münaqişədən sonrakı mərhələdə də saxlamaqda israrlıdır. ABŞ və bir çox ölkələr isə dənizdə sərbəst naviqasiyanın təmin edilməsinin vacibliyini vurğulayır.
Hörmüz boğazında hərəkətin məhdudlaşdırılması qlobal enerji bazarlarında ciddi dalğalanmalara səbəb olub.
Şıxəli Əliyev
Bölmənin digər xəbərləri
