Aktotı Raimkulova: Azərbaycan xalqının Ümummilli Lideri Türk dünyasının qəlbində əbədi yaşayacaq
Bakı, 10 may, AZƏRTAC
Bu gün bütün Türk dünyası üçün xüsusi bir gündür - Azərbaycan xalqının Ümummilli Lideri, dahi şəxsiyyət Heydər Əliyevin doğum günüdür. Hər il bu əlamətdar gündə biz bütün həyatını xalqına və Azərbaycanın tərəqqisinə həsr etmiş görkəmli dövlət xadiminin əziz xatirəsini dərin hörmət və ehtiramla yad edirik.
Bunu AZƏRTAC-a açıqlamasında Türk Mədəniyyəti və İrsi Fondunun prezidenti Aktotı Raimkulova deyib.
Bütün Azərbaycan xalqı və dövlətinin bu tarixi xüsusi həssaslıq və qürur hissi ilə qeyd etdiyini bildirən A.Raimkulova fikirlərinə belə davam edib: "Türk Mədəniyyəti və İrsi Fondu da hər il dahi liderin əziz xatirəsinə dərin ehtiramını ifadə edir, onun zəngin və əvəzsiz irsini yad etmək məqsədilə müxtəlif anım tədbirləri təşkil edir. Heydər Əliyev, təkcə Azərbaycan xalqının böyük oğlu deyil, həm də bütün Türk dünyasının görkəmli lideri idi. Onun müdrik siyasəti, Vətənə sonsuz sevgisi və uzaqgörənliyi Azərbaycanın gələcəyinin möhkəm təməlini formalaşdıraraq ölkənin inkişaf yolunu uzun illər öncədən müəyyənləşdirdi. Bu gün həmin böyük yolu Azərbaycan Respublikasının Prezidenti İlham Əliyev layiqincə davam etdirir. O, Ulu Öndərin siyasi kursuna sadiq qalaraq Azərbaycanı yeni nailiyyətlərə və uğurlara doğru inamla aparır. Onun atdığı hər addımda Heydər Əliyev irsinə bağlılıq və güclü, müasir, çiçəklənən Azərbaycanın daha da möhkəmləndirilməsi əzmi hiss olunur. Türk Mədəniyyəti və İrsi Fondu adından qardaş Azərbaycan xalqına və bütün Türk dünyasına rifah və firavanlıq arzulayırıq. Bu əlamətdar gün — 10 May tarixində biz dahi lider Heydər Əliyevin əziz xatirəsini dərin ehtiramla yad edirik. Onun adı Azərbaycan xalqının və bütün Türk dünyasının qəlbində əbədi yaşayacaq. Dahi liderin işıqlı xatirəsi daim yaşayacaq".
Bölmənin digər xəbərləri
