REGİONLAR
Kikboksinq üzrə üçqat dünya çempionu Rəşid Rəşidli Masallıda məktəblilərlə görüşüb
Masallı, 27 yanvar, Bağır Əliyev, AZƏRTAC
Masallı Rayon Heydər Əliyev Mərkəzində rayon gənclər və idman idarəsinin təşkilatçılığı ilə Gənclər və İdman, Təhsil nazirlikləri və Azərbaycan İdman Könüllüləri İctimai Birliyinin birgə həyata keçirdiyi “Çempionumuz” sosial idman layihəsi çərçivəsində kikboksinq idman növü üzrə üçqat dünya çempionu, beynəlxalq turnirlərin və Azərbaycan birinciliyinin qalibi Rəşid Rəşidli ilə məktəblilərin görüşü keçirilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ümummilli lider Heydər Əliyevin abidəsi və Qəhrəmanlar parkındakı “Şəhidlər” abidə-kompleksi önünə gül dəstələri düzərək Ulu Öndərin və şəhidlərimizin xatirəsini ehtiramla yad ediblər.
Masallı Rayon Gənclər və İdman İdarəsinin, Təhsil Şöbəsinin əməkdaşlarının, qazilərin, idmançıların, müəllimlərin və şagirdlərin iştirak etdiyi görüşdə ulu öndər Heydər Əliyevin, Azərbaycanın suverenliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Tədbirdə çıxış edən Masallı Rayon Gənclər və İdman İdarəsinin rəisi Sabiq Cahangirov ölkəmizdə idmanın inkişafına göstərilən dövlət qayğısından söz açaraq, “Çempionumuz” sosial idman layihəsi haqqında məktəblilərə geniş məlumat verib, tanınmış idmançı Rəşid Rəşidlini görüş iştirakçılarına təqdim edib.
Masallı Rayon Təhsil Şöbəsinin əməkdaşı Əyyar Burhanov və Uşaq-Gənclər İdman Şahmat Məktəbinin direktoru Əlifağa Yaqubov çıxışlarında Azərbaycan idmançılarının beynəlxalq yarışlarda qazandıqları uğurlardan danışaraq, bu uğurları ölkəmizdə idmanın inkişafına göstərilən diqqət və qayğının nəticəsi kimi dəyərləndiriblər.
Görüşdə çıxış edən üçqat dünya çempionu Rəşid Rəşidli ölkə birinciliklərində və beynəlxalq yarışlarda qazandığı uğurlardan danışıb, ona ünvanlanmış sualları cavablandırıb.