® Həkimlərimizi tanıyın - invaziv kardioloq İlqar Tahiroğlu
Sağlamlıq dünyada ən dəyərli nemət hesab olunur. Onu itirəndə və ya əldən gedəndə dünya başımıza daralır. Şair demişkən, ömür itirəndə təravətini, o zaman bildirir öz qiymətini. Əlimiz hər yerdən üzüləndə ilk ümid yeri həkim olur. Ən çətin və ümidsiz vəziyyətlərdə həkimlərə üz tuturuq. Onlar gecəni gündüzə qataraq, yorulmaq bilmədən bilik və bacarıqları, təcrübələri hesabına xəstəni vəziyyətdən çıxarır, ona həyat bəxş edirlər. Həkim əlləri ilə bir ömrə yenidən işıq calanır, nur ələnir. Xəstənin gözünə işıq, üzünə təbəssüm qayıdanda ən çox sevinən də elə onlar olurlar.
Mərkəzi Gömrük Hospitalının Kardiologiya şöbəsinin rəisi invaziv kardioloq İlqar Tahiroğlu məhz belə həkimlərdəndir. Peşəkarlığı, həkimlik sənətinə məhəbbəti, xəstələrə olan can yanğısı onu ən yaxşı sağlamlıq keşikçilərindən biri kimi tanıdıb.
Təhsilə və inkişaf yoluna sadiqlik
İlqar Tahiroğlunun uğur düsturu təhsilə, zəhmətə və öz üzərində daim çalışmağa əsaslanır. O, 2010-cu ildə Türkiyənin Ondokuz Mayıs Universitetinin Müalicə işi fakültəsini fərqlənmə ilə bitirib, kardiologiya üzrə internatura keçərək ilk tibbi təcrübələrini qazanıb. 2015-2019-cu illərdə İsrailin Hadasah Tibb Mərkəzində kardiologiya üzrə rezidentura təhsili alıb, 2019-2021-ci illərdə isə intervensional kardiologiya və struktural ürək xəstəlikləri üzrə ixtisaslaşıb. Həmin təhsil proqramları təkcə nəzəri cəhətdən deyil, həm də təcrübi biliklər baxımından onun peşəkarlığını daha da artırıb.
Peşəkar fəaliyyət sahəsi – bilik və texnologiyanın vəhdəti
Onun yerinə yetirdiyi əməliyyatlar, icra etdiyi müdaxilələr xəstə üçün həyati əhəmiyyət daşıyır. TAVİ, mitral clip, karotis stent, ASD və PFO qapatmaları, kardiostimulyator implantasiyası, koronar və perifer damar angioplastikası, sağ ürək boşluqlarının hemodinamik kateterizasiyası kimi müasir və mürəkkəb kardioloji prosedurlar onun gündəlik fəaliyyətinin bir hissəsidir. Həmin əməliyyatların hər biri neçə-neçə xəstənin həyatında dönüş nöqtəsinə çevrilir.
Elm və beynəlxalq uğurlar
İlqar Tahiroğlu elmə və tibbi biliklərin inkişafına böyük töhfələr verən həkimdir. O, İsrail Ürək Cəmiyyətinin 62, 63, 64 və 65 illik konfranslarında iştirak edib, 2018-ci ildə mitral klipdən əvvəl və sonra ağciyər arteriya təzyiqi ilə bağlı elmi təqdimatla çıxış edib. Həmin təqdimat XXIV Ümumdünya Exokardioqrafiya və Ürək-Damar Görüntüsü Konqresində böyük maraqla qarşılanıb. O, Londonda keçirilən “TAVI Platforması” üzrə təlimdə sertifikat alıb, 2023-cü ildə İstanbulda Medtronic Akademiyasının təşkilatçılığı ilə keçirilən beynəlxalq TAVİ təlimində isə trener olaraq iştirak edib. Həmin il “International Journal of Current Medical and Biological Sciences” nəşrinə redaktor təyin olunması isə onun elmi nüfuzunun göstəricisidir.
Azərbaycan səhiyyəsinə xidmət və gənc nəslə dəstək
2021-ci ildən İ. M. Seçenov adına Birinci Moskva Dövlət Tibb Universitetinin Bakı filialında öz peşəsini tədris edərək gələcək tibb işçilərinin yetişməsində mühüm rol oynayır. Onun dərsləri yalnız nəzəri biliklərlə deyil, real klinik təcrübə nümunələri ilə zəngin olduğu üçün tələbələr tərəfindən böyük maraq və hörmətlə qarşılanır.
İlqar Tahiroğlu 2022-ci ildən Mərkəzi Gömrük Hospitalında Kardiologiya şöbəsinin rəisidir. Ötən müddət ərzində şöbədə tətbiq olunan innovativ yanaşmalar, müasir müalicə protokolları, pasiyentyönümlü xidmət mədəniyyəti onun rəhbərliyi ilə yeni mərhələyə qədəm qoyub.
Mükafatlar və ictimai nüfuz
İlqar həkim peşəkar fəaliyyət göstərməklə yanaşı, ictimai sahədə də fəallıq göstərir. O, 2023-cü ildə “Medtronic” firmasının sertifikatını alıb, 2024-cü ildə isə Beynəlxalq Gömrük Günü münasibətilə Ümumdünya Gömrük Təşkilatının (ÜGT) fəxri sertifikatı ilə təltif olunub. ÜGT-nin baş katibi İan Saundersin imzaladığı həmin sertifikat onun kolleksiyasında ən əsas yerlərdən birini tutur, peşəkar və sosial fəaliyyətinin beynəlxalq səviyyədə yüksək qiymətləndirildiyini göstərir.
Şəxsi keyfiyyətləri ilə sevilən həkim
Həkimlik sənəti yalnız diaqnostika və müalicə deyil, həm də bir qəlb işidir. İlqar Tahiroğlunun xəstələrə olan münasibəti – diqqət, anlayış və empatiya ilə müşayiət olunan davranışı onu fərqləndirir. Həkimin qəbuluna gələn hər kəs özünü ümidli və inamlı hiss edir. Ən ümidsiz vəziyyətdə olan xəstə də onun qayğıkeş əllərindən şəfa və imdad umur. Elə buna görə də o, təkcə təcrübəli kardioloq və şöbə rəhbəri kimi deyil, həm də ümid və inam bəslənilən həkim kimi tanınır.
İlqar Tahiroğlunun qəbuluna yazılmaq üçün: (012) 404-08-08
Bölmənin digər xəbərləri
