CƏMİYYƏT


Heydər Əliyev azərbaycanlıları vahid ideya ətrafında birləşdirməyə nail olub

Tbilisi, 15 iyun, AZƏRTAC

Milli Qurtuluş Günü Azərbaycanın Gürcüstandakı səfirliyində qeyd olunub.

AZƏRTAC xəbər verir ki, səfir Dursun Həsənov, Gürcüstanda səfərdə olan Diasporla İş üzrə Dövlət Komitəsinin sədri Fuad Muradov, səfirliyin, konsulluğun əməkdaşları, bu ölkədəki Azərbaycan şirkətlərinin nümayəndələri əvvəlcə Tbilisinin mərkəzindəki Heydər Əliyev parkında Ulu Öndərin abidəsini ziyarət ediblər. Müasir və müstəqil Azərbaycan dövlətinin memarı və qurucusu Heydər Əliyevin abidəsi önünə gül dəstələri düzüb, xatirəsi ehtiramla yad olunub.

Sonra tədbir səfirlikdə davam edib.

Əvvəlcə Ulu Öndərin həyat və fəaliyyətindən bəhs edən sənədli film nümayiş etdirilib.

Dursun Həsənov tədbirdə çıxış edərək ötən əsrin sonlarında Azərbaycanda baş verən hadisələrə nəzər salıb, ölkəmizin müstəqillik uğrundakı mübarizəsindən, qarşılaşdığı problemlərdən danışıb, ulu öndər Heydər Əliyevin gərgin əməyi və zəngin dövlətçilik təcrübəsi nəticəsində Azərbaycanın parçalanmaqdan xilas olduğunu diqqətə çatdırıb.

Diplomat Ulu Öndərin müəllifi olduğu regional enerji, infrastruktur, nəqliyyat layihələrinin təkcə Azərbaycan xalqının deyil, qardaş və dost gürcü xalqının da rifah halının yaxşılaşmasına, regionda sülhə və sabitliyə, Avropanın enerji təhlükəsizliyinə xidmət etdiyini vurğulayıb. Bildirib ki, Prezident İlham Əliyevin Ulu Öndərin siyasi kursunu uğurla davam etdirməsi nəticəsində Azərbaycan bu gün dünyada söz-nüfuz sahibinə çevrilib.

Sonra dövlət komitəsinin sədri Fuad Muradov çıxış edərək Heydər Əliyevin xarici siyasət kursunu təhlil edib, diaspor quruculuğunda Ulu Öndərin xidmətlərindən danışıb. Bildirib ki, müstəqil Azərbaycanı dünyaya tanıdan Ümummilli Lider bütün azərbaycanlıları vahid ideya ətrafında birləşdirməyə nail olub. Bu gün Prezident İlham Əliyevin səyi nəticəsində bu birlik daha da möhkəmlənib, dünyanın müxtəlif ölkələrində yaşayan azərbaycanlıların tarixi vətənləri ilə bağlılığı daha da güclənib.

Sonra Gürcüstan parlamentinin deputatı Mahir Dərziyev, jurnalist Nizami Məmmədzadə, politoloq Simon Kopadze və başqaları çıxışlarında Azərbaycan-Gürcüstan münasibətlərində Heydər Əliyevin misilsiz xidmətlərindən danışıblar. Natiqlər Ulu Öndərin tarixi xidmətlərini təhlil edib, dahi şəxsiyyətin əziz xatirəsinin Azərbaycan və gürcü xalqlarının qəlbində daim yaşayacağını vurğulayıblar.

Tədbirdə, həmçinin Gürcüstan parlamentinin deputatları Savalan Mirzəyev, Ruslan Hacıyev, bu ölkədə fəaliyyət göstərən Azərbaycan şirkətlərinin nümayəndələri və ziyalılar iştirak ediblər.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.