DÜNYA


Yaponiyalı 86 yaşlı alpinist Akonkaqua zirvəsinə qalxmağı dayandırıb

Tokio, 21 yanvar, AZƏRTAC 

Yaponiyalı 86 yaşlı alpinist Yuiçiro Miura səhhətində yaranan problemə görə Argentinanın Akonkaqua zirvəsinə qalxmağı dayandırıb.

AZƏRTAC NHK telekanalına istinadla xəbər verir ki, Yuiçiro Miura Cənubi Amerikanın ən yüksək zirvəsinə yanvarın 18-də dırmanmağa başlayıb və dəniz səviyyəsindən 6 min metr hündürlükdə yerləşən düşərgəyədək qalxıb. Zirvənin 6960 metr hündürlükdə yerləşən ən yüksək nöqtəsinə qalxmaq üçün o, iki gün burada havanın yaxşılaşmasını gözləyib.

Y.Miuranın Tokiodakı ofisindən bildiriblər ki, alpinisti müşayiət edən həkimin qəti tələbindən sonra o, bu cəhddən imtina etməyi qərara alıb.

Məlumatda qeyd edilir ki, həkim belə yüksək səviyyədə qalmağın Y.Miuranın bədənini həddindən artıq gərginləşdirdiyini və ürək çatışmazlığına səbəb olduğunu bildirib. Həkim qeyd edib ki, ürəyində problemlər olan Y.Miura zirvəyə qalxmaqda davam edərsə, bu, onun səhhətində ciddi fəsadlar yarada bilər.

Süni peyk vasitəsilə Tokio ilə əlaqə saxlayan Y.Miura zirvəni fəth edə biləcəyinə əmin olmasına baxmayaraq, həkimin göstərişini qəbul etdiyini və ekspedisiyanı dayandırdığını deyib.

Ofisdən bildirildiyinə görə, Y.Miura artıq helikopter vasitəsilə 5500 metr hündürlüyə endirilib.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.