® Cavid Qurbanov: Transferimdən 5 min manat qazanmışam
Bakı, 22 aprel, Nicat Məmmədov, AZƏRTAC
Uşaq yaşlarından futbola böyük marağım var idi. Asudə vaxtlarımda kompüterdə futbol oynayırdım. Bir müddət sonra artıq FIFA üzrə turnirlərdə iştirak etməyə başladım.
Bu sözləri AZƏRTAC-a müsahibəsində 25 min manat qarşılığında “Gaming League Azerbaijan”ın yetirməsi GMT Esports - “Guardians of the Maiden Tower” - “Qız Qalasının keşikçiləri” klubu ilə rəsmi müqavilə imzalayan Cavid Qurbanov deyib. Müsahibəni təqdim edirik.
- Böyük futbolda hansı kluba azarkeşlik edirsiniz?
- Sevimli klubum İngiltərənin “Mançester Yunayted” klubudur. Azarkeşi olduğum futbolçu Kriştiano Ronaldodur. Milli komandalar arasında Portuqaliya yığmasının uğurlarına daha çox sevinirəm.
- Ümumiyyətlə kompüter oyunlarına münasibətiniz necədir?
- Münasibətim əladır. Kompüter vasitəsilə asudə vaxtımı maraqlı keçirirəm. Üstəlik pul da qazanıram, karyera qurmuşam. Kiberidman həyat tərzimdi. Arzularıma bu oyun vasitəsi ilə çatmışam. İndi əksər yarışlar onlayn baş tutur. Belə turnirlərdə sosiallaşmaq olur. Yəni yeni dostlarla tanış olursan. Hətta ingilis dilini təkmilləşdirmək mümkündür.
- GLA-dan başqa şirkətin komandasına keçidini necə qiymətləndirirsiniz?
- İlk dəfə müqavilə imzaladığım peşəkar komanda “Gaming League Azerbaijan” (GLA) şirkəti olub. GLA-ya qoşulduğum ilk gündən maddi və mənəvi dəstək görmüşəm. GMT-yə transferimdən razıyam. Bundan sonra yeni komandamın uğurları üçün çalışacağam.
- Transferin 25 min manat dəyərindədir. İlk bahalı transfer olmaq necədir?
- Azərbaycan tarixində ilk bahalı transfer olmaq maraqlıdır. GMT şirkətinə təşəkkür edirəm. Mənə inandıqları üçün. Bu dəyəri doğrultmağa çalışacağam. Fikrimcə bu, başlanğıcdır. Çox istəyərdim gələcəkdə transferlər daha bahalı olsun.
- Sizə 25 min manatdan nə qədər çatdı?
- Müqaviləyə görə 25 min manatın bir hissəsi mənə aiddir. Dəqiq söyləsək, 5 min manat.
- Gələcəkdə GMT-də uğur qazanandan sonra qayıdışınız mümkündür? Yəni GLA-ya transferiniz mümkündür?
- (gülür) Maraqlı sualdır. Zaman göstərəcək.
- Kiberidmanla yeni məşğul olan gənclərə məsləhətiniz nədir?
- İlk növbədə təhsilə ciddi yanaşmağı məsləhət görərdim. Çünki peşəkar kiberidmançı digər sahələrdə olduğu kimi savadlı olmalıdır. Asudə vaxtlarında kiberidman üzrə “master klassları” izləmək yaxşı olardı. Təcrübələrini artırardılar. Sonra turnirlərdə iştirak etməklə oyun səviyyələrini yüksəltmək imkanları yaranacaq.
- Beynəlxalq arenada ən çətin yarışınız hansı olub?
- Rusiya Peşəkar Liqasında iştirak edərkən Moskva “Lokomotiv”inin oyunçusu ilə oyun ən çətin mübarizələrdən biri kimi yadda qalıb. İlk hissədə 1:0 hesabı ilə öndə olmağıma baxmayaraq fasilədən sonra üstünlüyü qoruya bilmədim. Yekunda 1:2 hesabı ilə uduzdum. Qeyri-adi hisslər keçirirdim. Axı udmağa çox yaxın idim. Rəqibim dünyada TOP-20 reytinq sayasına daxil idi. Təcrübəli olduğu üçün oyunu xilas etməyi bacarmışdı.
- Gələcək planlarını bilmək istərdik…
- Kiberidman Asiya Oyunlarının proqramına daxil edilib. Gələcəkdə kiberidmanın böyük kütləvi yarışlarda təmsil olunacağını gözləyirəm. Əlbəttə GMT-nin heyətində qələbələr qazanmaq istərdim.
Qeyd edək ki, Cavid Qurbanov 1999-cu ildə Bakıda anadan olub. GLA tərəfindən keçirilən Milli Liqa yarışlarında qələbə qazanıb və dəfələrlə mükafatçılar sırasında yer alıb. Cavid MDB Çempionatında Azərbaycan üzrə ən yüksək nəticəni göstərib. O, FIFA “EuroCup” turnirində ikinci yeri tutub.
Bölmənin digər xəbərləri
