Naxçıvanda beynəlxalq hakimlərin iştirakı ilə seminar təşkil edilib
Naxçıvan, 21 iyun, AZƏRTAC
Naxçıvan Karate-do Federasiyasının birgə təşkilatçılığı ilə Azərbaycan Milli Karate Federasiyası tərəfindən hakimlik seminarı keçirilib.
Muxtar Respublikanın Gənclər və İdman Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, hakimlər komitəsinin sədri, beynəlxalq hakim Cahangir Babayevin rəhbərliyi və beynəlxalq hakim Vüqar Kərimovun assistentliyi ilə iki gün davam edən nəzəri və praktiki seminarda 20-dən artıq yerli hakim iştirak edib. Dərəcəsini artıran 6 hakimə - Nəriman Quliyev (II dərəcə), Vüsal Allahverdiyev, Murtuz Abdullayev, Mirpaşa Kərimov, Qələndər Binyətli və İlkin Şirinova (hər biri III dərəcə) müvafiq sertifikatlar təqdim edilib.
Cahangir Babayev bu il iyulun əvvəlində Xorvatiyada gənclərin Dünya Kubokuna yollanacaq Naxçıvan karateçilərinin hazırlıq məşqlərində iştirak edərək onları yarış qaydaları ilə bağlı məlumatlandırıb və əlavə tövsiyələrini verib.
Qeyd edək ki, muxtar respublika idmanında müvafiq sahələr üzrə peşəkar kadr ehtiyatının zənginləşdirilməsi, yerli məşqçi və idmançıların təcrübə artımı məqsədilə hər il müxtəlif seminar, treninq, kurs və təlim-məşq toplanışları təşkil olunur. Bununla yanaşı, qonşu ölkələrin aidiyyəti idman qurumları ilə təcrübə mübadiləsi aparılır, gənc kadrların zəruri sahələr üzrə lisenziya (fəaliyyət sertifikatı) alması üçün təşkilati dəstək göstərilir.
Bölmənin digər xəbərləri
