Klublararası Avropa kuboku: “Vüqar Həşimov” komandası İspaniya yığması ilə heç-heçə edib
Bakı, 22 sentyabr, AZƏRTAC
Makedoniyanın Struqa şəhərində kişi şahmatçılar arasında klublararası Avropa kuboku yarışı davam edir.
AZƏRTAC xəbər verir ki, sentyabrın 21-də turnirin 4-cü turunun oyunları keçirilib. Azərbaycanı təmsil edən “Vüqar Həşimov” klubu 4-cü turda İspaniyanın “Silla” komandası ilə üz-üzə gəlib. Qarşılaşma heç-heçə başa çatıb. Qeyd edək ki, şahmatçımız Nicat Abasov rəqib komandanın heyətində yer alıb. Aktivində 5 xal olan komandamız 13-cü sırada qərarlaşıb.
Azərbaycanın digər qrossmeysteri Şəhriyar Məmmədyarov Makedoniyanın “Alkaloid” komandasının heyətində mübarizə aparır. Onun komandası isə bu turda Sloveniyanın “Maribor Poligram” yığmasını 5,5:0,5 hesabı ilə məğlub edib.
Qeyd edək ki, kişilərin yarışında 38 komanda mübarizə aparır.
Bölmənin digər xəbərləri
